ރަމަޟާން މަހު ވެކްސިނުގެ ދެވަނަ ޑޯޒް ޖެހުން ދެ ގަޑި އިރަށް
ދެވަނަ ޑޯޒް ޖަހައިދޭނީ ރޭގަނޑު 09:00ން ފެށިގެން 11:00ށް
ރަމަޟާން މަހު ވެކްސިން ދެވަނަ ޑޯޒް ދޭނީ ރޭގަނޑު
ރަމަޟާން މަހު ވެކްސިންގެ ދެވަނަ ޑޯޒް ޖަހާދޭނީ ރޭގަނޑު ދެ ގަޑިއިރު ކަމަށް އެޗްޕީއޭއިން ބުނެފިއެވެ.
އެޗްޕީއޭއިން ބުނީ ރަމަޟާން މަހު މާލެ ސަރަހައްދުގެ ހުރިހާ ވެކްސިން ސެންޓަރަކުންވެސް ވެކްސިން ދެވަނަ ޑޯޒް ޖަހައިދޭނީ ރޭގަނޑު 09:00ން ފެށިގެން 11:00ށް ކަމަށެވެ. އަދި ފުރަތަމަ ޑޯޒް ޖަހައިދޭނީ ހަމައެކަނި ޓްރީޓޮޕް ހޮސްޕިޓަލުން ކަމަށެވެ.
ފެބްރުއަރީ މަހު ކޮވިޝީލްޑް ވެކްސިންގެ ފުރަތަމަ ޑޯޒް ޖެހި މީހުންނަށް މިހާރު އަންނަނީ ދެވަނަ ޑޯޒް ދެމުންނެވެ. މާލެ ސަރަހައްދުގައި ދެވަނަ ޑޯޒް ދެމުން އަންނަނީ، ސޯޝަލް ސެންޓަރާއި ނެޝަނަލް އާޓް ގެލަރީ، ރައްޔިތުންގެ މަޖިލީހާއި ހުޅުމާލޭ ވެކްސިނޭޝަން ސެންޓަރުގެ އިތުރުން ސެނަހިޔާ ހޮސްޕިޓަލާއި ވިލިމާލޭ ޒުވާނުންގެ މަރުކަޒުންނެވެ.
ފުރަތަމަ ޑޯޒްގެ ގޮތުގައި މިހާރު ދެމުން އަންނަނީ ޗައިނާގެ ސިނޮފާރމް ވެކްސިނެވެ. މި ވެކްސިން ޖަހަނީ އުމުރުން 18 އަހަރާއި 60 އަހަރާ ދެމެދުގެ މީހުންނަށެވެ. ޚާއްސަ ހާލަތުގައި ފައިޒަރ ވެކްސިން ދޭންވެސް ވަނީ ފަށާފައެވެ. ހުޅުމާލޭ ހޮސްޕިޓަލާއި އޭޑީކޭ ހޮސްޕިޓަލުގައި ފައިޒަރ ވެކްސިން ޖަހަން ފަށާފައިވާއިރު ރަޖިސްޓަރީ ކޮށްފައިވާ މީހުންނަށް އެޕޮއިންޓްމެންޓް ހަމަޖައްސައި އެކަން އަންގާނެ ކަމަށް ހެލްތު އެމަޖެންސީ އޮޕަރޭޝަން ސެންޓަރުން ބުނެއެވެ. ރާއްޖެއަށް ލިބިފައިވަނީ ފައިޒަރ ވެކްސިންގެ މަދު ސްޓޮކެއް ކަމުން ވެކްސިން ޖެހުމަށްޓަކައި ކަނޑައެޅިފައިވާ ކެޓަގަރީތަކުގައި ހިމެނޭ މީހުން އަވަހަށް ރަޖިސްޓަރީ ކުރުމަށް ވަނީ އިލްތިމާސްކޮށްފައެވެ.
ކޮވެކްސް ފެސިލިޓީގެ ދަށުން ދިވެހިރާއްޖެއަށް ލިބިފައިވަނީ ފައިޒަރގެ 5500 ޑޯޒް ވެކްސިނެވެ. ވެކްސިން ދެވޭނީ ރާއްޖެއަށް ލިބިފައިވާ ފައިޒަރ ވެކްސިންގެ މުޅި އަދަދުން 2 ޑޯޒް ފޯރުކޮށްދެވޭނެ އަދަދަށް ބަލައިގެން ކަމަށްވެސް އެޗްއީއޯސީން ވަނީ ބުނެފައެވެ.
