ދުސްތޫރީ އަސާސެއްނެތި ނިޒާމް ބަދަލު ކުރުންވާނީ ބޮޑު ގޯހަކަށް - ކަމާލުއްދީން
ރިޔާސީ ނިޒާމް ގާއިމު ކޮށްފަ އޮތީ ދުސްތޫރީ ހަމަތަކެއްގެ މަތިން
އަބްދުއްﷲ ކަމާލުއްދީން - ރިޔާސީ ނިޒާމް ގާއިމު ކޮށްފަ އޮތީ ދުސްތޫރީ ހަމަތަކެއްގެ މަތިން
ނިޒާމް ބަދަލު ކުރުމުގަ ހުރި ނުރައްކާތެރިކަނ ނުބަލާ ދުސްތޫރީ އަސާސެއްނެތި ނިޒާމް ބަދަލު ކުރުންވާނީ ބޮޑު ގޯހަކަށް ކަމަށް ކުރީގެ މިނިސްޓަރ ކަންކުރައްވާފައިވާ އަދި މިހާރު އެމްއާރްއެމްގައި އިސްކޮށް އުޅުއްވާ އަބްދުﷲ ކަމާލުއްދީން ވިދާޅުވެއްޖެއެވެ.
އޭނާ މިހެން ވިދާޅުވެފައިމިވާނީ ރާއްޖެގައި ވެރިކަން ކުރަމުން އަންނަ ރިޔާސީ ނިޒާމު ބަރުލަމާނީ ނިޒާމަކަށް ފުރޮޅާލުމުގެ ޝައުގުވެރިކަން ފާޅުކުރައްވާ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝިދު ރައީސް ސާލިހަށް ފޮނުއްވި މެސެޖަކާ ގުޅިގެން ކުރެއްވި ޓްވީޓެއްގައެވެ.
ކަމާލުއްދީން، ރާއްޖޭގެ ވެރިކަމުގެ ރިޔާސީ ނިޒާމް ގާއިމު ކޮށްފަ އޮތީ ދުސްތޫރީ ހަމަތަކެއްގެ މަތިން ކަމަށާއި، އަސާސެއްނެތި ނިޒާމު ބަދަލުކޮށްލުންވާނީ ބޮޑު ގޯހަކަށް ކަމަށެވެ. އަދީ މިހާރު މިއުޅެނީ ނިޒާމުގެ މައްސަލައެއް ނޫންކަމަށެވެ.
މައުމޫން ސަރުކާރުގައި ކެބިނެޓުގައި އެތައް އަހަރަކު މަސައްކަތް ކުރައްވާފައިވާ ކަމާލުއްދީން ވަނީ ޑީއާރުޕީގައި އުޅުއްވުމަށްފަހު 2012 ވަނަ އަހަރު ޖުމްހޫރީ ޕާޓީ (ޖޭޕީ) އާ ގުޅިވަޑައިގެންފަ އެވެ. އެ ޕާޓީގެ ޑެޕިއުޓީ ލީޑަރުކަން ކުރެއްވުމަށް ފަހު މައުމޫން ރިފޯމް މޫވްމަންޓް (އެމްއާރުއެމް) އަށް ގުޅިވަޑައިގަތީ 2018 ވަނައަހަރުއެވެ. ކަމާލުއްދީން ވަނީ ކުރީގެ ރައީސް އަބްދުﷲ ޔާމީންގެ ސަރުކާރާ ދެކޮޅަށް ކުރި މަސައްކަތްތަކުގައި އިސްދައުރެއް އަދާކުރައްވައިފައެވެ. އަދި 2018ވަނަ އަހަރުގެ ރިޔާސީ އިންތިޚާބުގައި ރައީސް އިބްރާހިމް މުހައްމަދު ސޯލިހަށް ކެމްޕެއިން ކުރުމަށް މައުމޫންގެ ފަރާތްޕުޅުން ރަށްރަށަށް ވެސް ވަޑައިގެންފައިވެއެވެ.
