ކ. މާލެ
|
19 އޭޕްރިލް 2021 | ހޯމަ 04:55
ސުޕަ ލީގުގައި ހިމެނޭ ރެއާލާއި ލިވަޕޫލް މީގެ ކުރިން ބައްދަލުކުރި މެޗެއްގެ ތެރެއިން
ސުޕަ ލީގުގައި ހިމެނޭ ރެއާލާއި ލިވަޕޫލް މީގެ ކުރިން ބައްދަލުކުރި މެޗެއްގެ ތެރެއިން
ގެޓީ އިމޭޖަސް
ޔޫރަޕިއަން ސުޕަ ލީގު
ސުޕަ ލީގު ވުޖޫދުކޮށްފި، ޔުއެފާގެ ވަރުގަދަ އިންޒާރެއް
 
ސުޕަ ލީގުގައި ޔޫރަޕުގެ ނަން މަޝްހޫރު 12 ކުލަބެއް ހިމެނޭ
 
އެ ކުލަބުތަކަށް އެހެން އެއްވެސް މުބާރާތެއްގައި ބައިވެރިއެއްނުވެވޭނެ

ޔޫރަޕުގެ ނަން މަޝްހޫރު 12 ކުލަބު ހިމެނޭ ގޮތަށް "ޔޫރަޕިއަން ސުޕަ ލީގު" ވުޖޫދުކޮށްފިއެވެ.

އާދީއްތަ ދުވަހުގެރޭ ސުޕަ ލީގު ރަސްމީކޮށް އިޢުލާން ކުރިއިރު، މި މުބާރާތުގެ ފައުންޑާ ކުލަބުތަކުގެ ތެރޭގައި ހިމެނެނީ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި، ލިވަޕޫލާއި، ޗެލްސީ އާއި، މެންޗެސްޓާ ސިޓީ އާއި، އާސެނަލް އަދި ޓޮޓެންހަމާއި ސްޕެނިޝް ލީގުގެ ރެއާލް މެޑްރިޑާއި، ބާސެލޯނާ އަދި އެތުލެޓިކޯ މެޑްރިޑުގެ އިތުރުން އިޓާލިއަން ލީގުގެ އިންޓަ މިލާނާއި، އޭސީ މިލާން އަދި ޔުވެންޓަސްއެވެ.

މި މުބާރާތުގެ ފޯމެޓް ރާވާފައިވާ ގޮތުން މުބާރާތުގައި ޖުމްލަ 20 ޓީމެއް ވާދަކުރާނެއެވެ. އޭގެ ތެރެއިން 15 ޓީމަކީ ފައުންޑާ ކުލަބުތަކެވެ. އެގޮތުން މިހާތަނަށް 12 ކުލަބެއް ހިމެނޭއިރު، އަވަސް މުސްތަޤުބަލެއްގައި އިތުރު ތިން ކުލަބެއް ފައުންޑަ ކުލަބުތަކުގެ ލިސްޓަށް އިތުރު ވެގެންދާނެއެވެ. ދެން މި މުބާރާތުގައި ވާދަކުރާ އަނެއް ފަސް ޓީމު ކޮލިފައިވާނީ އެ ޓީމުތަކުން ހޯދާ ކާމިޔާބީތަކަށް ބެލުމަށްފަހުއެވެ.

ސުޕަ ލީގުގެ ޗެއާމަނަކީ ރެއާލް މެޑްރިޑުގެ ރައީސް ފްލޮރެންޓީނޯ ޕެރޭޒެވެ. އަދި ވައިސް ޗެއާމަނުންނަކީ ލިވަޕޫލުގެ ވެރިޔާ ޖޯން ހެންރީ އާއި މެންޗެސްޓާ ޔުނައިޓެޑުގެ ޖޯލް ގްލޭޒާއެވެ.

