އަންހެނުންނާއި ކުޑަކުދިންނަށް ޚާއްސަ ރިހެބިލިޓޭޝަން މަރުކަޒު ގާއިމުކުރުމަށް މަޖިލީހުން ފާސްކޮށްފި
29 އެޕްރީލު 2021 | ބުރާސްފަތި 11:33ކުޑަކުދިންނަށް ޚާއްސަ ޑްރަގް ޓްރީޓްމަންޓް އެންޑް ރިހެބިލިޓޭޝަން މަރުކަޒު ގާއިމުކުރެވިފައި ނުވާކަން ފާހަގަ ކުރި
ރައްޔިތުންގެ މަޖިލީހުގެ ޖަލްސާއެއް ކުރިއަށް ދަނީ
އަންހެނުންނާއި ކުޑަކުދިންނަށް ޚާއްސަ ޑްރަގް ޓްރީޓްމަންޓް އެންޑް ރިހެބިލިޓޭޝަން މަރުކަޒެއް ގާއިމުކުރުމަށް ރައްޔިތުންގެ މަޖިލީހުން ފާސް ކޮށްފިއެވެ.
ބުރާސްފަތި ދުވަހުގެ ޖަލްސާގައި މިކަން ފާސް ކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވި 66 މެންބަރުންގެ އިއްތިފާގުންނެވެ.
ނޭޝަނަލް ޑްރަގް އޭޖެންސީ (އެންޑީއޭ) ގެ ގާނޫނީ ޒިންމާ އަދާކުރަމުން ނުދާކަމަށް ބަޔާންކޮށް ހުށަހަޅާފައިވާ މައްސަލަ ހިއުމަން ރައިޓްސް އެންޑް ޖެންޑަރ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ބުނަނީ އެކިއެކި ސަބަބުތަކާ ގުޅިގެން ފަރުވާ ނުލިބި ގިނަ ދުވަސްތަކެއް ވަންދެން ވެއިޓިން ލިސްޓުގައި 400ށް ވުރެ ގިނަ މީހުން އެބަތިބި ކަމަށެވެ. އަދި އެފަރާތްތަކުގެ ހާލަތު ރިވިއުކޮށް ކޮމިއުނިޓީ ބޭސްޑް ފަރުވާއަކަށް ބަދަލުވުމުގެ ފުރުސަތު ފަހިކޮށްދޭން ޖެހޭ ކަމަށެވެ.
އަދި މަސްތުވާ ތަކެއްޗާބެހޭ ގާނޫނުގެ ގެ 47 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން މަސްތުވާތަކެތީގެ ޝިކާރައަކަށްވާ 18 އަހަރުން ދަށުގެ ކުދިން، ބޮޑެތި މީހުންނާ ވަކިން ބައިތިއްބައިގެން މަސްތުވާތަކެތީގެ ނުރައްކަލުން އެކުދިން ސަލާމަތްކުރުމަށް ފަރުވާދިނުމުގެ ގޮތުން ހަދަންޖެހޭ ކުޑަކުދިންނަށް ޚާއްސަ ޑްރަގް ޓްރީޓްމަންޓް އެންޑް ރިހެބިލިޓޭޝަން މަރުކަޒު ގާއިމުކުރެވިފައި ނުވާ ކަމަށެވެ.
މި މައްސަލަ ދިރާސާ ކުރުމުގައި ކޮމިޓީން ވަނީ ޖެންޑަރ މިނިސްޓްރީ އާއި އެންޑީއޭގެ އިތުރުން މަދަނީ ދެ ޖަމިއްޔާ ކަމަށްވާ ހޭންޑްސް ޓުގެދަރ އަދި ޗޭންޖްގެ އިސް ބޭފުޅުންނާ ބައްދަލުކޮށް މައުލޫމާތު ސާފުކޮށްފައެވެ. ވަރަށް ފުޅާ ދާއިރާއެއްގައި މައްސަލަ ދިރާސާ ކުރުމަށްފަހު ކޮމިޓީން ވަނީ 33 ކަމެއް ހުށަހަޅާފައެވެ.
އެގޮތުން މަސްތުވާތަކެތި ބޭނުންކުރާ ފަރާތްތަކަށް ދެވޭ ފަރުވާގެ ރިލެޕްސް ރޭޓް ބަލައި ފަރުވާގެ ޕްރޮގްރާމްތަކުގެ އަސަރު ދެނެގަނެގަތުމާއި، އެފަރާތްތަކަށް ދެވޭ ފަރުވާއަކީ ކެޓަގަރައިޒް ކުރެވިގެން ދެވޭ ފަރުވާއެއްކަމުގައި ހަދައި، މިހާރު ހިންގަމުންދާ ފަރުވާގެ ނިޒާމު ވީ އެންމެ އަވަހަކަށް ރިވިއުކުރުމަށް ވަނީ ހުށަހަޅާފައެވެ. އަދި މަސްތުވާ ތަކެއްޗާބެހޭ ގާނޫނުގެ 48 ވަނަ މާއްދާގެ (ހ) ގެ ދަށުން އެންޑީއޭއިން އުފައްދައި، ހިންގަން ޖެހޭ ޑްރަގް ރިމާންޑް ސެންޓަރު ވީ އެންމެ އަވަހަށް ގާއިމުކުރުމަށް ވަނީ ހުށަހަޅާފައެވެ.
މީގެ އިތުރުން މަސްތުވާތަކެތީގެ ޝިކާރައަކަށްވެފައިވާ ފަރާތްތަކުގެ ތެރެއިން ފަރުވާއަށް ހުކުމްކޮށް ފަރުވާ ނުލިބި އެކިއެކި ކުށްތައް ކުރުމުގެ ސަބަބުން ފަރުވާ ޓަރމިނޭޓް ކޮށްފައިވާ ފަރާތްތަކަށް އަލުން ފަރުވާ ދިނުމުގެ ގޮތުން ގާނޫނާއި ގަވާއިދުތަކަށް ގެންނަންޖެހޭ ބަދަލުތައް ގެނައުމަށް ވެސް ވަނީ ނިންމާފައެވެ. އަދި މަސްތުވާ ތަކެއްޗާބެހޭ ގާނޫނުގެ ދަށުން ނޭޝަނަލް ޑްރަގް އޭޖެންސީން އާންމުކުރަން ވާނެކަމަށް ބަޔާން ކޮށްފައިވާ ރިޕޯޓްތައް ގަވާއިދުން ޝާއިއުކުރުމަށް އެންގުމަށް ވެސް ނިންމާފައިވެެއެވެ.
