މާލޭގެ ނަތީޖާގައި ހައިރާންވާ ކަމެއް ނެތް - ނަޝީދު
40-45 އިންސައްތަ މީހުން އަބަދުވެސް އެމްޑީޕީގެ ފިކުރަށް ތާއީދުކުރޭ
އެމްޑީޕީގެ ރައީސް މުހައްމަދު ނަޝީދު
މިފަހަރުގެ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި މާލެ ސަރަހައްދުގެ ނަތީޖާއާމެދު ހައިރާންވެވަޑައި ނުގަންނަވާކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނޫސްވެރިންނާްއި ބައްދަލުކުރައްވަމުން ރައީސް ނަޝީދު ވިދާޅުވީ މާލޭގެ އާބާދީގެ ގާތްގަނޑަކަށް 40 އިންސައްތަ އާއި 45 އިންސައްތައާއި ދެމެދު މީހުން އަބަދުވެސް އެމްޑީޕީގެ ފިކުރަށް ތާއީދުކުރާ ކަމަށާއި ހަމަ އެދަދުގެ މީހުން އެފިކުރާ ޚިލާފުވާ ކަމަށެވެ. އިންތިޚާބެއްގެ ތެރޭގައި ވާދަކުރާ ކެންޑިޑޭޓުންނާއި ޕާޓީގެ މެނިފެސްޓޯއާއި ކަންތައްތައް ހިނގާގޮތަށް ބަލައި ނަތީޖާތައް ނުކުންނަކަން ފާހަގަކުރައްވައި ނަޝީދު ވިދާޅުވީ މާލޭގެ ގޮނޑިތަކުގެ ނަތީޖާ އިއުލާންކުރެވިގެން ދިޔައިރު ހައިރާންވާ ކަހަލަ ކަމެއް ނެތް ކަމަށެވެ.
މާލޭގައި އެމްޑީޕީގެ ބައިމަދު ގަލޮޅާއި މައްޗަންގޮޅި ހިފަހައްޓާފައިވާ ކަމަށާއި ހެންވޭރު އުތުރުގެ ގޮނޑިވެސް ކާމިޔާބުވިކަން ނަޝީދު ފާހަގަކުރެއްވިއެވެ.
މީގެ އިތުރުން ލޯކަލް ކައުންސިލް އިންތިޚާބުގައި އާންމުކޮށް މާލޭގައި ވޯޓުލަނީ 20 ނުވަތަ 25 އިންސައްތަ މީހުން ކަމަށާއި މުޅި ރާއްޖޭގައި ވޯޓުލަނީވެސް ގާތްގަޑަކަށް 65 އިންސައްތަ މީހުން ކަމަށާއި މިފަދަ ބަލިމަޑުކަމެއްގެ ތެރޭގައި ގިނަ ކަންތައްތަކެއް ހުއްޓުން އަރާފައިވަނިކޮށް މާލޭގެ 11،000 މީހުން ނުކުމެ ވޯޓުލީމާ ޕާޓިސިޕޭޓްރީ ޑިމޮކްރަސީއެއް ނެތް ކަމަށް ނުބުނެވޭނެ ކަަމަށް ނަޝީދު ވިދާޅުވިއެވެ.
މިފަހަރުގެ ލޯކަލް ކައުންސިލް އަދި އަންހެނުންގެ ތަރައްގީގެ ކޮމެޓީ އިންތިޚާބުން މުޅި ރާއްޖެއިން އެމްޑީޕީ މޮޅުވެއްޖެ ކަމަށާއި މާލޭގެ އިންތިޚާބުން ނާކާމިޔާބު ވެއްޖެކަމަށް ގަބޫލުކުރައްވާ ކަމަށް ރައީސް ނަޝީދު ވިދާޅުވިއެވެ. އެމަނިކުފާނު ވަނީ މިކަން ގަބޫލުފުޅު ކުރައްވާކަމަށް ވިދާޅުވެފައެވެ.
