ދިރާގު ދިވެހި ޕްރިމިއާ ލީގުގައި ހުކުރު ދުވަހުގެރޭ ސުޕަ ޔުނައިޓެޑް ސްޕޯޓްސް (ސަސް) ބަލިކޮށް ކުލަބު ވެލެންސިއާއިން ލީގުގެ އެއްވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެމެދު އޮތް ޕޮއިންޓުގެ ފަރަގު ކުޑަކޮށްފިއެވެ.

ޤައުމީ ފުޓްބޯޅަ ދަނޑުގައި ކުޅުނު މެޗުން ވެލެންސިއާ މޮޅުވީ 2-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ލަނޑެއް ޖަހަން ރަނގަޅު ފުރުޞަތުތަކެއް ތަނަވަސްކޮށްފައިވަނީ ވެލެންސިއާއިންނެވެ. އެގޮތުން މެޗުގެ 27 ވަނަ މިނެޓުގައި އޭރިއާ ތެރެއިން ވެލެންސިއާގެ އަލީ ފާސިރު (ސެންޓޭ) ފޮނުވާލި ހަމަލާއެއް، ސަސްގެ ގޯލްކީޕަރު މިރްޒޮހިދު މަމަކްތޯނޯފް ވަނީ ހުށިޔާރުކަމާއެކު ދިފާއުކޮށްފައެވެ. އެކަމަކު މެޗުގެ 34 ވަނަ މިނެޓުގައި ސެންޓޭ ވަނީ ވެލެންސިއާއަށް ލީޑު ނަގައިދީފައެވެ. ސަސްގެ ގޯލްކީޕަރު ކުރިއަށް ޖެހުނު ވަގުތު ސެންޓޭ މި ލަނޑު ކާމިޔާބުކުރިއިރު، މެޗަށްފަހު ސެންޓޭ ވަނީ މި ލަނޑަކީ ހުރަސްކޮށްދޭން އުޅުމުގެ ތެރޭގައި ވަން ލަނޑެއް ކަމަށް ބުނެފައެވެ.

އޭގެ ފަހުންވެސް މި މެޗުގައި ވެލެންސިއާއިން ގިނަ ހަމަލާތަކެއް އުފެއްދިއިރު، ފުރަތަމަ ހާފުގެ ފަހު ކޮޅު ލީޑު ފުޅާކުރަން ވެލެންސިއާގެ ކެޕްޓަން އަލީ އަޝްފާގު (ދަގަނޑޭ) އަށް ވަނީ އޭރިއާ ތެރެއިން ރަނގަޅު ފުރުޞަތެއް ލިބިފައެވެ. އެކަމަކު އޭނާ ފޮނުވާލި ބޯޅަ ސަސްގެ ގޯލްކީޕަރު ވަނީ ދިފާއުކޮށްފައެވެ.

މި މެޗުގެ ދެވަނަ ހާފުގައި ސަސްއިން އެ ޓީމުގެ ކުޅުން ރަނގަޅުކުރިއިރު، މެޗުގެ 75 ވަނަ މިނެޓުގައި އޭރިއާ ތެރެއިން އެ ޓީމުގެ އަޙްމަދު އައިހަމަށް ވެލެންސިއާގެ ޑިފެންޑަރު އަކުރަމް އަބްދުލް ޣަނީ (އަކޫ) ކުރި ޓެކުލަކާ ގުޅިގެން ސަސްގެ ކުޅުންތެރިން ވަނީ ޕެނަލްޓީއަކަށް ވަރަށް ބޮޑަށް އެޕީލްކޮށްފައެވެ. އެކަމަކު އެއީ ފައުލެއް ނޫން ކަމަށް ނިންމައި، ރެފުރީ ސަސްއަށް ޕެނަލްޓީއެއް ދީފައެއް ނުވެއެވެ.

މި މެޗުގައި ވެލެންސިއާއިން ލީޑު ފުޅާކޮށްފައިވަނީ މެޗު ނިމެން 10 މިނެޓަށް ވެފައި ވަނިކޮށެވެ. ބޯހަސް މާޓިން ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ސެންޓޭއެވެ. އަދި އިތުރު ވަގުތުގައި އޭރިއާ ބޭރުން ސެންޓޭ ފޮނުވާލި ބާރު ހަމަލާއެއް، ސަސްގެ ގޯލްކީޕަރު ވަނީ ދިފާއުކޮށްފައެވެ.

މި ނަތީޖާއާއެކު ވެލެންސިއާއިން ވަނީ ތާވަލުގެ އެއްވަނައިގައި އޮތް މާޒިޔާއާ ދެމެދު އޮތް ޕޮއިންޓުގެ ފަރަގު ހަތަރު ޕޮއިންޓަށް ކުޑަކޮށްފައެވެ. އެގޮތުން ކުޅުނު 11 މެޗުން ލިބުނު 25 ޕޮއިންޓާއެކު ތާވަލުގެ އެއްވަނައިގައި މާޒިޔާ އޮތްއިރު، ވެލެންސިއާ އޮތީ ތާވަލުގެ ދެވަނައިގައި 11 މެޗުން 21 ޕޮއިންޓާއެކުއެވެ. އަދި ވެލެންސިއާ އަތުން ބަލިވި ސަސް އޮތީ ތާވަލުގެ ފުލުން ދެވަނައިގައި 12 މެޗުން 12 ޕޮއިންޓާއެކުއެވެ.