ކެޓަލޯނިއާގެ އިސް ފަރާތްތަކުގެ ޝަރީއަތް: 8 އޮފިޝަލަކު ޖަލަށް ލުމަށް ޕްރޮސިކިއުޓަރުން އެދިއްޖެ
ކެޓަލޯނިއާގެ ކުރީގެ ލީޑަރު ޕުއިޖްޑެމޮންޓް އާއި އިތުރު 4 އޮފިޝަލަކު ސްޕެއިންގެ ހައި ކޯޓަށް ހާޒިރުވުމަށް އަމުރު ނެރުމުން ހާޒިރުވެފައެއް ނުވޭ
ކެޓަލޯނިއާގެ ކުރީގެ ސަރުކާރުގެ މެމްބަރުންތަކެއް ކޯޓަށް ހާޒިރުވަނީ
ކެޓަލޯނިއާގެ މިނިވަންކަން އިއުލާންކުރުމާ ގުޅިގެން ކެޓަލޯނިއާގެ ކުރީގެ ސަރުކާރުގެ ބައެއް އިސްވެރިންގެ މައްޗަށް ކުރެވޭ ދައުވާ ގައި، ކެޓަލޯނިއާގެ ކުރީގެ ސަރުކާރުގެ އިސް އަށް މެމްބަރެއް ޖަލަށް ލުމަަށް ޕްރޮސިކިއުޓަރުން ކޯޓުގައި އެދިއްޖެއެވެ.
ކެޓަލޯނިއާގެ ކުރީގެ ސަރުކާރުގެ އިސް އޮފިޝަލުންގެ މައްޗަށް ކުރެވޭ ޝަރީއަތުގައި ނުވަ އޮފިޝަލަކު ވަނީ ސްޕެއިންގެ ހައި ކޯޓަށް ހާޒިރުކޮށްފައެވެ. އެމީހުން ޖަވާބުދާރީވެފައި ވަނީ ދައުލަތާ ދެކޮޅަށް ނިކުތުމަށް ހިތްވަރުދިނުމުގެ ސަބަބުން ކުރެވޭ ދައުވާ އަށާއި ދައުލަތުގެ ފައިސާ ނަހަމަގޮތުގައި ބޭނުން ކުރުުމުގެ ސަބަބުން ކުރެވޭ ދައުވާ އަަށެވެ.
ކެޓަލޯނިއާގެ ކުރީގެ ލީޑަރު ކާލްސް ޕުއިޖްޑެމޮންޓް އާއި އިތުރު ހަތަރު އޮފިޝަލަކު ސްޕެއިންގެ ހައި ކޯޓަށް ހާޒިރުވުމަށް އަމުރު ނެރުމުން ހާޒިރުވެފައެއް ނުވެއެވެ. ބެލްޖިއަމްގައި ހުންނެވި ކެޓަލޯނިއާގެ ކުރީގެ ލީޑަރު ކާލްސް ޕުއިޖްޑެމޮންޓް އޭނާގެ މައްޗަށް ސްޕެއިންގެ ދައުލަތުން ކޮށްފައިވާ ދައުވާއަށް ޖަވާބުދާރީވާން ސްޕެއިނަށް ވަޑައިނުގަންނަވާނެ ކަަމަށް އޭނާގެ ލޯޔަރުން ވަނީ ވިދާޅުވެފައެވެ. ޕުއިޖްޑެމޮންޓް ވިދާޅުވަމުން ގެންދަވަނީ ކެޓަލޯނިއާގެ ކުރީގެ އިސް ފަރާތްތަކުގެ މައްޗަށް ކުރެވެނީ "ސިޔާސީ" ޝަރީއަތެއް ކަަމަށެވެ.
ސްޕެއިން އިން ހިޮނިހިރު ދުވަހު ވަނީ ކެޓަލޯނިއާ އަށް ދީފައި އޮތް ސަރަހައްދީ މިނިވަންކަން، އެއްކޮށް ނިގުޅައިގެންފައެވެ. އަދި ކެޓަލޯނިއާގެ ލީޑަރު ކާލްސް ޕުއިޖްޑެމޮންޓް މަގާމުން ވެސް ދުރުކޮށްފައެވެ. މިކަމާ ގުޅޭގޮތުން ޕުއިޖްޑެމޮންޓް ވިދާޅުވީ ކެޓަލޯނިއާ، ސްޕެއިންގެ ފުރިހަމަ ބާުރުގެ ދަށަށް ގެނައުމާ ދެކޮޅަށް ސުލްހަވެރިކަމާއެކު އިހްތިޖާޖް ކުރަން ޖެހޭ ކަމަށާއި މަގާމުން ދުުުރުކުރި ފަރާތްތައް އެކުވެގެން "މިނިވަން ކެޓަލޯނިއާ އެއް ބިނާކުރައްވަން މަސައްކަތްޕުޅު ކުރައްވާނެ" ކަމަށެވެ.
