ޑެރެކް ޝޯވިންގެ ޝަރީއަތް: އޮޓޮޕްސީ ހެދި ޑޮކްޓަރު ބުނީ ކަކުލުން އެރިޔަސް އޮކްސިޖަން ބަންދު ނުވާނެ ކަމަށް

ޑެރެކް ޝޯވިން ކަކުލުން، ޖޯޖް ފްލޮއިޑްގެ ކަނދުރާއަށް އަރައިގެން ހޭދަކުރި ވަގުތުކޮޅުގައި، ފްލޮއިޑްގެ ފުއްޕާމެއަށް އޮކްސިޖަން ލިބުން ބަންދުވާނެކަމަށް ގަބޫލުނުކުރެވޭ ކަމަށް، އޭނާގެ އޮޓޮޕްސީ ހެދި ޑޮކްޓަރު ޝަރީއަތުގެ މަޖިލީހުގައި ބުނެފިއެވެ.

ޖޯޖް ފްލޮއިޑްގެ މަރުގެ މައްސަލައިގައި ހެކިބަސް ދެމުން، ޑރ. އެންޑްރޫ ބޭކާ ބުނީ، ޖޯޖް ފްލޮއިޑް މަރުވީ އޮކްސިޖަން މަދުވުމުގެ ސަބަބުން ކަމަށް ގަބޫލު ނުކުރާ ކަމަށެވެ. އަދި ގިނަ ވަގުތު ޑެރެކް ޝޯވިންގެ ކަކޫ ފްލޮއިޑްގެ ކަނދުރާގައި މަތީގައި އޮތްކަމަށް ބުނަން ދަތިވާކަމަށް ވެސް އޭނާ ބުންޏެވެ. ޑރ. ބޭކާ ބުނީ، ވީޑިއޯއިން ފެންނަ ފެނުމުގައި އޭނާއަށް ބެލެވެނީ، ޑެރެކް ޝޯވިންގެ ކަކޫ ގިނަ ވަގުތު އޮތީ ފްލޮއިޑްގެ ބުރަކައްޓާއި، އަރިކަށީގައި ނުވަތަ ބުރަކައްޓާއި ކަނދުރާއާ ދެމެދު ކަމަށެވެ.

ކަޅު ނަސްލުގެ ޖޯޖް ފްލޮއިޑްގެ ބުރަކައްޓަށް ދޮން ނަސްލުގެ ޑެރެކް ޝޯވިންގެ ކަކުލުން އަރައިގެން ހުއްޓާ މަރުވި މައްސަލައިގެ ޝަރީއަތުގައި ހުކުރު ދުވަހު ބާއްވާފައިވަނީ 10 ވަނަ އަޑުއެހުމެވެ. މި މައްސަލައިގައި މިހާތަނަށް ގިނަ އަދަދެއްގެ ހެކީން ހެކިބަސް ދީފައިވާއިރު، ޕްރޮސެކިއުޝަނުން ބުނަމުން ގެންދަނީ، ޖޯޖް ފްލޮއިޑް މަރުވީ އެސްފިކްސިއާ ނުވަތަ އޮކްސިޖަން ނުލިބުމުން ކަމުގައެވެ. ނަމަވެސް، ޑރ. ބޭކާގެ ރައުޔު ޕްރޮސެކިއުޝަންއާ މުޅިން އެއްގޮތެއް ނޫނެވެ.

ޑރ. ބޭކާ ބުނީ، އޭނާ ގަބޫލު ކުރާ ގޮތުގައި ޖޯޖް ފްލޮއިޑް މަރުވީ، ފުލުސް މީހާގެ ކަކޫ ދަށުގައި ފިތެމުން ދިއުމުން ހިތުގެ ހިނގުން ހުއްޓިގެން ކަމަށެވެ. މި މައްސަލައިގައި ބޭކާއަށް ފެންނަ ގޮތް ހާމަކުރަމުން އޭނާ ބުނީ، ޖޯޖް ފްލޮއިޑްގެ ހިތުގެ މައްސަލަތަކަކީ، އޭނާގެ މަރަށް މަގުފަހިވި ކަމެއް ކަމަށެވެ.