ސްކައިފޯލް ރެސްޓޯރަންޓް- ހާމަ އުޑާއި، ވަށައިގެންވާ މޫދު އަދި ރާޅުގެ އަޑާއެކު

ބޮޑުތަކުރުފާނު މަގު ބްރިޖް ވިއު ސަރަޙައްދުގައި އަލަށް ހުޅުވި ސްކައިފޯލް ރެސްޓޯރަންޓް އެންޑް ލައުންޖްއަށް ގިނަ ބައެއްގެ ސަމާލުކަން ދަނީ ލިބެމުންނެވެ. މީގެ 4 ވަރަކަށް އަހަރު ކުރިން މި ރެސްޓޯރަންޓުގެ އަމަލީ މަސައްކަތް ފަށައި، ކޮވިޑުގެ މި ޙާލަތުގައި ގިނަ ގޮންޖެހުންތަކަކާއެކުވެސް އެންމެ ފަހުން މިއަހަރުގެ ރަމަޟާން މަހުގެ 1 ވަނަ ދުވަހު ސްކައިފޯލް ރަސްމީކޮށް މިވަނީ ހުޅުވާފައެވެ. މި ރެސްޓޯރަންޓަކީ ކަސްޓަމަރުންނަށް ތަފާތު ތަޖުރިބާއެއް ކޮށްލުމުގެ މަގުފަހިކޮށްދިނުމުގެ އަޒުމުގައި ތަފާތު ފީޗަރތަކާއެކު ހުޅުވާފައިވާ ރެސްޓޯރަންޓެކެވެ.

ސްކައިފޯލް ރެސްޓޯރަންޓުގެ ލައުންޖް ޑިޒައިންކޮށްފައިވަނީ ވިޔަފާރި ބައްދަލުވުންތަކާއި، ކަޕްލްސް ޑިނަރ އަދި އެކި ކަހަލަ ޙަފްލާތައް ބޭއްވޭ ގޮތަށެވެ. ކަސްޓަމަރުންނަށް "ހައި-އެންޑް" ތަޖުރިބާއެއްކޮށްލުމުގެ މަގުފަހިކުރުމަށް ލައުންޖްގައި ގިނަ ކަންކަން ވަނީ ބައްޓަންކުރެވިފައެވެ. ލައުންޖްގެ ޚާއްސަ އެއްކަމަކީ ދިވެހި ފަންނާނުންގެ ހުނަރުތަކަށްވެސް ޚާއްސަ އިސްކަމެއް ދީފައިވުމެވެ. އެގޮތުން މަޝްހޫރު ކުރެހުންތެރިޔާ ޝާހީންގެ ކުރެހުމަކުން ލައުންޖް ފަޅުފިލުވާލާފައިވާއިރު، މިއީ ޒުވާނުންގެ ހުނަރުތަކަށް ޖާގަ ދިނުމަށް ރެސްޓޯރަންޓުގެ މެނޭޖްމަންޓުން ގެންގުޅޭ ވިސްނުމުގެ ނަތީޖާކަމަށް ރާއްޖެއެމްވީއަށް މައުލޫމާތު ދެއްވަމުން ރެސްޓޯރަންޓުގެ ޖެނެރަލް މެނޭޖަރ ނާއިލް ހާޝިމް ވިދާޅުވިއެވެ.

ލައުންޖްގެ އިތުރުން ސްކައިފޯލްގެ ޑެކް އޭރިއާއަކީވެސް ކަސްޓަމަރުންނަށް ހިތްފަސޭހަ ތަޖުރިބާއެއް ކޮށްލެވޭނެ މަގުފަހިވެގެން ދާނެ ތަނެކެވެ. އެގޮތުން ޑެކް އޭރިއާ ބޮޑަށް ޚާއްސަ ކޮށްފައިވަނީ މި މުޅި ސަރަޙައްދުގެ މަންޒަރުތައް ބަލާލައި، ރައްޓެހިންނާއެކު ކޮފީއަކަށް އިންސާފު ކޮށްލެވޭނެ ފަދަ ގޮތަކަށެވެ. ރާޅުތަކުގެ އަޑާއެކު ވަށައިގެންވާ މޫދާއި، ބްރިޖުގެ އިތުރުން ސާފު އުޑު އެންމެ ރީތިކޮށް ފެންނާނެ އެއްތަނަކީ ސްކައިފޯލްގެ ޑެކް އޭރިއާއެވެ.

އޭގެ އިތުރުން، "ފައިންޑައިން" އާއި އޯޕަން އެއަރ ބޑައިންއަށް ޚާއްސަކޮށްވެސް މި ރެސްޓޯރަންޓުގައި ޚިދުމަތް ދިނުމަށް ވަނީ އިންތިޒާމު ކުރެވިފައެވެ. ދެ ވޯޓަރ ފޯލްއާއި، "ވޯލްކް-އިން ޕޮންޑް" އަކާއެކު ތަނުގެ އިންޓީރިއަރ ހަދާފައިވާއިރު، ކަސްޓަމަރުންގެ ފަރާތުންވެސް ލިބޭ ފީޑްބެކް ރަނގަޅުކަމަށް ނާއިލް ވިދާޅުވިއެވެ.

ރާއްޖެއެމްވީއަށް މައުލޫމާތު ދެއްވަމުން ރެސްޓޯރަންޓުގެ ޝެފް އިސްމާއިލް ވިދާޅުވީ، ރެސްޓޯރަންޓުގެ ލޮކޭޝަންގެ އިތުރުން، މެނޫ އެކުލަވާލާފައިވާ ގޮތަކީވެސް މިތަނުގެ ޚާއްސަ ސިފައެއް ކަމަށެވެ. އެގޮތުން ދިވެހިން އާންމުކޮށް ކައި އުޅޭ ޑިޝްތަކުގެ އިތުރުން، އެހެނިހެން ޤައުމުތަކުގެ ކެއުންތައްވެސް މިތަނުން ތަޖުރިބާ ކޮށްލެވޭނެއެވެ. ޚާއްސަކޮށް ރަމަޟާން ބުފޭގައިވެސް ދިވެހިންގެ ތެރޭގައި މަޤުބޫލު ކެއުންތަކުގެ އިތުރުން، ޗައިނީސް އަދި އިންޑިއަން ޑިޝްވެސް ލިބިގެންދާނެއެވެ.

މި ތަފާތު ކެއުންތަކާއެކު ކަސްޓަމަރުންގެ ފަރާތުން ލިބޭ ރަނގަޅު ފީޑްބެކްތަކަކީ އެންމެ ހިތްހަމަޖެހޭ އެއްކަންތައް ގޮތުގައި އިސްމާއިލް ސިފަ ކުރެއެވެ.

ކޮންމެއަކަސް، ހާމަ އުޑާއި، ވަށައިގެންވާ މޫދު އަދި ރާޅުގެ އަޑާއެކު ސްކައިފޯލްއިން ލިބިގެންދާ ތަޖުރިބާ ނުހަނު ތަފާތުވެފައި ހިތްފަސޭހަކަމަށް ގިނަ ބަޔަކު ބުނެއެވެ.