ދެވަނަ ޑޯޒް ފުރަތަމަ ދޭނީ ފެބްރުއަރީ އެކަކުން ހަތަރަކަށް ވެކްސިން ޖެހި މީހުންނަށް

ދެވަނަ ޑޯޒް އެންމެ ފުރަތަމަ ޖަހާނީ ފެބްރުއަރީ 1 އާއި 4 ދެމެދު ވެކްސިން ޖެހި މީހުންނަށް ކަމަށް ހެލްތް ޕްރޮޓެކްޝަން އޭޖެންސީ، އެޗްޕީއޭއިން ހާމަކޮށްފިއެވެ.

ރާއްޖޭގައި އެންމެ ފުރަތަމަ ޖަހަން ފަށާފައިވަނީ އިންޑިއާގެ ސިރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިނެވެ. ވެކްސިންގެ ދެވަނަ ޑޯޒް ދިނުމުގެ ކަންކަމާއި ގުޅޭގޮތުން އެޗްޕީއޭއިން ވަނީ ކޮވިޝީލްޑް ވެކްސިންގެ ދެވަނަ ޑޯޒް ދިނުން ހޮނިހިރު ދުވަހު ފަށާއިރު، ދެވަނަ ޑޯޒް ދެނީ ފެބްރުއަރީ 4-1 އާއި ދެމެދު ފުރަތަމަ ޑޯޒް ޖަހާފައިވާ ފަރާތްތަކަށް ކަމަށެވެ. ދެވަނަ ޑޯޒް ދިނުން ކުރިއަށް ދާނީ ސޯޝަލް ސެންޓަރ، ނެޝެނަލް އާޓް ގެލެރީ، ހުޅުމާލެ ފްލޫ ކްލިނިކް އަދި ވިލިމާލެ ޒުވާނުންގެ މަރުކަޒުގައި ކަމަށް އެޗްޕީއޭއިން ހާމަކުރެއެވެ. އެޗްޕީއޭއިން ވަނީ ވެކްސިން ޖަހަން އަންނައިރު ވެކްސިން ކާޑާއެކު އައި.ޑީ ކާޑު ނުވަތަ ޕާސްޕޯޓް ނުވަތަ ލައިސަންސް ކާޑު ގެންނަން ވާނެކަމަށް ބުނެފައެވެ.

އޭޕްރީލް މަހުގެ ތިންވަނަ ދުވަހު ރާއްޖޭގައި ކޮވިޑް ވެކްސިންގެ ދެވަނަ ޑޯޒް ޖަހަން ފަށާނެ ކަމަށް ރައީސް އޮފީހުގެ ސްޕޯކްސްޕާރސަން މަބްރޫކް އަބްދުލްއަޒީޒް މާރޗް 31 ވަނަ ދުވަހު ވަނީ ހާމަކުރައްވާފައެވެ. ބުދަ ދުވަހު ނޫސްވެރިންނާ ބައްދަލުކުރައްވާ ވާހަކަ ދައްކަވަމުން މަބްރޫކު ވިދާޅުވީ، އެޕްރީލް މަހުގެ 3 ވަނަ ދުވަހު ދެވަނަ ޑޯޒް ޖަހަންފަށާ، މެއި މަހުގެ ނިޔަލަށް ރާއްޖޭގެ އާބާދީގެ ބޮޑު ބަޔަކަށް ވެކްސިންގެ ދެވަނަ ޑޯޒް ދެވޭނެ ކަމަށް ގަބޫލުކުރައްވާ ކަމަށެވެ.

ދެވަނަ ޑޯޒް ޖެހުމަށްފަހު ކަރަންޓީނު ނުވެ ދަތުރުކުރެވޭނެ ކަމަށާއި ބައިނަލްއަގްވާމީ ގޮތުން ވެސް އެކަން އެގޮތަށް ހިނގާނެ ކަމަށް މަބްރޫކް ވިދާޅުވިއެވެ. އަދި ރާއްޖޭގައި ވެސް އަތޮޅުތެރެއަށް ދަތުރުކުރެވޭނެ ގޮތް ހެދިގެންދާނެ ކަމަށް ވިދާޅުވިއެވެ. އެހެންނަމަވެސް އެކަމަށް ވަކި ތާރީޚެއް އަދި ދެންނެވެން ނެތް ކަމަށް މަބްރޫކް ވިދާޅުވިއެވެ. މިކަމުގެ މަޝްވަރާތައް ސަރުކާރުގެ ތެރޭގައި މިހާރުވެސް ކުރެވެމުންދާކަން މަބްރޫކު ފާހަގަ ކުރެއްވިއެވެ.