ދެވަނަ ޑޯޒް ޖަހާތާ ދެ ހަފުތާ ތެރޭ ރަށްރަށަށް ދަތުރުކުރެވޭނެ - ރައީސް
ދަތުރު ހުއްދައަކީ އާންމު ހާލަތަށް ރުޖޫއަވުމަށް ކުރެވެމުންދާ މަސައްކަަތުގެ ތެރެއިން ފިޔަވަޅެއް
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު
ރާއްޖޭގައި ކޮވިޑް-19 ވެކްސިންގެ ދެ ވަނަ ޑޯޒް ޖަހާތާ ދެ ހަފުތާ ފަހުން ރާއްޖޭގެ ރަށްރަށަަށް ދަތުރުކުރެވޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިކަން ހާމަކުރައްވާފައިވަނީ ރާއްޖެ ލޮކްޑައުން ކުރިތާ އެއް އަހަރުވުމާ ގުޅިގެން އެމަނިކުފާނު ކުރެއްވި ޓުވީޓެއްގައެވެ. ދަތުރުފަތުރުގެ ހުއްދައަކީ އެމަނިކުފާނު ސިފަކުރެއްވި ގޮތުގައި އަލުން އާންމު ހާލަތަށް ރުޖޫއަވުމަށް ކުރެވެމުންދާ މަސައްކަަތުގެ ތެރެއިން ފިޔަވަޅެކެވެ.
ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ފެބްރުއަރީ އެކެއްގައި ފަށާފައިވާ އިރު، މިހާރު ވަނީ ވެކްސިންގެ ދެވަނަ ޑޯޒް ވެސް ޖަހަން ފަށާފައެވެ. މިވަގުތު ދެވަނަ ޑޯޒް ޖަހަމުން ދަނީ ހަމައެކަނި ކޮވިޝީލްޑް ވެކްސިންގެއެވެ.
މިހާރު ރާއްޖޭގައި ތިން ވެކްސިނެއް ޖަހަމުންދާއިރު، އެއީ ކޮވިޝީލްޑް ވެކްސިންގެ އިތުރުން ފައިޒަރގެ ކޮވިޑް ވެކްސިނާއި، ސިނޮފަރމްގެ ކޮވިޑް ވެކްސިނެވެ.
މާލެ ސަރަހައްދުގައި ވެކްސިން ޖަހަންދާ މީހުންގެ އަދަދު ގިނަވުމުގެ ސަބަބުން ހެލްތު ޕްރޮޓެކްޝަން އެޖެންސީން ވަނީ ވެކްސިން ޖަހައިދޭ ވަގުތު އިތުރުކޮށްފައެވެ. އެހެންނަމަވެސް ކިއުގައި ޖެހިފައި ތިބޭ މީހުންގެ އަދަދު މަދުވާތަނެއް ނުފެނެއެވެ.
އެޗްޕީއޭއީން އެންމެ ފަހުން އާންމުކޮށްފައިވާ މައުލޫމާތުތައް ދައްކާގޮތުން ބުދަ ދުވަހުގެ ނިޔަލަށް 28،970 މީހުން ވަނީ ކޮވިޑް ވެކްސިންގެ ދެ ވަނަ ޑޯޒް ޖަހާފައެވެ. އަދި 274،782 މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ.
