މާލޭގައި ވެކްސިނުގެ ދެވަނަ ޑޯޒް ޖަހަން ފަށައިފި

ކޮވިޑް ވެކްސިންގެ ދެވަނަ ޑޯޒް ޖަހަން ފަށައިފިއެވެ.

ދެވަނަ ޑޯޒް ދެނީ ފެބްރުއަރީ 1-4 އާއި ދެމެދު ފުރަތަމަ ޑޯޒް ޖަހާފައިވާ މީހުންނަށެވެ. ދެވަނަ ޑޯޒް ދިނުން ކުރިއަށް ދާނީ ސޯޝަލް ސެންޓަރ، ނެޝެނަލް އާޓް ގެލެރީ، ހުޅުމާލެ ވެކްސިނޭޝަން ސެންޓަރ (ކުރީގެ ފްލޫ ކްލިނިކް) އަދި ސެނަހިޔާގައި ހެނދުނު 10:00 ފެށުގެން މެންދުރުފަހު 3:00ށެވެ. ވިލިމާލެ ޒުވާނުންގެ މަރުކަޒުގައި ވެކްސިންގެ ދެވަނަ ޑޯޒް ދޭނީ ހެންދުނު 10:00 ފެށިގެން މެންދުރު 2:00ށެވެ.

މާލެ ސަރަހައްދުގައި ދޭން ފަށާފައިވަނީ ކޮވިޑްޝީލްޑް ވެކްސިންގެ ދެވަނަ ޑޯޒެެވެ.

އެޗްޕީއޭއިން ވަނީ ވެކްސިން ޖަހަން އަންނައިރު ވެކްސިން ކާޑާއެކު އައި.ޑީ ކާޑު ނުވަތަ ޕާސްޕޯޓް ނުވަތަ ލައިސަންސް ކާޑު ގެންނަން ވާނެކަމަށް ބުނެފައެވެ. ކޮވިޑް-19 އިން ދިފާއުވުމަށް ޖަހާ ވެކްސިންގެ ފުރަތަމަ ޑޯޒް ދިނުން މާލެ ސަރަހައްދުގައި، ހޮނިހިރު ދުވަހުން ފެށިގެން ދެން ކުރިއަށްދާނީ ރައްޔިތުންގެ މަޖިލީހާއި ޓްރީ ޓޮޕް ހޮސްޕިޓަލުގައި ހެންދުނު 10:00 ފެށިގެން މެންދުރުފަހު 3:00ށެވެ.

ރަމަޟާން މަސް ފެށުމުގެ ކުރިން ވެކްސިން ޖެހޭ އުމުރުފުރައިގެ ހުރިހާ އެންމެނެވެސް ފުރަތަމަ ޑޯޒް ޖެހުމަށް އެޗްޕީއޭއިން ވަނީ އިލްތިމާސް ކޮށްފައެވެ.

ދެވަނަ ޑޯޒް ޖެހުމަށްފަހު ކަރަންޓީނު ނުވެ ދަތުރުކުރެވޭނެ ކަމަށާއި ބައިނަލްއަގްވާމީ ގޮތުން ވެސް އެކަން އެގޮތަށް ހިނގާނެ ކަމަށް ރައީސް އޮފީހުގެ ތަރުޖަމާނު މަބްރޫކް އަބްދުލްއަޒީޒު ވިދާޅުވިއެވެ. އަދި ރާއްޖޭގައި ވެސް އަތޮޅުތެރެއަށް ދަތުރުކުރެވޭނެ ގޮތް ހެދިގެންދާނެ ކަމަށް ވިދާޅުވިއެވެ. އެހެންނަމަވެސް އެކަމަށް ވަކި ތާރީޚެއް އަދި ދެންނެވެން ނެތް ކަމަށް ވިދާޅުވިއެވެ.