އިންޑިއާއިން ރާއްޖެ އަންނަ ފަތުރުވެރިން ގެސްޓް ހައުސްތަކާއި ސިޓީހޮޓާ ތަކަށް ޗެކްއިންވުން މަނާކޮށްފި
ރާއްޖެ އަންނަ ދިވެހީންނާއި ވޯކް ޕާމިޓް ހޯލްޑަރުން ރާއްޖެ އައުމަށްފަހު 10 ދުވަހުގެ މުއްދަތަށް ކަރަންޓީން ވާންޖެހޭ
ފަތުރުވެރިން
ޓްރާންސިޓްގައި 24 ގަޑިއިރަށްވުރެ ގިނައިރު އިންޑިއާގައި ހޭދަކޮށްފައިވާ ފަތުރުވެރިން ހިމެނޭ ގޮތަށް، އިންޑިއާއިން ރާއްޖެ އަންނަ ފަތުރުވެރިން ގެސްޓްހައުސްތަކާއި ސިޓީހޮޓާތަކަށް ޗެކްއިންވުން މަނާކޮށްފިއެވެ.
މިހާރު ދުނިޔެއިން ކޮވިޑްގެ ހާލަތު އެންމެ ގޯސްވެފައިވާ އަވައްޓެރި އިންޑިއާއިން ރާއްޖެއަށް ދަތުރުކުރުމުގައި ޚާއްސަ ފިޔަވަޅުތަކެއް އެޅުމަށް، އާންމު ސިއްހަތު ރައްކާތެރިކުރުމުގެ ގާނޫނުގެ 34 ވަނަ މާއްދާގެ ދަށުން، ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ވަނީ އެންގެވުމެއް ނެރުއްވާފައެވެ.
އެގޮތުން 27 އޭޕްރީލް އިންފެށިގެން ދިވެހިރާއްޖޭގެ ހުރިހާގެސްޓް ހައުސްތަކާއި، މީހުން ދިރިއުޅޭ ތަންތަނާއި މުޅިން ވަކިން ހުންނަ ސިޓީ ހޮޓާތައް ފިޔަވައި ސިޓީ ހޮޓާތަކަށް ޗެކްއިންވުން ހުއްޓާލުމަށް އަންގަވާފައިވެއެވެ. އެހެން ނަމަވެސް، މިހާރު މި ފަދަ ތަންތަނުގައި ޗެކްއިން ވެފައި ތިބި އިންޑިއާއިން ދަތުރުކޮށްފައިވާ ފަތުރުވެރިންނަށް، އެމީހުން ބުކިން ހަދާފައިވާ މުއްދަތައް އެތަންތަނުގައި ތިބުމަށް އެއްވެސް ހުރަހެއް ނެތް ކަމަށް އެންގެވުމުގައި ވެއެވެ.
އިންޑިއާއިން ރާއްޖެއަށް ދަތުރުކުރުމުގައި އަޅަން ނިންމާފައިވާ ޚާއްސަ ފިޔަވަޅުތަކުގެ ދަށުން، 27 އޭޕްރީލުން ފެށިގެން، ޓްރާންސިޓްކޮށް 24 ގަޑިއިރަށްވުރެ ގިނައިރު އިންޑިއާގައި ހޭދަކޮށްފައިވާ ފަރާތްތައް ހިމެނޭނެހެން، އިންޑިއާއިން ދިވެހި ރާއްޖެއަށް ދަތުރުކުރާ މީހުންނާއި، ފަތުރުވެރިންނާއި، އިންޑިއާގައި ދިރިއުޅެފައިވާ މީހުން ރާއްޖެ އެތެރެވާއިރު ދަތުރު ކުރަންޖެހެނީ 96 ގަޑިއިރު ނުވާ ނެގެޓިވް ޕީސީއާރް ޓެސްޓް ނަތީޖާއަކާ އެކުގައެވެ. މީގެ ތެރޭގައި ކޮވިޑް ވެކްސިންގެ ދެ ޑޯޒް ފުރިހަމަކޮށްފައިވާ މީހުން ވެސް ހިމެނެއެވެ.
ޑިރެކްޓަރ ޖެނެރަލްގެ އެންގެވުމުގެ ދަށުން، ވެކްސިންގެ ދެޑޯޒް ފުރިހަމަކޮށްފައިވާ މީހުން ހިމެނޭނެހެން އިންޑިއާއިން ރާއްޖެ އަންނަ ދިވެހީންނާއި ވޯކް ޕާމިޓް ހޯލްޑަރުން ރާއްޖެ އައުމަށްފަހު 24 ގަޑިއިރުގެ ތެރޭގައި ޕީސީއާރް ޓެސްޓެއް ހަދަން ޖެހެއެވެ. އަދި 10 ދުވަހުގެ ،މުއްދަތަށް ކަރަންޓީނު ވާންޖެހެއެވެ. މިގޮތުގެ މަތިން ކަރަންޓީންވާ މީހުން ކަރަންޓީނުން ދޫކޮށްލުމަށް ހަމަޖެހިފައިވަނީ ޕީސީއާރް ޓެސްޓް ހެދުމަށްފަހު ނެގެޓިވް ނަތީޖާއެއް ލިބިއްޖެ ނަމައެވެ. އެހެންނަމަވެސް އޭގެ ތެރޭގައި އެއް އަހަރުން ދަށުގެ ކުޑަކުދިންނެއް ނުހިމެނެއެވެ.
މި ފިޔަވަޅުތައް އެޅުމަށް ހަމަޖައްސާފައިވި ނަމަވެސް، ބައެއް ޚާއްސަ ހާލަތްތަކުގައި ޑިރެކްޓަރ ޖެނެރަލް އޮފް ޕަބްލިކް ހެލްތު ކަނޑައަޅުއްވާ ގޮތެއްގެ މަތިން އަމަލު ކުރެވޭނެ ކަމަށް ނިންމަވާފައިވެއެވެ. އަދި އެޅިފައިވާ ފިޔަވަޅުތައް ތަންފީޒުކުރުމަށް އަޅަންޖެހޭ ފިޔަވަޅުތައް، ވަގުތާއި ހާލަތަށް ރިއާޔަތްކޮށް، ފުލުހުންނާ ކަމާބެހޭ މުއައްސަސާތަކުން ކުރަމުން ގެންދާނެ ކަމަށް ޑިރެކްޓަރ ޖެނެރަލްގެ އެންގެވުމުގައި ބަޔާންކޮށްފައިވެއެވެ.
އިންޑިއާއިން ރާއްޖެ އަންނަ މީހުން ކޮވިޑް-19ގެ ވެކްސިން ފުރިހަމަކޮށްފައިވީނަމަވެސް ކަރަންޓީން ވާންޖެހޭގޮތަށް ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން ވެސް ވަނީ ކަނޑައަޅާފައެވެ.
އޭޕްރީލް މަހުގެ ދެ ވަނަ ދުވަހުން ފެށިގެން އެ ގައުމުގެ ހާލަތު ވަނީ ވަރަށް ބޮޑަށް ގޯސްވެފައެވެ. އެގައުމުން ވެތިވެދިޔަ 24 ގަޑިއިރުތެރޭ 3,46,786 މީހުން ޕޮޒިޓިވް ވެފައިވާއިރު 2,624 މީހުން ބަލީގައި މަރުވެފައިވެއެވެ. އެއާއެކު އެގައުމުގައި އެކްޓިވް ކޭސްތަކުގެ އަދަދު މިހާރު ހުރީ 25 ލައްކައަށްވުރެ މަތީގައެވެ.
