އެންމެ ބާރުގަދަ ހަތިޔާރަކީ ދުޢާކުރުން، ކާމިޔާބީއާއި ނަސްރު ހޯދުމަށް ދުޢާކުރުމުގައި ދެމިހުރޭ: ޚުތުބާ
30 އެޕްރީލު 2021 | ހުކުރު 08:15ބަދުރު ހަނގުރާމައިން ދަސްކޮށްދެނީ ނަޞްރަކީ ﷲ ދެއްވާ އެއްޗެއްކަން
އިސްލާމީ މަރުކަޒު، ހުކުރު ނަމާދުކޮށް ނިމިގެން މީހުންތައް ދަނީ
މުއުމިނުންގެ އެންމެ ބާރުގަދަ ހަތިޔާރަކީ ދުއާ ކުރުން ކަމަށާއި، ކާމިޔާބީއާއި ނަސްރު ހޯދުމަށް ދުއާ ކުރުމުގައި ދެމިހުރުމަށް ހުކުރު ޚުތުބާގައި ގޮވާލައިފިއެވެ.
''ބަދުރު ހަނގުރާމައިގެ ދަރުސްތަކުގެ ތެރެއިން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ބަދުރު ހަނގުރާމައިން ދަސްކޮށްދެނީ ނަޞްރަކީ ﷲ ދެއްވާ އެއްޗެއްކަމެވެ. އެއީ ފަހަރެއްގައި ވެސް ހަމައެކަނި މާއްދީ ގޮތުން ލަޝްކަރުގެ ބައިބޯކަމާއި، ހަތިޔާރުގެ މޮޅުކަމަށް ބިނާވެފައި އޮންނަ ކަމެއް ނޫން ކަމެއް ކަމަށެވެ.
ޚުތުބާގައި ބުނީ މުއުމިނުންގެ އެންމެ ބާރުގަދަ ހަތިޔާރަކީ ދުއާ ކުރުން ކަމަށާއި، ބަދުރު ހަނގުރާމައިގެ މަތިވެރި ނަޞްރުން އެކަން ސާބިތުކޮށްދީފައިވާ ކަމަށެވެ. އަދި މިއަދުގެ ޖީލުން ބަދުރު ހަނގުރާމައިން ފިލާވަޅު ލިބިގަނެ ކުރިއަށްދާން ޖެހޭ ކަމަށް ޚުތުބާގައި ބުނެފައިވެއެވެ. އަދި ބަދުރު ހަނގުރާމައަށް ތައްޔާރުވަމުންދިޔަ ހިނދު ކީރިތި ރަސޫލާ ގެ ދެއަތްޕުޅު އުފުއްލަވައި، ﷲ ގެ ޙަޟްރަތުގައި ނަޞްރަށް އެދިވަޑައިގެން އާދޭސް ދަންނަވަމުން ގެންދެވިކަން ޚުތުބާގައި ފާހަގަކޮށްފައިވެއެވެ.
ޚުތުބާގައި ބުނީ ނަސްރު ލިބެނީ ބައިބައިނުވެ، ކެތްތެރިވެ އެންމެން އެކަތިގަނޑަކަށްވެ ﷲ ގެ ދީނުގައި ހިފަހައްޓައިގެން ކަމަށެވެ. އިސްލާމް ދީނުގެ ދިފާއުގައި ކުރަން ޖެހިއްޖެ ކޮންމެ ކަމެއްގައި ކެރިގެން ކުރިމަތިލުމަށް ޚުތުބާގައި ވަނީ ގޮވާލާފައެވެ.
ކުރިއަށް އޮތީ ރަމަޟާންމަހުގެ ފަހުދިހައިގެ ބަރަކާތްތެރި ރޭތަކާއި ދުވަސްތައްކަން ފާހަގަކޮށް ޚުތުބާގައި ބުނީ އެރޭތަކާއި ދުވަސްތަކުގައި ހަވާނަފްސުގެ އެދުންތަކުގެ މައްޗަށް ޖިހާދުކޮށް ނަޞްރު ހޯދަން ޖެހޭ ކަމަށެވެ. ޚުތުބާގައި ބުނީ ރަމަޟާންމަހުގައި ހިނގާފައިވާ ތާރީޚީ ހާދިސާތަކުން އެނގި ކަށަވަރުވަނީ، ރަމަޟާން މަހަކީ ގަދައަޅައި މަސައްކަތް ކުރުމުގެ މައްސަރު ކަމަށާއި، އެއީ މުރާލިކަމާއި ހީވާގިކަން އިސްކުރަންވީ މައްސަރުކަން ކަމަށެވެ. އަދި އެ މައްސަރުގައި، ކަންނެތްކަމަށް ޖާގަ ނުދިނުމަށް ޚުތުބާގައި ވަނީ ގޮވާލާފައެވެ.
