ސުޕަރ މެޖޯރިޓީގެ މެޖޯރިޓީން ބަރުލަމާނީއަށް ބުނީ ނޫނެކޭ!
މެންބަރުންގެ ތާއީދު އޮތް ގޮތެއް ބެއްލެވުމަށް ހުށަހެޅުއްވީ ރައީސް މުހައްމަދު ނަޝީދު
އެމްޑީޕީ - ބަރުލަމާނީއަށް ތާއީދުކޮށް ލިސްޓުގައި ނަންޖެހީ ގައުމީ މަޖިލީހުގެ 60 މެމްބަރުން
އެމްޑީޕީގެ ގައުމީ މަޖިލީހުގެ މެންބަރުން ތިބޭ ވަޓްސްއަޕް ގްރޫޕްގައި ބަރުލަމާނީ ނިޒާމަކަށް ތާއީދުކޮށް އަދި ބަރުލަމާނީ ކެމްޕެއިންގައި އުޅޭނެ މީހުން ލިސްޓުކުރުމަށް ގުރޫޕަށް ހުށަހެޅި ލިސްޓުގައި އެކަމަށް ތާއީދުކޮށް ނަންޖެހީ ރައްޔިތުންގެ މަޖިލީހުގެ 23 މެމްބަރުންނެވެ. މެންބަރުންގެ ތާއީދު އޮތް ގޮތެއް ބެއްލެވުމަށް ހުށަހެޅުއްވީ ރައީސް މުހައްމަދު ނަޝީދު ކަމަށް ރާއްޖެއެމްވީއަށް ވަނީ އެނގިފައެވެ.
މަޖިލީހުގައި ތިއްބަވާ އެމްޑީޕީގެ 65 މެންބަރުންގެ ތެރެއިން ބަރުލަމާނީ ނިޒާމަކަށް ތާއީދު ކުރައްވާ ކަމަށް 23 މެމްބަރުން ވިދާޅުވިއިރު ބާކީތިބި 42 މެމްބަރުން މިކަމަށް ތާއީދެއް ނުކުރައްވައެވެ. އެމްޑީޕީގެ ޤައުމީ މަޖިލީހުގައި 142 މެމްބަރުން ތިބޭއިރު އެ ލިސްޓުގައި ނަން ޖަހާފައިވަނީ 60 މެމްބަރުންނެވެ.
ސަރުކާރު އުވާލާ ރާއްޖޭގެ ހިންގުން ބަރުލަމާނީ ނިޒާމަށް ބަދަލުކޮށް ބޮޑުވަޒީރުކަން ބޭނުންފުޅުވާ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް މެސެޖަކުން ދަންނަވާފައެވެ. ރައީސް ނަޝީދު، ރައީސް ޞާލިހަށް ފޮނުއްވެވި މެސެޖުގައި އެމަނިކުފާނު ވަނީ ވެރިކަމުގެ ނިޒާމު ބަދަލުކުރަން ޖެހޭ ކަމަށް ވިދާޅުވާ ވިދާޅުވުން ތަކުރާރު ކުރައްވާފައެވެ. އަދި އެ މަޝްވަރާތައް ކުރިއަށް ގެންދަވަން ބޭނުންފުޅުވާ ކަމަށްވެސް ވިދާޅުވިއެވެ. ނަޝީދުގެ މެސެޖުގައި އެދިވަޑައިގެންފައިވަނީ ސަރުކާރު އުވާލައްވައި، 2023 ގައި ރިޔާސީ އިންތިޚާބު ނުބޭއްވުމަށެވެ. އަދި ވެރިކަން ހިންގުމުގެ ނިޒާމު ބަރުލަމާނީ ނިޒާމަކަށް ފުރޮޅާލުމަށެވެ. އަދި ބޮޑުވަޒީރަކަށް ވެވަޑައިގަތުމުގެ ޝައުގުވެރިކަންވަނީ ފާޅުކުރައްވާފައެވެ. ރައީސް ނަޝީދުގެ މެސެޖުގައި އެމަނިކުފާނު ވަނީ ވެރިކަމުގެ ނިޒާމު ބަރުލަމާނީއަށް ބަދަލުކުރެއްވުމަށް ފެނިވަޑައިގަންނަވަނީ 2023 ވަނަ އަހަރުގެ ފެބްރުއަރީ މަހު ކަމަށް ވެސް ވިދާޅުވެފައެވެ. އަދި އޭގެ ފަހުން 2024 ވަނަ އަހަރު އޮންނަ ރައްޔިތުންގެ މަޖިލީހުގެ އިންތިޚާބާ ހަމައަށް ރައީސުލްޖުމްހޫރިއްޔާގެ މަގާމުގައި ހުންނަވާނެ ބޭފުޅަކު އެމްޑީޕީގެ ސުޕަރ މެޖޯރިޓީ އޮތް ރައްޔިތުންގެ މަޖިލީހުން ކަނޑައެޅުއްވުމަށެވެ. ނަޝީދުގެ އެ މެސެޖަށް ފަހު އެމަނިކުފާނަށް ވަފާތެރި މަޖިލީސް މެންބަރުންނާއި ޕާޓީގެ އެކްޓިވިސްޓުން ގެންދަނީ ބަރުލަމާނީ ނިޒާމެއް ގެންނަން ޖެހޭ ކަމަށް ފާޅުގައި ވިދާޅުވަމުންނެވެ.
ރައީސް ނަޝީދުގެ މެސެޖަށް ރައީސް ޞާލިހުވަނީ ޖަވާބުދެއްވާފައެވެ. ރައީސުލްޖުމްހޫރިއްޔާގެ އޮފީހުގެ ތަރުޖަމާން މުހައްމަދު މަބުރޫކް އަޒީޒް ވިދާޅުވީ ވެރިކަމުގެ ނިޒާމު ބަދަލު ކުރުމާ ގުޅޭގޮތުން ރައީސް މުހައްމަދު ނަޝީދު ކުރެއްވި މެސެޖެއް ރައީސުލްޖުމްހޫރިއްޔާއަށް ލިބިވަޑައިގެންފައިވާ ކަމަށެވެ. "މިހާރު އަމަލު ކުރަމުންދާ ވެރިކަމުގެ ނިޒާމަކީ ރައްޔިތުންގެ ސީދާ ވޯޓަކުން އަމަލު ކުރުމަށް ނިންމާފައިވާ ގޮތެއް ކަމަށްވާތީ މިކަމަށް ބަދަލެއް ގެނެވޭނީ ވެސް އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ ދެކެވަޑައިގަންނަވާ" މަބުރޫކް ވިދާޅުވިއެވެ.
