ބުރާސްފަތި ދުވަހު ޕޮޒިޓިވްވި މީހުންގެ އަދަދު 95ށް
15 އެޕްރީލު 2021 | ބުރާސްފަތި 17:34މާލެ ސަރަހައްދުން ޕޮޒިޓިވްވީ 59 މީހުން
އާރުއާރްޓީ ޓީމުން ސާމްޕަލް ނެގުމުގައި ހަރަކާތްތެރި ވަނީ
ބުރާސްފަތި ދުވަހު ރާއްޖެއިން ކޮވިޑަށް ޕޮޒިޓިވްވީ 95 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން އާންމުކޮށްފައިވާ މައުލޫމާތުތައް ދައްކާގޮތުން ބުރާސްފަތި ދުވަހު ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 59 މީހުންނާއި އަތޮޅުތެރެއިން ޕޮޒިޓިވްވި 22 މީހުންގެ އިތުުރުން ރިސޯޓްތަކުން ޕޮޒިޓިވްވި 11 މީހުން އަދި ސިނާއީ މަސައްކަތްތައް ކުރާ ރަށްރަށުން ޕޮޒިޓިވްވި ތިން މީހުންނެވެ.
މިއާއި އެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 25،939ށް އަރާފައެވެ. އޭގެ ތެރެއިން 23،242 މީހުން ވަނީ ބަލިން ރަނގަޅުވެފައެވެ. އަދި މިވަގުތު ބައްޔަށް ފަރުވާ ހޯދަމުން ދަނީ 2،621 މީހުންނެވެ. އޭގެ ތެރެއިން 58 މީހުންނަށަ ފަރުވާ ދެމުންދަނީ ހޮސްޕިޓަލްގައި އެޑްމިޓްކޮށްގެންނެވެ.
މިހާތަނަށް 67 މީހުން ވަނީ ކޮވިޑް-19 ޖެހިގެން ރާއްޖޭގައި ނިޔާވެފައެވެ.
ކޮވިޑްގެ ތިން ވަނަ ރާޅާއެކު ޖެނުއަރީ މަހުގެ ފަހުކޮޅުން ފެށިގެން ރާއްޖޭގައި ކޮވިޑް ޖެހިގެން އާންމުގޮތެއްގައި ދުވާލަކު ރިޕޯޓްކުރަމުން އަންނަނީ 100ން މަތިންނެވެ. އޭޕްރީލް މަހުގެ 1 ވަނަ ދުވަހު އެއަދަދު 300ށް ވެސް އަރާފައިވެއެވެ. ރާއްޖޭގައި މިހާރު ވަނީ ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ބޮޑެތި ލުއިތަކެއްދީފައެވެ.
