އިތުރު 132 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ އަލަށް ޕޮޒިޓިވްވި 132 މީހުންނާއި އެކު ރާއްޖެއިން ޕޮޒިޓިވްވި ޖުމްލަ އަދަދު 25،436ށް ވަނީ އަރާފައި ކަމަށެވެ.

ހުކުރު ދުވަހު ޕޮޒިޓިވްވި 132 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 56 މީހުންނާއި އަތޮޅު ތެރެއިން ޕޮޒިޓިވްވި 54 މީހުންގެ އިތުރުން ރިސޯޓްތަކުން ޕޮޒިޓިވްވި 22 މީހުންނެވެ.

މިވަގުތު ރާއްޖެއިން 3،084 މީހުން ކޮވިޑަށް ފަރުވާ ހޯދަމުންދާއިރު، ހޮސްޕިޓަލްގައި އެޑްމިޓްކޮށްގެން ފަރުވާ ހޯދަމުން ދަނީ 82 މީހުންނެވެ. އަދި ބަލިޖެހުނު 22،276 މީހުން ވަނީ ބަލިން ރަނގަޅުވެފައެވެ. ބަލި ޖެހުނު މީހުންގެ ތެރެއިން 67 މީހުން ވަނީ ނިޔާވެފައެވެ.

ކޮވިޑް-19ގެ ތިން ވަނަ ރާޅަކަށް ފަހު މާލެ ސަރަހައްދުން ފެންނަ ކޭސްތަކުގެ އަދަދުތައް މަދުވާން ފަށާފައިވީ ނަމަވެސް ދުވާލެއްގެ މައްޗަށް ރިޕޯޓުކުރާ ކޭސްތަކުގެ ޖުމްލަ އަދަދަކަށް މާބޮޑު ބަދަލެއް ނާދެއެވެ. މާލެ ސަރަހައްދުން ކޭސްތައް މަދުވި ނަމަވެސް އަތޮޅުތެރެއިން ބޮޑެތި ކްލަސްޓަރތަކެއް ފެނިފައިވާތީ އަތޮޅުތެރެއިން އަންނަނީ ކޮންމެ ދުވަހަކު ވެސް ގިނަ ކޭސްތަކެއް ރިޕޯޓުކުރަމުންނެވެ.

ކޮވިޑް-19 ކޮންޓްރޯލްކުރުމަށް ގިނަ މަސައްކަތްތަކެއް ކުރަމުން އަންނައިރު ކޭސްތައް ގިނަވުމާ ގުޅިގެން މާލެ ސަރަހައްދުގައި ހަރުކަށި ފިޔަވަޅުތަކެއް ވެސް އެޅިއެވެ. އެކަމަކު ކޭސްތަކުގެ އަދަދުތައް މަދުވުމާ ގުޅިގެން އަނެއްކާ ވެސް ވަނީ ފިޔަވަޅުތަކަށް ލުއި ދީފައެވެ.