ރާއްޖެއިން ކޮވިޑް-19ގައި މިއަދު ދެވަނަ މީހަކު މަރުވެއްޖެއެވެ.

އެޗްޕީއޭއިން ބުނީ މިއަދު ހަވީރު ހަތަރެއް ޖެހިއިރު އައިޖީއެމްއެޗްގެ އެމަޖެންސީ ރޫމްއަށް ގެންދިޔަ އަންހެނަކު މަރުވެފައިވާ ކަމަށެވެ. އެމީހާ ގެންދިޔަ އިރުވެސް އެއްވެސް ހަރަކާތެއް ނެތް ކަމަށާއި އެމީހާ މަރުވިކަން ކަށަވަރުވީ 4:20ގައި ކަމަށް ބުންޏެވެ.

އުމުރުން 86 އަހަރުގެ އެ އަންހެން މީހާއަކީ ހުކުރު ދުވަހު ރާއްޖެއިން މި ބަލީގައި މަރުވި ދެވަނަ މީހާއެވެ. އަދި މުޅި ރާއްޖެއިން މިހާތަނަށް މި ބަލީގައި މަރުވި 69 ވަނަ މީހާއެވެ. ހުކުރު ދުވަހު ހެނދުނު 11:12ގައިވެސް އައިޖީއެމްއެޗްގައި ފަރުވާދެމުން ދިޔަ ކޮވިޑް-19 ބަލީގެ އުމުރުން 82 އަހަރުގެ ދިވެހި އަންހެނަކު ވަނީ މަރުވެފައެވެ.

ރާއްޖެއިން މިހާތަނަށް މިއާއެކު ޕޮޒިޓިވްވި މީހުންގެ ޖުމްލަ އަދަދު ވަނީ 26،021ށް އަރާފައެވެ. އޭގެ ތެރެއިން 23،360 މީހުން ރަނގަޅުވެފައިވާއިރު ރާއްޖެއިން މިވަގުތު މި ބައްޔަށް ފަރުވާހޯދަމުން އަންނަނީ 2،584 މީހުންނެވެ. އޭގެ ތެރެއިން 53 މީހުންނަށް ފަރުވާދެމުންދަނީ އެޑްމިޓްކޮށްގެންނެވެ.