އަރބަން ފާމިންގެ މަޝްރޫއުގެ ތަމްރީން ޕްރޮގްރާމް ފަށައިފި
6 އެޕްރީލު 2021 | އަންގާރަ 14:23ދަނޑުވެރިކަމާއި ގުޅުންހުރި ގިނަ މައުލޫމާތުތަކެއް ލިބޭނެ
ވަރޗުއަލްކޮށް ކުރިއަށް ގެންދިޔަ ތަމްރީން ޕްރޮގްރާމްގެ ތެރެއިން
އަރބަން ފާމިންގެ މަޝްރޫއުގެ ތެރެއިން ހުޅުމާލޭގައި ދަނޑުވެރިކަން ކުރުމަށް 48 މީހަކަށް ބިން ހަވާލުކުރެވި ތަމްރީން ޕްރޮގްރާމް ފަށައިފިއެވެ.
ހައުސިން ޑިވަލޮޕްމެންޓް ކޯޕްރޭޝަަން (އެޗްޑީސީ)އިން ބުނީ އަރބަން ފާމިންގގެ ގޮތުގައި ހުޅުމާލޭގައި ހުސްކޮށް ދޫކޮށްލައިފައިވާ ބިންތަކުގައި ދަނޑުވެރިކަން ކުރުމަށް ހުޅުމާލޭގައި ދިރިއުޅޭ ފަރާތްތަތަކަށް ހުޅުވާލި ފުރުސަތުގައި ހޮވާލެވުނު 48 މީހަކަށް ބިން ހަވާލުކުރެވިފައިވާ ކަމަށާއި، އަމަލީ މަސައްކަތް ފެށުމަށް ދެވޭ ޚާއްސަ ޓްރޭނިންގ ސެޝަންތައް އަންގާރަ ދުވަހު ރަސްމީކޮށް ފަށާފައިވާ ކަމަށެވެ.
އޮންލައިން ވެބިނައަރއެއްގެ ގޮތުގައި ބޭއްވުނު މި ސެޝަންގައި މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު، ޖަޕާނުން ރާއްޖެއަށް ކަނޑައަޅާފައިވާ ސަފީރު ކެއިކޯ ޔަނައި އަދި ޔޫ.އެން.ޑީ.ޕީގެ ރެސިޑެންޓް ރެޕްރެޒެންޓޭޓިވް އަކިކޯ ފުޖީ ވަނީ ބައިވެރިވެވަޑައިގެންފައެވެ.
މި ސެޝަންގައި އެޗްޑީސީގެ ޑެޕިއުޓީ މެނޭޖިންގ ޑިރެކްޓަރު އަހްމަދު އާތިފު ވިދާޅުވީ މި ޕްރޮގްރާމްގައި ބައިވެރިވާ ހުރިހާ ފަރާތްތަކަކަށްވެސް ގަސް އިންދާ ބެލެހެއްޓުމުގައި ދިމާވާ ދަތިތަކާއި އިތުރު ގިނަ މައުލޫމާތުތައް ދަސްވެ ދަނޑުވެރިކަމުގެ ރޫހު ހުޅުމާލޭގައި ދިރިއުޅޭ ރައްޔިތުންގެ މެދުގައި އާލާވެގެން ދާނެ ކަމަށެވެ.
މީގެއިތުރުން ވެސް، މި ސެޝަންގެ ބައިވެރިންނާއި މުހާތަބުކުރައްވާ މިނިސްޓަރު ޒަހާ ވަނީ މިފުރުސަތުގެ ބޭނުން ރަނގަޅު ގޮތުގައި ބޭނުންކޮށް ހުޅުމާލޭގައި ފެށިގެން މިދިޔަ މަޝްރޫއުއަކީ ކާމިޔާބު ނަމޫނާ މަޝްރޫއުއަކަށް ހެދުމަށް ބައިވެރިންނަށް އިލްތިމާސްކުރައްވާފައެވެ.
ޖަޕާންގެ ހިލޭ އެހީގައި ޔޫ.އެން.ޑީ.ޕީއާއި އެޗްޑީސީއާ ގުޅިގެން ހިންގާ "ކޮމިއުނިޓީ އަރބަން ފާމިންގ" މަޝްރޫއުއަކީ ސަސްޓެއިނަބަލް އިކޮނޮމިކް އެމްޕަވަރމަންޓް ފޯ ޑިވެލޮޕްމަންޓް އޮފް އެމް.އެސް.އެމް.އީސް" (ސީޑްސް) މަޝްރޫއުގެ ބައެއްގެ ގޮތުގައި ކުރިއަށް ގެންދާ މަޝްރޫއެކެވެ. އަދި މި ފެށި ޕްރޮގްރާމްގެ އެންމެ ބޮޑު އެއްބޭނުމަކީ، ހުޅުމާލޭގައި ދިރިއުޅޭ އަންހެނުން ބާރުވެރި ކުރުވުމުގެ އިތުރުން، މުޖްތަމައުގައި އުޅޭ މީހުންގެ ތެރެއިން އަޅާލުން އެންމެ ބޮޑަށް ބޭނުންވާ "ނާޒުކު" ފަރާތްތަކާއި، ކޮވިޑް-19 އާލަމީވަބާގެ ސަބަބުން މާލީގޮތުން އެންމެ ބޮޑަށް އަސަރުކޮށްފައިވާ ފަރާތްތަކަށް މިމަޝްރޫއު މެދުވެރިކޮށް، ދެމެހެއްޓެނިވި ގޮތެއްގެ މަތިން އެކަށީގެންވާ އާމްދަނީއެއް ހޯދޭނެ މަގު ފަހިކޮށްދިނުންކަމަށް އެޗްޑީސީން ބުނެއެވެ.
އެޗްޑީސީން ބުނީ މާސްޓަރ ޕްލޭނެއްގެ ދަށުން ހުޅުމާލެ ތަރައްގީ ކުރެވެމުން ދާއިރު، މީހުން ދިރިއުޅޭ ސަރަހައްދުތައް ރަނގަޅު ފެންވަރެއްގައި ދެމެހެއްޓުމަށާއި ހުޅުމާލޭގައި ދިރިއުޅޭ ރައްޔިތުންގެ މެދުގައި އެއްބައިވަންތަކަން އާލާކުރުމަށް ނެއިބަރހުޑްތަކުގައި ގަސް ހެއްދުމަށް ފުރުސަތުތައް ފަހިކޮށްދިނުމަށް މިއީ އެޅިގެން ދިޔަ މުހިއްމު ފިޔަވަޅެއް ކަމަށެވެ.
އަރބަން ފާމިންގެ ގޮތުގައި ހުޅުމާލޭއިން ދޫކުރަން ކަނޑައަޅާފައިވާ 16 ޕްލޮޓްގައި ފުރަތަމަ ތިންމަސް ދުވަހު އެއްވެސް ކުއްޔެއް ނުނަގައި އެކަށީގެންވާ އެލަވަންސްއެއް ދިނުމަށް ހަމަޖެހިފައިވެއެވެ.
