ކައުންސިލްތަކުގެ ރައީސުންނަށް ދިނުމަށް މާލިއްޔަތު ކޮމިޓީން ފާސްކުރި މުސާރަ ކުޑަކޮށް ކައުންސިލްތަކުގެ މެމްބަރުންގެ މުސާރަ ރައްޔިތުންގެ މަޖިލީހުން ފާސްކޮށްފިއެވެ.

ރަށު ކައުންސިލްގެ ރައީސުންނަށް ދިނުމަށް މާލިއްޔަތު ކޮމިޓީން ފާސްކޮށްފައިވަނީ މުސާރައިގެ ގޮތުގައި 18،400 އަދި ލިވިން އެލަވަންސްގެ ގޮތުގައި 4،600 ރުފިޔާ އާއެކު ޖުމްލަ 23،000 ރުފިޔާއެވެ. މާލިއްޔަތު ކޮމިޓީން ކައުންސިލްގެ މެމްބަރުންގެ މުސާރަ އެކުލަވާލާފައިވާ ރިޕޯޓަށް ތަޅުމުން އިސްލާހު ހުށަހެޅުއްވީ ހަނިމާދޫ ދާއިރާގެ މެމްބަރ އަބްދުލްޣަފޫރު މޫސާއެވެ. އެހުށަހެޅުއްވުމުގައި ވަނީ ރަށު ކައުންސިލްގެ ރައީސްގެ މުސާރައިގެ ގޮތުގައި 15،400 ރުފިޔާ އަދި ލިވިން އެލަވަންސްގެ ގޮތުގައި 4،600 ރުފިޔާއާއެކު ޖުމްލަ 20،000 ރުފިޔާއެވެ. ރަށު ކައުންސިލްގެ ނާއިބުރައީސްގެ މުސާރައިގެ ގޮތުގައި 11،600 ރުފިޔާ އަދި ލިވިން އެލަވަންސްގެ ގޮތުގައި 3،400 ރުފިޔާއާއެކު ޖުމްލަ 15،000 ރުފިޔާއެވެ. ކައުންސިލްގެ މެމްބަރުންނަށް ހުށަހަޅުއްވާފައިވަނީ 10،600 ރުފިޔާ އަދި އިނާޔަތުގެ ގޮތުގައި 2،400 ރުފިޔާ އާއެކު ޖުމްލަ 13،000 ރުފިޔާއެވެ.

މިއިސްލާހު ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 60 މެމްބަރުން ވަނީ އިސްލާހު ފާސްކުރުމަށް ވޯޓު ދެއްވާފައެވެ. އިސްލާހު ފާސްކުރުމަށް ވަކިގޮތަކަށް ވޯޓު ނުދެއްވާ އެއް މެމްބަރަކު އިންނެވިއެވެ.

މި އިސްލާހާއެކު ރިޕޯޓް ފާސްކުރުމަށް ނެގުނު ވޯޓުގައި ބައިރިވެވަޑައިގެންނެވި 62 މެމްބަރުން ވަނީ ރިޕޯޓް ފާސްކުރުމަށް ވޯޓު ދެއްވާފައެވެ.

އެހެންކަމުން މިހާރު މިފާސްވި އޮނިގަނޑާއެކު ސިޓީ މޭޔަރުންނަށް މުސާރައިގެ ގޮތުގައި 30،000 ރުފިޔާ އަދި ލިވިން އެލަވަންސްގެ ގޮތުގައި 10،000 ރުފިޔާ އާއެކު ޖުމްލަ 40،000 ރުފިޔާ ލިބިވަޑައިގަންނަވާނެއެވެ. ޑެޕިޔުޓީ މޭޔަރަށް މުސާރައިގެ ގޮތުގައި 27،000 ރުފިޔާ އަދި ލިވިންގ އެލަވަންސްގެ ގޮތުގައި 8000 ރުފިޔާއެކު 35،000 ރުފިޔާ ލިބިވަޑައިގަންނަވާނެއެވެ. ސިޓީ ކައުންސިލްތަކުގެ މެމްބަރުންނަށް މުސާރައިގެ ގޮތުގައި 24،000 ރުފިޔާ އާއި ލިވިން އެލަވަންސްގެ ގޮތުގައި 6،000 ރުފިޔާ އާއެކު ޖުމްލަ 30،000 ރުފިޔާ ލިބިވަޑައިގަންނަވާނެއެވެ.

އަތޮޅު ކައުންސިލްގެ ރައީސަށް މުސާރައިގެ ގޮތުގައި 22،400 ރުފިޔާ އަދި ލިވިން އެލަވަންސްގެ ގޮތުގައި 5،600 އާއެކު ޖުމްލަ 28،000 ރުފިޔާ ލިބިވަޑައިގަންނަވާނެއެވެ.

ކައުންސިލްތަކުގެ މެމްބަރުންގެ މުސާރައަށް މިބަދަލު ގެނައީ ލާމަރުކަޒީ އުސޫލުން އިދާރީ ދާއިރާތައް ހިންގުމުގެ ގާނޫނަށް ގެނައި އިސްލާހާއެކުއެވެ. މިއިސްލާހުގެ ދަށުން ކައުންސިލްތަކުން ކުރަންޖެހޭ މަސައްކަތްތަކަށް ވަނީ ބަދަލުތަކެއް އައިސްފައެވެ.