ދަ ގްރާންޑޭ ބަލިކޮށް ވެލެންސިއާއިން ފަރަގު ކުޑަކޮށްފި

ދިރާގު ދިވެހި ޕްރިމިއާ ލީގުގައި އާދީއްތަ ދުވަހުގެރޭ ދަ ގްރާންޑޭ ސްޕޯޓްސް ކުލަބު ބަލިކޮށް، ކުލަބު ވެލެންސިއާއިން ލީގުގެ އެއްވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެމެދު އޮތް ޕޮއިންޓުގެ ފަރަގު ކުޑަކޮށްފިއެވެ.

ޤައުމީ ފުޓްބޯޅަ ދަނޑުގައި ކުޅުނު މެޗުން ވެލެންސިއާ މޮޅުވީ 3-1 ގެ ނަތީޖާއަކުންނެވެ.

މި މެޗު ފަށައިގެން ވެލެންސިއާއިން ރަނގަޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 16 ވަނަ މިނެޓުގައި ވެލެންސިއާގެ ކެޕްޓަން އަލީ އަޝްފާގު (ދަގަނޑޭ) ބޮލުން ފޮނުވާލި ބޯޅައެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އަދި މެޗުގެ 27 ވަނަ މިނެޓުގައު ވެލެންސިއާގެ އަޙްމަދު ރިލްވާން ބޮލުން ފޮނުވާލި ހަމަލާއެއްވެސް ގޯލުގެ އަރިމަތީ ދަނޑިއަށް އަމާޒުވިއިރު، އޭގެ މިނެޓެއް ފަހުން ވެލެންސިއާއިން ވަނީ ލަނޑު ޖަހާ ލީޑު ނަގައިފައެވެ. ރިލްވާން ދިން ޕާހަކުން މި ލަނޑު އެޓީމަށް ކާމިޔާބުކޮށްދިނީ ބޯހަސް މާޓިންނެވެ.

އޭގެ ފަހުން ދަ ގްރާންޑޭއިންވެސް ލަނޑު ޖެހުމަށް ފުރުޞަތުތަކެއް ތަނަވަސްކުރިއިރު، މެޗުގެ 30 ވަނަ މިނެޓުގައި އެ ޓީމުގެ މުޙައްމަދު ސަޚާއު ފޮނުވާލި ނުރައްކާތެރި ހަމަލާއެއް ވެލެންސިއާގެ ގޯލްކީޕަރު މުޙައްމަދު ފައިސަލް ވަނީ ދިފާޢުކޮށްފައެވެ. އަދި އޭގެ ފަހުން ދަ ގްރާންޑޭގެ އުމަރުޖޮނޯފް އަޚްރޯރް ފޮނުވާލި ހިލޭ ޖެހުމެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އެކަމަކު ފުރަތަމަ ހާފު ނިމުމުގެ ކުރިން ވެލެންސިއާއިން ވަނީ ލީޑު ފުޅާކޮށްފައެވެ. ފުރަތަމަ ހާފުގެ ފަހު މިނެޓުގައި ވެލެންސިއާއިން މި ލަނޑު ޖެހިއިރު، ވެލެންސިއާގެ އަލީ ފާސިރު (ސެންޓޭ) ނަގައިދިން ކޯނަރު ގޯލަށް ވަނީ ދަ ގްރާންޑޭގެ ކެޕްޓަން އަޙްމަދު ވިޖްދާން (ވިޖޫ) ގެ ފައިގައި ޖެހިފައެވެ.

