މާލެ ސަރަހައްދުން ބުރާސްފަތި ދުވަހު ވެކްސިންގެ ފުރަތަމަ ޑޯޒު ޖެހީ 502 މީހުން
8 އެޕްރީލު 2021 | ބުރާސްފަތި 20:42ބުރާސްފަތި ދުވަހު ވެކްސިންގެ ފުރަތަމަ ޑޯޒު ޖެހީ 4،950 މީހުން
ކޮވިޑް ވެކްސިން
ބުރާސްފަތި ދުވަހު މާލެ ސަރަހައްދުން ވެކްސިން ޖެހީ 502 މީހުން ކަމަށް ހެލްތު ޕްރޮޓެކްޝަން އެޖެންސީން އާންމުކުރި ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ބުރާސްފަތި ދުވަހު ވެކްސިންގެ ފުރަތަމަ ޑޯޒު ޖެހީ 4،950 މީހުންނެވެ. އޭގެ ތެރެއިން 4،448 މީހުންނަކީ އަތޮޅުތެރެއިން ވެކްސިން ޖެހި މީހުންނެވެ. އަދި މާލެ ސަރަހައްދުން ވެކްސިންގެ ފުރަތަމަ ޑޯޒު ޖެހީ 502 މީހުންނެވެ.
ވެކްސިންގެ ދެވަނަ ޑޯޒު ޖެހީ 4،382 މީހުންނެވެ. އޭގެ ތެރެއިން 3،969 މީހުން ވެކްސިން ޖެހީ މާލެ ސަރަހައްދުންނެވެ. އަދި އަތޮޅުތެރެއިން ވެކްސިން ޖެހީ 413 މީހުންނެވެ. މިއާއެކު ރާއްޖެއިން ވެކްސިން ޖެހި މީހުންގެ ޖުމްލަ އަދަދު ވަނީ 265،235ށް އަރާފައެވެ. އަދި އޭގެ ތެރެއިން ދެވަނަ ޑޯޒު ވެސް ޖަހާފައިވާ މީހުންގެ ޖުމްލަ އަދަދަކީ 14،951އެވެ.
ރާއްޖޭގައި ބޭނުންކުރަމުން އަންނަނީ ކޮވިޝީލްޑް ވެކްސިންއާއި، ސިނޮފާމްގެ އިތުރަށް ފައިޒާ ވެކްސިންއެވެ. އޭގެ ތެރެއިން ކޮވިޝީލްޑް ވެކްސިންގެ ފުރަތަމަ ޑޯޒު ޖެހުން މިހާރު ހުއްޓާލާފައިވާއިރު މިހާރު ޖަހަނީ އޭގެ ދެވަނަ ޑޯޒެވެ. އަދި ފުރަތަމަ ޑޯޒު ޖަހަނީ ސިނޮފާމް ވެކްސިންގައެވެ. ފައިޒާ ވެކްސިން ބޭނުންކުރަނީ ހާއްސަ ހާލަތްތަކުގައެވެ. އެގޮތުން ވަކި ބަލިތަކަކަށް ބޭސްކުރާ އުމުރުން 16 އަހަރާއި 17 އަހަރުގެ ކުދިންނާއި މީހުންނަށް އެ ވެކްސިން ޖަހައިދެއެވެ.
މިދިޔަ ފެބްރުއަރީ މަހުގެ އެއް ވަނަ ދުވަހު ރާއްޖޭގައި ވެކްސިން ޖެހުމުގެ ގައުމީ ކެމްޕޭނެއް ފަށާފައިވާއިރު، ރާއްޖޭގައި ދިރިއުޅޭ އެންމެނަށް ވެސް އަންނަނީ ހިލޭ ވެކްސިން ޖަހައިދެމުންނެވެ. މީގެ އިތުރުން ރާއްޖެއިން ބޭރުން ފުރަތަމަ ޑޯޒު ޖެހި މީހުންގެ ތެރެއިން ރާއްޖޭގައި ދިރިއުޅޭ މީހުންނަށް ވެސް ރާއްޖޭގައި ބޭނުންކުރާ ވެކްސިންތަކުގެ ދެވަނަ ޑޯޒު ޖެހޭނެ އިންތިޒާމު މިހާރު ވަނީ ހަމަޖައްސާފައެވެ.
