ދިރާގު ދިވެހި ޕްރިމިއާ ލީގުގައި ހުކުރު ދުވަހުގެރޭ ދަ ގްރާންޑޭ ސްޕޯޓްސް ކުލަބު ބަލިކޮށް ތާވަލުގެ ފަސްވަނައަށް ސުޕަ ޔުނައިޓެޑް ސްޕޯޓްސް (ސަސް) ޖެހިލައިފިއެވެ.
ގައުމީ ފުޓްބޯޅަ ދަނޑުގައި ކުޅުނު މެޗުން ސަސް މޮޅުވީ 2-1 ގެ ނަތީޖާއަކުންނެވެ.
މެޗުގެ ފުރަތަމަ ހާފުގައި ސަސްއިން މޮޅު ކުޅުމެއް ދެއްކިއިރު،، މި ހާފުގެ ކުރީކޮޅު އެ ޓީމުން ވަނީ ދަ ގްރާންޑޭގެ ގޯލަށް ނުރައްކާކޮށް، ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 25 ވަނަ މިނެޓުގައި ސަސްގެ މުޙައްމަދު އަޖުނާނީ ފޮނުވާލި ހަމަލާއެއް ގޯލުގެ އަރިމަތީ ދަނޑިއަށް އަމާޒުވިއިރު، އޭގެ ކުޑަ އިރުކޮޅެއް ފަހުން ސަސްގެ އަޙްމަދު ނަޝާހު (ނައްޓު) ފޮނުވާލި ހަމަލާ ދަ ގްރާންޑޭގެ ކީޕަރު އިޔާން އަބްދުލް އަލީމް ވަނީ ހުށިޔާރުކަމާއެކު ދިފާއުކޮށްފައެވެ.
އޭގެ ފަހުން މެޗުގެ 31 ވަނަ މިނެޓުގައި ސަސްއިން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ ނައްޓުއެވެ. އަދި ދެވަނަ ހާފު ފަށައިގެން ތިންވަނަ މިނެޓުގައި މުޙައްމަދު ރަޝީދު (ހޮކޭ) ވަނީ ސަސްއަށް ލީޑު ފުޅާކޮށްދީފައެވެ. ނަމަވެސް މެޗުގެ 57 ވަނަ މިނެޓުގައި ދަ ގްރާންޑޭއިން ފަރަގު ކުޑަކުރިއިރު، ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޔަސްފާދު ހަބީބް (މުލަކޭ) އެވެ. މިއީ އޭރިއާ ތެރެއިން ސަސްގެ ކެޕްޓަން އަބްދުﷲ ހަނީފް (ބެންޖޯ) ގެ އަތުގައި ބޯޅަ ޖެހުމާ ގުޅިގެން ރެފުރީ ދިން ޕެނަލްޓީއެކެވެ.
މެޗަށްފަހު ވާހަކަދައްކަމުން ސަސްގެ ކޯޗު މުހައްމަދު ޝިޔާޒް (މޯހަން) ބުނީ ި މެޗު ފެށީ ވަރަށް ބޮޑު ޕްރެޝަރެއްގައި އޮވެގެން ކަމަށާއި، އެކަމަކު މެޗުން މޮޅުވީ ކުޅުންތެރިން ކުރި ބުރަ މަސައްކަތުން ކަމަށެވެ. އަދި ދެވަނަ ބުރު މޮޅަކާއެކު ނިންމާލަން ޖެހުމަކީ ލިބުނު ހިތްހަމަޖެހުމެއް ކަމަށްވެސް މޯހަން ބުންޏެވެ.
ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ މެޗުން ބަލިވެ، ގެއްލިގެން ދިޔައީ މުހިންމު ތިން ޕޮއިންޓް ކަމަށާއި، އެކަމަކު މެޗުގައި ކުޅުންތެރިންގެ ފަރާތުން ފެނިގެންދިޔަ ކުޅުމާ މެދު ހިތްހަމަޖެހޭ ކަމަށެވެ. އަދި މެޗުގައި ލަނޑު ޖަހަން ފުރުސަތުތަކެއްވެސް ލިބިގެންދިޔަ ކަމަށާއި، އެކަމަކު ނިންމާލުމުގައި މައްސަލަތަކެއް އުޅޭ ކަމަށްވެސް އިންމަ ބުންޏެވެ.
މި މޮޅާއެކު ތާވަލުގެ ފަސްވަނައަށް ސަސް ޖެހިލިއިރު، އެ ޓީމަށް ކުޅުނު 14 މެޗުން ވަނީ 15 ޕޮއިންޓް ލިބިފައެވެ. އަދި މެޗުން ބަލިވި ދަ ގްރާންޑޭ ތާވަލުގެ ހަތަރުވަނައިގައި އޮތީ ކުޅުނު 14 މެޗުން ލިބުނު 16 ޕޮއިންޓާއެކުއެވެ.