ސުޕަ ލީގުގެ ޚަބަރާއެކު ޔޫރަޕުގެ ބޮޑެތި ޤައުމުތަކުގެ އެސޯސިއޭޝަންތަކާއި، ޔުއެފާއިން ވަނީ ބަޔާނެއް ނެރެފައެވެ. އެގޮތުން ޔުއެފާއިން ނެރުނު ބަޔާނުގައި ވަނީ ސުޕަ ލީގުގައި ބައިވެރިވާ ކޮންމެ ކުލަބެއް އަދި ކޮންމެ ކުޅުންތެރިއަކުވެސް ފީފާއިން ނޫނީ އެހެން ފެޑެރޭޝަންތަކުން ރާވާ ހިންގާ އެއްވެސް މުބާރާތެއްގައި ބައިވެރިއެއްނުވެވޭނެ ކަމަށް ބުނެ އިންޒާރެއް ދީފައެވެ. އަދި އެކަމަށް ޔުއެފާގެ އިތުރުން ދުނިޔޭގެ އެހެން ހުރިހާ ބައްރުތަކަކުންވެސް ތާއިދުކޮށްފައިވާއިރު، ޔުއެފާއަށް އެއްބާރުލުންދީ ފީފާއިންވެސް ވަނީ ބަޔާނެއް ނެރެފައެވެ.

އެހެންކަމުން ސުޕަ ލީގު އިޢުލާންކުރި 12 ކުލަބަށް، އެ ޤައުމުތަކުގައި ކުޅުނު ފުރުޞަތު ގެެއްލިގެންދާއިރު، ޔޫރަޕުގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ޔުއެފާ ޗެމްޕިއަންސް ލީގުގައިވެސް އެ ޓީމުތަކަށް ވާދަނުކުރެވޭނެއެވެ. މި ސީޒަނުގެ ޗެމްޕިއަންސް ލީގުގެ ސެމީއަށް މި 12 ޓީމުގެ ތެރޭގައި ހިމެނޭ ސިޓީ އާއި، ޗެލްސީ އާއި ރެއާލް ދަތުރުކޮށްފައިވާއިރު، ހޯމަ ދުވަހުގެ ވަގުތެއްގައި އެ މުބާރާތުން އެ ތިން ކުލަބު ވަކިކުރުމާ މެދު ޔުއެފާއިން ވަކި ގޮތެއް ނިންމާނެ ކަމަށް ރިޕޯޓުތައް ބުނެއެވެ. އެހެންކަމަށް ވެއްޖެނަމަ މި ސީޒަނުގެ ޗެމްޕިއަންސް ލީގުގެ ޗެމްޕިއަންކަން ލިބިގެންދާނީ ޕީއެސްޖީއަށެވެ.

އެކަމަކު ސުޕަ ލީގުގައި ހިމެނޭ 12 ކުލަބުން އާދިއްތަ ދުވަހުގެރޭ ނެރުނު ބަޔާނުގައި ބުނެފައިވަނީ މި ވަގުތު އޮތް ސުޕަ ލީގަކީ ހަފުތާގެ މެދުތެރޭގައި ކުޅޭނެ މުބާރާތެއް ކަަމަށާއި، އެހެންކަމުން އެއްވެސް ކުލަބަކުން އެ ކުލަބެއް ކުޅެމުން އަންނަ ޤައުމެއްގެ ލީގުން ވަކިވުމުގެ ވިސްނުމެއް އަދި ނެތް ކަމަށެވެ. އަދި ސުޕަ ލީގުގެ ކަންތައްތަކަށް ހައްލެއް ހޯދަން ވަރަށް އަވަހަށް ޔުއެފާ އާއި ފީފާއާއެކު މަޝްވަރާކުރާނެ ކަމަށް އެ ބަޔާނުގައިވެއެވެ.

ޔޫރަޕުގެ ނަން މަޝްހޫރު 12 ކުލަބަކުން ސުޕަ ލީގު ތަޢާރަފުކުރިއިރު، ސުޕަ ލީގު ފަށާނެ ސީދާ ތާރީޚެއް އަދި ރަސްމީކޮށް ފައިނަލެއް ނުކުރެއެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް