އަންހެނުންނާއި ކުޑަކުދިންނަށް ޚާއްސަ ރިހެބިލިޓޭޝަން މަރުކަޒެއް ގާއިމުކުރުމަށް ކޮމިޓީން ހުށަހަޅައިފި
29 އެޕްރީލު 2021 | ބުރާސްފަތި 07:11ފަރުވާ ނުލިބި ގިނަ ދުވަސްތަކެއް ވަންދެން ވެއިޓިންގ ލިސްޓުގައި 400ށް ވުރެ ގިނަ މީހުން އެބަތިބި
ހިއުމަން ރައިޓްސް އެންޑް ޖެންޑާ ކޮމެޓީގެ ބައްދަލުވުމުގެ ތެރެއިން ކޮމިޓީގެ މުގައްރިރު، ހިންނަވަރު ދާއިރާގެ މެންބަރު ޖީހާން މަހުމޫދު ވާހަކަ ދައްކަވަނީ
އަންހެނުންނާއި ކުޑަކުދިންނަށް ޚާއްސަ ޑްރަގް ޓްރީޓްމަންޓް އެންޑް ރިހެބިލިޓޭޝަން މަރުކަޒެއް ގާއިމުކުރުމަށް ހިއުމަން ރައިޓްސް އެންޑް ޖެންޑާ ކޮމެޓީން ހުށަހަޅައިފިއެވެ.
ނޭޝަނަލް ޑްރަގް އޭޖެންސީ (އެންޑީއޭ) ގެ ގާނޫނީ ޒިންމާ އަދާކުރަމުންނުދާކަމަށް ބަޔާންކޮށް ހުށަހަޅާފައިވާ މައްސަލަ ހިއުމަން ރައިޓްސް އެންޑް ޖެންޑަރ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ބުނީ އެކިއެކި ސަބަބުތަކާ ގުޅިގެން ފަރުވާ ނުލިބި ގިނަ ދުވަސްތަކެއް ވަންދެން ވެއިޓިންގ ލިސްޓުގައި 400ށް ވުރެ ގިނަ މީހުން އެބަތިބި ކަމަށެވެ. އަދި އެފަރާތްތަކުގެ ހާލަތު ރިވިއުކޮށް ކޮމިއުނިޓީ ބޭސްޑް ފަރުވާއަކަށް ބަދަލުވުމުގެ ފުރުސަތު ފަހިކޮށްދޭން ޖެހޭ ކަމަށެވެ.
އަދި މަސްތުވާ ތަކެއްޗާބެހޭ ގާނޫނުގެ ގެ 47 ވަނަ މާއްދާގެ (ހ) ގެ (3) ވަނަ ނަންބަރުގެ ދަށުން މަސްތުވާތަކެތީގެ ޝިކާރައަކަށްވާ 18 އަހަރުން ދަށުގެ ކުދިން، ބޮޑެތި މީހުންނާ ވަކިން ބައިތިއްބައިގެން މަސްތުވާތަކެތީގެ ނުރައްކަލުން އެކުދިން ސަލާމަތްކުރުމަށް ފަރުވާދިނުމުގެ ގޮތުން ހަދަންޖެހޭ ކުޑަކުދިންނަށް ޚާއްސަ ޑްރަގް ޓްރީޓްމަންޓް އެންޑް ރިހެބިލިޓޭޝަން މަރުކަޒު ގާއިމުކުރެވިފައި ނުވާ ކަމަށެވެ.
މި މައްސަލަ ދިރާސާ ކުރުމުގައި ކޮމިޓީން ވަނީ ޖެންޑަރ މިނިސްޓްރީ، އެންޑީއޭގެ އިތުރުން މަދަނީ ދެ ޖަމިއްޔާ ކަމަށްވާ ހޭންޑްސްޓުގެދަރ އަދި ޗޭންޖްގެ އިސް ބޭފުޅުންނާ ބައްދަލުކޮށް މައުލޫމާތު ސާފުކޮށްފައެވެ. ވަރަށް ފުޅާ ދާއިރާއެއްގައި މައްސަލަ ދިރާސާ ކުރުމަށްފަހު ކޮމިޓީން ވަނީ 33 ކަމެއް ހުށަހަޅާފައެވެ.
އެގޮތުން މަސްތުވާތަކެތި ބޭނުންކުރާ ފަރާތްތަކަށް ދެވޭ ފަރުވާގެ ރިލެޕްސް ރޭޓް ބަލައި ފަރުވާގެ ޕްރޮގްރާމްތަކުގެ އަސަރު ދެނެގަނެގަތުމާއި، އެފަރާތްތަކަށް ދެވޭ ފަރުވާއަކީ ކެޓަގަރައިޒް ކުރެވިގެން ދެވޭ ފަރުވާއެއްކަމުގައި ހަދައި، މިހާރު ހިންގަމުންދާ ފަރުވާގެ ނިޒާމު ވީ އެންމެ އަވަހަކަށް ރިވިއުކުރުމަށް ވަނީ ހުށަހަޅާފައެވެ. އަދި މަސްތުވާ ތަކެއްޗާބެހޭ ގާނޫނުގެ 48 ވަނަ މާއްދާގެ (ހ) ގެ ދަށުން އެންޑީއޭން އުފައްދައި، ހިންގަން ޖެހޭ ޑްރަގް ރިމާންޑް ސެންޓަރު ވީ އެންމެ އަވަހަށް ގާއިމުކުރުމަށް ވަނީ ހުށަހަޅާފައެވެ.
މީގެ އިތުރުން މަސްތުވާތަކެތީގެ ޝިކާރައަކަށްވެފައިވާ ފަރާތްތަކުގެ ތެރެއިން ފަރުވާއަށް ހުކުމްކޮށް ފަރުވާ ނުލިބި އެކިއެކި ކުށްތައް ކުރުމުގެ ސަބަބުން ފަރުވާ ޓަރމިނޭޓް ކޮށްފައިވާ ފަރާތްތަކަށް އަލުން ފަރުވާ ދިނުމުގެ ގޮތުން ގާނޫނާއި ގަވާއިދުތަކަށް ގެންނަންޖެހޭ ބަދަލުތައް ގެނައުމަށް ވެސް ވަނީ ނިންމާފައެވެ. އަދި މަސްތުވާ ތަކެއްޗާބެހޭ ގާނޫނުގެ ދަށުން ނޭޝަނަލް ޑްރަގް އޭޖެންސީން އާންމުކުރަން ވާނެކަމަށް އެ ބަޔާން ކޮށްފައިވާ ރިޕޯޓްތައް ގަވާއިދުން ޝާއިއުކުރުމަށް އެންގުމަށް ވެސް ނިންމާފައިވެެއެވެ.
