ސޮފްޓްވެއަރ ޑިވެލޮޕަރުންނާއި ކުންފުނިތަކަށް އީ-ފާސް ބޭނުންކުރުމަށް ހުށަހެޅުމަށް ހުޅުވާލައިފި
9 އެޕްރީލު 2021 | ހުކުރު 13:05ޝައުގުވެރިކަން ހުރި ފަރާތްތަކުން 15 މެއި 2021 ގެ ނިޔަލަށް ރަޖިސްޓްރޭޝަން ފޯމް މެއިލް ކުރަންޖެހޭ
އެންސީއައިޓީގެ އަހަރީ ދުވަސް
ޑިޖިޓަލް ޚިދުމަތްތައް ޑިވެލޮޕްކުރާ ދިވެހި ސޮފްޓްވެއަރ ޑިވެލޮޕަރުންނާއި ކުންފުނިތަކަށް އީ-ފާސް ބޭނުންކުރުމަށް ހުށަހެޅުމަށް ފުރުސަތު ހުޅުވާލައިފިއެވެ.
މިނިސްޓްރީ އޮފް ކޮމިއުނިކޭޝަން, ސައިންސް އެންޑް ޓެކްނޯލޮޖީންވަނީ ދިވެހި އެޕްލިކޭޝަންތަކާއި އޮންލައިން ވިޔަފާރިތައް ތަރައްގީވެ ފުޅާވަމުންދާއިރު، ޚިދުމަތް ދޭ ފަރާތްތަކާއި ޚިދުމަތް ހޯދާ ފަރާތްތަކަކީ ސައްހަ ފަރާތްތަކެއްކަން ކަށަވަރުކުރުމަކީ އޮންލައިން ވިޔަފާރިއަށް ރައްޔިތުންގެ އިތުބާރުލިބި އިތުރު އިގްތިސާދީ ހަރަކާތްތަކަށް މަގުފަހިވެގެންދާނެ ކަމެއްކަމަށް ބުނެފައެވެ. މިކަންކަމަށް މަގުފަހިކޮށްދިނުމުގެ ގޮތުން ސަރުކާރުގެ ޑިޖިޓަލް އެޕްލިކޭޝަންތަކާއި އޮންލައިން ޚިދުމަތްތަކުގައި ބޭނުންކުރުމަށް ތައްޔާރުކުރެވިފައިވާ ސިންގަލް ސައިން އޮން ސަރވިސް "އީ-ފާސް"، ޕްރައިވެޓް ސެކްޓަރގެ ދިވެހި ޑިޖިޓަލް ޚިދުމަތްތައް ލިބިގަތުމުގައި ބޭނުންކުރެވޭ ގޮތަށް ހެދުމަށްޓަކައި، މިފަދަ ޑިޖިޓަލް ޚިދުމަތްތައް ޑިވެލޮޕްކުރާ ދިވެހިރާއްޖޭގެ ސޮފްޓްވެއަރ ޑިވެލޮޕަރުންނާއި ކުންފުނިތަކުން އީ-ފާސް ޚިދުމަތް ބޭނުންކުރުމަށް އެދި "އެކްސްޕްރެޝަން އޮފް އިންޓަރެސްޓް" ހުށަހެޅުމަށް ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީއިން ހުޅުވާލާފައިވާކަން ވަނީ ހާމަކޮށްފައެވެ.
މި ހަރަކާތުގެ ބޭނުމަކީ، މި ޚިދުމަތް އާންމުކޮށް ހުޅުވާލުމުގެ ކުރިން، މިކަމަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ހޮވާލެވޭ ފަރާތްތަކާއެކު މި ނިޒާމު ހިންގުމުގެ "ބީޓާ" ޓެސްޓިންއެއް ހެދުމެވެ. މިކަމަށް ޝައުގުވެރިކަން ހުރިފަރާތްތަކުން 15 މެއި 2021 ގެ ނިޔަލަށް ރަޖިސްޓްރޭޝަން ފޯމް mv.gov.ncit@support.efaas އަށް މެއިލް ކުރަންޖެހެއެވެ. މިކަމާއި ގުޅޭ ރެޖިސްޓްރޭޝަން ފޯމް އެން.ސީ.އައި.ޓީގެ ވެބްސައިޓް mv.gov.ncit.www އިން ލިބެން ހުންނާނެއެވެ. މި ކަމާއި ބެހޭ ތަފްސީލީ މައުލޫމާތު ރަޖިސްޓްރީވާ ފަރާތްތަކާއި ހިއްސާކުރާނެކަމަށް އެންސީއައިޓީން ބުނެއެވެ.
