"މިއީ އެކި ފިކުރުތަކުގެ މީހުންނާއެކު މަސައްކަތް ކުރަން ތައްޔާރު ސަރުކާރެއް"
މިއީ ގިނަ ދަތިތަކާއި ކުރިމަތިލާން ޖެހިފައިވާ ދަނޑިވަޅެއް ކަމަށް ވިދާޅުވި
ނާއިބުރައީސް ފައިސަލް ނަސީމް ވޯޓު ލައްވަނީ
މިހާރު ކުރިޔަށްދާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި، ރައީސުލްޖުމްހޫރިއްޔާގެ ނާއިބު ފައިސަލް ނަސީމް، ހޮނިހިރު ދުވަހުގެ މެންދުރުފަހު ވޯޓުލައްވައިފިއެވެ.
ނާއިބުރައީސް ވޯޓު ލެއްވީ، މާފަންނު ސްޓޭޑިއަމްގައި ބަހައްޓާފައި ހުރި ފުވައްމުލަކު ދެކުނު ދާއިރާގެ ފޮއްޓަށެވެ. ވޯޓު ލެއްވުމަށް ފަހު ނޫސްވެރިންނާއި ބައްދަލު ކުރައްވަމުން ނާއިބުރައީސް ވަނީ، މިދަނޑިވަޅަކީ ގިނަ ދަތިތަކާއި ކުރިމަތިލާން ޖެހިފައިވާ ދަނޑިވަޅެއް ނަމަވެސް، ވީހާވެސް ގިނަ ރައްޔިތުން ވޯޓު ލެއްވުމަށް އިލްތިމާސް ކުރައްވާފައެވެ. ފިކުރު ތަފާތުވިޔަސް ވޯޓުލުމުގެ ހައްގުގެ ބޭނުން ހިފުމަށް ނާއިބުރައީސް ގޮވާލެއްވިއެވެ. މިސަރުކާރަކީ އެކި ފިކުރުތަކުގެ މީހުންނާއެކު މަސައްކަތް ކުރަން ތައްޔާރު ސަރުކާރެއްކަމަށާއި މިކަން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ސާބިތު ކޮށްދެއްވާފައިވާކަމަށް ވެސް ވިދާޅުވިއެވެ.
މި އިންތިޚާބުގައި ވޯޓު ދިނުމުގެ ހައްގު ލިބިފައިވަނީ 273،128 (ދެލައްކަ ހަތްދިހަ ތިން ހާސް ސަތޭކަ އަށާވީސް) މީހުންނަށެވެ.
