ފާއިތުވި 24 ގަޑިއިރު ރާއްޖެއިން 93 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ރާއްޖެއިން ޕޮޒިޓިވްވި 93 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 50 މީހުންނާއި މީހުން ދިރިއުޅޭ ރަށްރަށުން ޕޮޒިޓިވްވި 21 މީހުންނެވެ. އަދި ހިނގަމުންދާ ރިސޯޓްތަކުން 22 މީހަކު ވަނީ ޕޮޒިޓިވްވެފައެވެ.

އެޗްޕީއޭއިން ބުނީ ފާއިތުވި 24 ގަޑިއިރު 3514 ސާމްޕަލެއް ޓެސްޓްކޮށްފައިވާ ކަމަށެވެ. 93 މީހުން ކޮވިޑަށް ޕޮޒިޓިވްވިގެން ރިޕޯޓްކުރިއިރު އޭގެ ކުރީ ދުވަހު ކޮވިޑަށް ޕޮޒިޓިވްވެގެން ރިޕޯޓްކޮށްފައިވަނީ 88 މީހުންނެވެ. މިއީ މިފަހުން ޖެހިޖެހިގެން ދެ ދުވަހު ކޮވިޑްގެ ނަންބަރުތައް 100ން ދަށުން ރިކޯޑްކުރަމުން އަންނަ ފުރަތަމަ ފަހަރެވެ.

ރާއްޖޭގައި މިވަގުތު ކޮވިޑްގެ އެކްޓިވް ކޭހުގެ ގޮތުގައި 2990 ކޭހެއް އަންނަނީ ރިޕޯޓްކުރަމުންނެވެ. މީގެ ތެރެއިން 72 މީހަކަށް އަންނަނީ ހޮސްޕިޓަލްގައި އެޑްމިޓްކޮށްގެން ފަރުވާދެމުންނެވެ. މިހާތަނަށް ރާއްޖެއިން 25،617 މީހުން މިބައްޔަށް ޕޮޒިޓިވްވެފައިވާއިރު 22،551 މީހުން ވަނީ ބަލިން ރަނގަޅުވެފައެވެ. އަދި 67 މީހަކު ވަނީ މިބަލީގައި ނިޔާވެފައެވެ.

ކޮވިޑްގެ ތިން ވަނަ ރާޅާއެކު ޖެނުއަރީ މަހުގެ ފަހުކޮޅުން ފެށިގެން ރާއްޖޭގައި ކޮވިޑް ޖެހިގެން އާންމުގޮތެއްގައި ދުވާލަކު ރިޕޯޓްކުރަމުން އަންނަނީ 100ން މަތިންނެވެ. އޭޕްރީލް މަހުގެ 1 ވަނަ ދުވަހު އެއަދަދު 300ށް ވެސް އަރާފައިވެއެވެ. ނަމަވެސް މިފަހުން ރާއްޖޭގައި ވަނީ ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ބޮޑެތި ލުއިތަކެއްދީފައެވެ. ލުއިތައް ދެމުން ދިޔަނަމަވެސް ކޭސްތައް ފެންނަމިންވަރު ނިސްބަތުން މަދެއް ނުވެއެވެ. ވަކިން ޚާއްސަކޮށް އަތޮޅުތެރެއިން ފެންނަ ކޭސްތައް އަންނަނީ އިތުރުވަމުންނެވެ.