ޕެންޝަން ގާނޫނަށް އިސްލާހު ގެނައުމުގެ ބިލު އަނބުރާ ނަގައިފި
25 އެޕްރީލު 2021 | އާދީއްތަ 09:14ބިލު އަނބުރާ ނަގަން ބޭނުންވާ ކަމަށް ވިދާޅުވެ މަޖިލީހުގެ ރައީސަށް ސިޓީއެއް ވަނީ ފޮނުއްވާފައި
ބިލު ސަރުކާރުގެ ފަރާތުން ހުށައަޅުއްވާފައި ވަނީ ތޮއްޑޫ ދާއިރާގެ މެންބަރު ހަސަން ޝިޔާން | ރައްޔިތުންގެ މަޖިލިސް
އަސާސީ ޕެންޝަން ލިބޭ މީހަކު ދައުލަތު ވަޒީފާގައި ހުންނަ މުއްދަތުގައި ޕެންޝަން ނުލިބޭ ގޮތަށް ގާނޫނަށް އިސްލާހު ގެނައުމަށް ހުށައަޅާފައިވާ ބިލު އަނބުރާ ނަގައިފިއެވެ.
ޕެންޝަން ގާނޫނަށް އިސްލާހު ގެނައުމުގެ ބިލު ސަރުކާރުގެ ފަރާތުން ހުށައަޅުއްވާފައި ވަނީ ތޮއްޑޫ ދާއިރާގެ މެންބަރު ހަސަން ޝިޔާނެވެ. ބިލު އަނބުރާ ގެންދަވަން ބޭނުންވާ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް މެންބަރު ވަނީ ސިޓީއެއް ފޮނުވާފައެވެ. ނަމަވެސް މި ސިޓީގައި ބިލު އަނބުރާ ގެންދެވި ސަބަބު ހާމައެއް ނުކުރައްވައެވެ.
ބިލު ހުށައަޅުއްވަމުން މެންބަރު ވިދާޅުވީ ސަރުކާރުގެ ފަރާތުން މި ބިލު ހުށައެޅުމުގެ ބޭނުމަކީ ދައުލަތުގެ ފައިސާ ޚަރަދުކުރުމުގައި ޒިންމާދާރު ގޮތެއްގައި ދައުލަތާއި މުޖުތަމައަށް އެންމެ ފައިދާ ހުރިގޮތަކަށް ޚަރަދުކުރުމުގެ އިންތިޒާމް ހަމަޖެއްސުމަށް ކަމަށެވެ. އަދި މުވައްޒަފުން ވަޒީފާއިން ވަކިވުމުން ދޭ ޕެންޝަނާއި އެހެނިހެން އިނާޔަތްތަކުގެ ކަންކަން ދައުލަތުގެ ބަޖެޓުން ދެމެހެއްޓެނިވި ގޮތަކަށް ކުރުމަށްޓަކައި ކަމަށެވެ.
މެންބަރު ވިދާޅުވީ މި ގާނޫނުގެ ސަބަބުން ދައުލަތުގެ ބަޖެޓުން ޕެންޝަނަށް ކުރާ ޚަރަދުން ސޭވިންގްސް ލިބޭނެ ކަމަށެވެ. ނަމަވެސް ސޭވިންގްސް ގެ ސީދާ އަދަދު ބިނާވެގެން ދާނީ މި ގާނޫނުން ލިބިދޭ ބާރުތަކާއެކު ދައުލަތުގެ އެހެނިހެން ޕެންޝަންތައް ދެވޭނެ ގޮތާއި މިންވަރާ ގުޅޭ ގޮތުން ދައުލަތުން ކަނޑައަޅާ ސިޔާސަތުގެ މައްޗަށް ކަމަށެވެ. މިވަގުތުގެ އަންދާޒާ އަކީ 10 އަހަރުގެ މުއްދަތަކަށް 1.5 ބިލިއަން ރުފިޔާގެ ސޭވިންގްސް ލިބުން ކަމަށް ވިދާޅުވިއެވެ. އަދި މި 10 އަހަރުގެ ފަހުން ވެސް މީގެ ފައިދާ ސޭވިންގްސް ގޮތުގައި ދައުލަތަށް ލިބެމުން ދާނެ ކަމަށެވެ.
