އެމްއެމްޕީއާރުސީ މައްސަލާގައި ހިމެނޭ މީހުންނާއި ޖިނާއީ ބޮޑެތި ކުށްކޮށްފައި ތިބި މީހުންނަށް އެމްޑީޕީގެ އިންތިހާބުގައި ވާދަ ނުކުރެވޭނެ

އެމްއެމްޕީއާރުސީގެ ޚިޔާނާތާއި ގުޅިގެން އެންޓި ކޮރަޕްޝަން ކޮމިޝަނުން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާ މީހުންނަށް އެމްޑީޕީގެ ދާއިރާތަކުގެ އިންތިޚާބުގައި ވާދަނުކުރެވޭ ގޮތަށް އެ ޕާޓީގެ ގައުމީ ހިންގާ ކޮމިޓީން ފާސްކޮށްފިއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުވެސް ބައިވެރިވެވަޑައިގެންނެވި އެމްޑީޕީ ގައުމީ ހިންގާ ކޮމިޓީގެ ބައްދަލުވުމުގައި އިންތިޚާބުގެ އެކިއެކި މަގާމުތަކަށް ކުރިމަތިލާ ފަރާތްތަކުގައި ހުންނަންވާ ޝަރުތުތަކެއް ކަނޑައަޅާ ގަރާރު ހުށަހެޅުއްވީ މާފަންނު މެދު ދާއިރާގެ މެމްބަރު މެމްބަރު އިބްރާހިމް ރަޝީދު (ބޮންޑޭ) އެވެ.

Advertisement

އިބްރާހީމް ރަޝީދު ހުށަހެޅުއްވި މިގަރާރުގައި ދެން ހިމަނާފައިވަނީ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ އާއި ޕްރެޒިޑެންޝަލް ކޮމިޝަން އޮން ޑެތްސް އެންޑް ޑިސްއެޕިއަރެންސް ގެ ނަމުގައި ރައީސުލްޖުމްހޫރިއްޔާ އުފައްދަވާފައިވާ ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިވާ ކަމަށް ބަޔާންކޮށްފައިވާ މީހުންނެވެ.

މީގެއިތުރުން ޖިނާއީ އިޖުރާޢަތުގެ ޤާނޫނުގައި ބަޔާންކުރާ ޖިނާއީ ބޮޑެތި ކުށްތަކުގެ ތެރެއިން މީހަކު މެރުމާއި، ރޭޕްކުރުމުގެ ކުށާއި ކުޑަކުދިންނަށް ޖިންސީ ގޯނާކުރުމުގެ ކުށް ކޮށްފައިވާ މީހުންނަށްވެސް އެމްޑީޕީގެ ދާއިރާތަކުގެ އިންތިޚާބުގައި ވާދަނުކުރެވޭނެއެވެ. މިކުށްތަކުގެ ތުހުމަތު ކުރެވި، ދައުވާ ކުރުމަށް ފޮނުވާފައިވާ ފަރާތްތަކަށާއި އެފަދަ ކުށްތައް ތަންފީޒުކުރަމުންދާ ފަރާތްތަކަށާއި އެފަދަ ކުށެއްގެ ހުކުމް ތަންފީޒުކޮށް ނިމުމަށްފަހު ފަސް އަހަރުވެފައިނުވާ މީހުންނަށް އިންތިޚާބުގައި ވާދަނުކުރެވޭ ގޮތަށް ވަނީ ނިންމާފައެވެ.

އެފަދަ ކަމެއް ނާންގާހުރެ މަގާމަކަށް ކުރިމަތިލައި ހޮވުނު ކަމުގައިވީނަމަވެސް އެފަދަ ކަމެއް އެނގޭ ހިސާބުން އެކެންޑިޑޭޓަކު އިންތިޚާބުވެފައިވާ މަގާމުން ވަކިވާނެކަމަށް މިގަރާރުގައި ބުނެފައިވެއެވެ.

އެންޑީޕީގެ އެތެރޭގެ އިންތިހާބު ބާއްވަން ތާވަލްކޮށްފައި ވަނީ އަންނަ މެއި މަހުގެ 29 ވަނަ ދުވަހުއެވެ. މިއިންތިޚާބަށް ކުރިމަތިލުމުގެ ފުރުސަތު ހުޅުވާލާފައިވަނީ ހޮނިހިރު ދުވަހުއެވެ.