ޖަރުމަން ލީގު ކާމިޔާބުކުރުމާ ފިޔަވަޅަކާ ގާތަށް އެންމެ ފަހުގެ ޗެމްޕިއަން ބަޔާން މިއުނިކް ޖެހިލައިފިއެވެ.
ލީގު ދިފާއުކުރުމާ ފިޔަވަޅަކާ ގާތަށް ބަޔާން ޖެހިލީ އަންގާރަ ދުވަހުގެރޭ ކުޅުނު މެޗުން ބަޔާ ލެވަކޫސެން އަތުން 2-0 ގެ ނަތީޖާއަކުން މޮޅުވެގެންނެވެ.
އަމިއްލަ ދަނޑުގައި ކުޅުނު މެޗުގައި ބަޔާނުން މޮޅު ކުޅުމެއް ދެއްކިއިރު، ބަޔާނުން ދެ ލަނޑުވެސް ޖަހާފައިވަނީ މެޗުގެ ވަރަށް ކުރީކޮޅެވެ. އެގޮތުން މެޗުގެ ހަތްވަނަ މިނެޓުގައި ބަޔާނުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ މި ފަހަކަށް އައިސް މޮޅު ކުޅުމެއް ދައްކަމުން އަންނަ އެރިކް މެކްސިމް ޗޫޕޯ-މޯޓިންނެވެ. އަދި މެޗުގެ 13 ވަނަ މިނެޓުގައި އޭރިއާ ތެރެއިން ފޮނުވާލި ބާރު ހަމަލާއަކުން ޖޯޝުއާ ކިމިޗް ވަނީ ބަޔާނަށް ލީޑު ފުޅާކޮށްދީފައެވެ.
އޭގެ ފަހުން މި މެޗުގައި ދެ ޓީމަށްވެސް ވަނީ ލަނޑު ޖަހަން ގިނަ ފުރުސަތުތަކެއް ލިބި ބޭކާރުވެފައެވެ. އަދި މެޗުގެ ދެވަނަ ހާފުގައި ޗޫޕޯ-މޯޓިން ބަޔާނަށް އިތުރު ލަނޑެއް ޖަހައިދިން ނަމަވެސް، އެ ލަނޑު ވަނީ އޮފްސައިޑް ލަނޑެއް ކަމަށް ނިންމާފައެވެ. އަދި އޭގެ އިރުކޮޅެއް ފަހުން ލަނޑެއް ޖަހަން ލެވަކޫސެނުގެ ކަރީމް ބެލަރާބީއަށް ރަނގަޅު ފުރުސަތެއް ލިބުނު ނަމަވެސް، ބަޔާނުގެ ގޯލްކީޕަރު މެނުއެލް ނޯޔާގެ އަތުގައި ޖެހުމަށްފަހު ބެލަރާބީ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.
މި މޮޅާއެކު ލީގު ކާމިޔާބުކުރުމާ ފިޔަވަޅަކާ ގާތަށް ބަޔާން މިއުނިކް ޖެހިލިއިރު، ބާކީ ހަތަރު މެޗުން ލީގު ޗެމްޕިއަންކަން ހޯދަން ބަޔާނަށް ދެން ބޭނުންވަނީ އެންމެ ތިން ޕޮއިންޓެވެ. ތާވަލުގެ އެއްވަނައިގައި ބަޔާން އޮތީ ކުޅުނު 30 މެޗުން ލިބުނު 71 ޕޮއިންޓާއެކުއެވެ. ދެވަނައިގައި އޮތް އާރްބީ ލައިޕްޒީގަށް 30 މެޗުން ލިބިފައިވަނީ 61 ޕޮއިންޓެވެ. އަދި ބަޔާން އަތުން ބަލިވި ލެވަކޫސެން އޮތީ ތާވަލުގެ ހަވަނައިގައި 30 މެޗުން 47 ޕޮއިންޓާއެކުއެވެ.