މި މެޗުގެ ދެވަނަ ހާފު ފަށައިގެން ދަ ގްރާންޑޭއިން އެޓީމުގެ ކުޅުން ރަނގަޅުކުރިއިރު، މެޗުގެ 51 ވަނަ މިނެޓުގައި އެ ޓީމުގެ އިބްރާހީމް ނޫރައްދީނަށް ވަނީ ލަނޑު ޖަހަން ހުސް ފުރުޞަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން އޭނާ ފޮނުވާލި ހަމަލާ ވެލެންސިއާގެ ގޯލްކީޕަރު ވަނީ ހުށިޔާރުކަމާއެކު ދިފާޢުކޮށްފައެވެ. އަދި އޭގެ ހަތަރު މިނެޓު ފަހުން ދަ ގްރާންޑޭގެ ޔަސްފާދު ހަބީބް (މުލަކޭ) އަަށްވެސް ރަނގަޅު ފުރުޞަތެއް ލިބުނުއިރު، އޭނާ ފޮނުވާލި ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށެވެ.

އަދި އޭގެ މިނެޓެއް ފަހުން އޭރިއާ ބޭރުން ދަގަނޑޭ ފޮނުވާލި ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، މެޗުގެ 76 ވަނަ މިނެޓުގައި އެ ޓީމުން ވަނީ ތިންވަނަ ލަނޑެއް ޖަހާފައެވެ. ދަގަނޑޭގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ މާޓީންނެވެ. އެކަމަކު މެޗު ނިމެން ހަތަރު މިނެޓަށް ވެފައި ވަނިކޮށް ދަ ގްރާންޑޭގެ ހަސަން ޝިފާން ވަނީ އެ ޓީމަށް ލަނޑެއް ކާމިޔާބުކޮށްދީފައެވެ.

މި މެޗަށްފަހު ވާހަކަދައްކަމުން ވެލެންސިއާގެ ކޯޗު މުޙައްމަދު އާތިފް (އާތީ) ބުނީ މެޗުން ތިން ޕޮއިންޓް ލިބުމުން އެކަމާ ހިތްހަމަޖެހޭ ކަމަށާއި، އަދި ކުރިއަށް ހުރި މެޗުތައް ނެގުން އެއީ ވެލެންސިއާއިން ދެން ތައްޔާރުވާނެ ކަންތައް ކަމަށެވެ. އެހެންނަމަވެސް މެޗުގައި ވެލެންސިއާގެ ކުޅުންތެރިންގެ ފަރާތުން ކުދި ކުދި ގޯސްތައް ފެނުނު ކަމަށްވެސް އާތީ ބުންޏެވެ.

ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ މެޗުގައި ދަ ގްރާންޑޭގެ ފަރާތުން ފެނިގެންދިޔަ ކުޅުން ގޯސް ނޫން ކަމަށެވެ. އެގޮތުން މެޗުގައި ދަ ގްރާންޑޭއަށް ލަނޑު ޖެހުމަށް ފުރުޞަތުތަކެއް ލިބުނު ކަމަށާއި، އެކަމަކު ޓޮޕް ސްޓައިކަރެއް ނެތުމުން އެކަން ވަރަށް ބޮޑަށް ދެއްކި ކަމަށްވެސް އިންމަ ބުންޏެވެ.

މި ނަތީޖާއާއެކު ވެލެންސިއާއިން ވަނީ ތާވަލުގެ އެއްވަނައިގައި އޮތް މާޒިޔާއާ ދެމެދު އޮތް ޕޮއިންޓުގެ ފަރަގު ހަތަރު ޕޮއިންޓަށް ކުޑަކޮށްފައެވެ. އެގޮތުން ކުޅުނު 12 މެޗުން ލިބުނު 28 ޕޮއިންޓާއެކު ތާވަލުގެ އެއްވަނައިގައި މާޒިޔާ އޮތްއިރު، ވެލެންސިއާ އޮތީ ތާވަލުގެ ދެވަނައިގައި 12 މެޗުން 24 ޕޮއިންޓާއެކުއެވެ. އަދި ވެލެންސިއާ އަތުން ބަލިވި ދަ ގްރާންޑޭ އޮތީ ތާވަލުގެ ހަތަރުވަނައިގައި 13 މެޗުން 16 ޕޮއިންޓާއެކުއެވެ.