އަސާސީ ޕެންޝަން ލިބޭ މީހަކު ދައުލަތު ވަޒީފާގައި ހުންނަ މުއްދަތުގައި ޕެންޝަން ނުލިބޭ ގޮތަށް ހުށައަޅައިފި
21 އެޕްރީލު 2021 | ބުދަ 10:29މި އިސްލާހާއެކު ދައުލަތުގެ އެހެނިހެން ޕެންޝަނުގެ ފައިސާ އިދާރީގޮތުން ފޯރުކޮށްދެވޭނެ
ތޮއްޑޫ ދާއިރާގެ މެންބަރު ހަސަން ޝިޔާން
އަސާސީ ޕެންޝަން ލިބޭ މީހަކު ދައުލަތު ވަޒީފާގައި ހުންނަ މުއްދަތުގައި ޕެންޝަން ނުލިބޭ ގޮތަށް ގާނޫނަށް އިސްލާހު ގެނައުމަށް ހުށައަޅާފައިވާ ބިލުގެ ބަހުސް ރައްޔިތުންގެ މަޖިލީހުން ފަށައިފިއެވެ.
ބުދަ ދުވަހު ރައްޔިތުންގެ މަޖިލީހުގެ ޖަލްސާގައި ދިވެހިރާއްޖޭގެ ޕެންޝަނާބެހޭ ގާނޫނަށް އިސްލާހު ގެނައުމުގެ ބިލު ސަރުކާރުގެ ފަރާތުން ހުށައަޅުއްވާފައި ވަނީ ތޮއްޑޫ ދާއިރާގެ މެންބަރު ހަސަން ޝިޔާނެވެ.
ބިލު ހުށައަޅުއްވަމުން މެންބަރު ވިދާޅުވީ ސަރުކާރުގެ ފަރާތުން މި ބިލު ހުށައެޅުމުގެ ބޭނުމަކީ ދައުލަތުގެ ފައިސާ ޚަރަދުކުރުމުގައި ޒިންމާދާރު ގޮތެއްގައި ދައުލަތާއި މުޖުތަމައަށް އެންމެ ފައިދާ ހުރިގޮތަކަށް ޚަރަދުކުރުމުގެ އިންތިޒާމް ހަމަޖެއްސުމަށް ކަމަށެވެ. އަދި މުވައްޒަފުން ވަޒީފާއިން ވަކިވުމުން ދޭ ޕެންޝަނާއި އެހެނިހެން އިނާޔަތްތަކުގެ ކަންކަން ދައުލަތުގެ ބަޖެޓުން ދެމެހެއްޓެނިވި ގޮތަކަށް ކުރުމަށްޓަކައި ކަމަށެވެ.
މި އިސްލާހާއެކު ދައުލަތުގެ އެހެނިހެން ޕެންޝަނުގެ ފައިސާ އިދާރީ ގޮތުން ފޯރުކޮށްދޭ ފަރާތެއްގެ ގޮތުގައި ޕެންޝަން އޮފީސް ހަމަޖެހިގެން ދާނެއެވެ. އަދި އެހެނިހެން ޕެންޝަން ފޯރުކޮށްދިނުމަށް ބޭނުންވާ ފައިސާ ފިނޭންސް މިނިސްޓްރީން ޕެންޝަން އޮފީހަށް ފޯރުކޮށްދޭނެ އިންތިޒާމު ހަމަޖެއްސުމަށް ވެސް ކަނޑައެޅިގެން ދާނެއެވެ.
މެންބަރު ވިދާޅުވީ މި ގާނޫނުގެ ސަބަބުން ދައުލަތުގެ ބަޖެޓުން ޕެންޝަނަށް ކުރާ ޚަރަދުން ސޭވިންގްސް ލިބޭނެ ކަމަށެވެ. ނަމަވެސް ސޭވިންގްސް ގެ ސީދާ އަދަދު ބިނާވެގެން ދާނީ މި ގާނޫނުން ލިބިދޭ ބާރުތަކާއެކު ދައުލަތުގެ އެހެނިހެން ޕެންޝަންތައް ދެވޭނެ ގޮތާއި މިންވަރާ ގުޅޭ ގޮތުން ދައުލަތުން ކަނޑައަޅާ ސިޔާސަތުގެ މައްޗަށް ކަމަށެވެ. މިވަގުތުގެ އަންދާޒާ އަކީ 10 އަހަރުގެ މުއްދަތަކަށް 1.5 ބިލިއަން ރުފިޔާގެ ސޭވިންގްސް ލިބުން ކަމަށް ވިދާޅުވިއެވެ. އަދި މި 10 އަހަރުގެ ފަހުން ވެސް މީގެ ފައިދާ ސޭވިންގްސް ގޮތުގައި ދައުލަތަށް ލިބެމުން ދާނެ ކަމަށެވެ.
