ކޮވިޑް-19ގައި ރާއްޖެއިން 71 ވަނަ މީހާ ނިޔާވެއްޖެއެވެ.

ކޮވިޑް ޖެހިގެން ނިޔާވެފައި ވަނީ 80 އަހަރުގެ ފިރިހެނެއް ކަމަށް އެޗްޕީއޭއިން ބުނެއެވެ. އެ މީހާއަކީ ހުޅުމާލޭ ހޮސްޕިޓަލުގައި ފަރުވާދެމުން ދިޔަ މީހެކެވެ. އޭނާ ނިޔާވެފައިވަނީ ހޯމަ ދުވަހުގެ ރޭ 11:25 ހާއިރުކަމަށް އެޗްޕީއޭއިން މައުލޫމާތުދެއެވެ.  

މިއީ ވޭތިވެދިޔަ ހަތަރު ދުވަސް ތެރޭގައި ރާއްޖެއިން ކޮވިޑް ބަލީގައި ނިޔާވި ހަތަރު ވަނަ މީހާއެވެ. އެގޮތުން ހުކުރު ދުވަހު މި ބަލީގައި ދެ މީހަކު ނިޔާވެފައި ވާއިރު، ހޮނިހިރު ދުވަހު ވެސް އިތުރު މީހަކު ނިޔާވެފައިވެއެވެ.

ކޮވިޑް ކޭސްތަކުގެ އަދަދު މިދިޔަ ދެ ހަފްތާގެ ތެރޭގައި މަދުވި ނަމަވެސް، ޕޮޒިޓިވް ވާ މީހުންގެ އަދަދު މިހާރު ވަނީ އިތުރުވެފައެވެ. އެގޮތުން ހޮނިހިރު ދުވަހު 124 މީހުން ޕޮޒިޓިވް ވެފައި ވާއިރު، އާދީއްތަ ދުވަހު 203 މީހުން ވަނީ ޕޮޒިޓިވް ވެފައެވެ.

މީގެއިތުރުން، ހޯމަ ދުވަހު ޕޮޒިޓިވްވި 157 މީހުންނާއެކު ރާއްޖޭގައި މިހާތަނަށް 26،505 މީހަކު ވަނީ ކޮވިޑަށް ޕޮޒިޓިވްވެފައެވެ. އަދި އެކްޓިވް ކޭހުގެ އަދަދު ވަނީ ބޮޑުތަނުން އިތުރު ވެފައެވެ. އެގޮތުން މިހާރު ޖުމްލަ 2735 މީހަކަށް ކޮވިޑަށް ފަރުވާދެމުން ގެންދެއެވެ. މީގެ ތެރެއިން ހޮސްޕިޓަލުގައި އެޑްމިޓްކޮށްގެން ފަރުވާދެމުން އަންނަނީ 68 މީހަކަށެވެ. މިހާތަނަށް ބަލިން ރަނގަޅުވެފައި ވަނީ 23،691 މީހުންނެވެ.