ވިއެނާ ކޮންވެންޝަނުގައި ބައިވެރިވުމުން ރާއްޖޭގެ ލައިސަންސް ބޭނުންކޮށްގެން މެންބަރު ގައުމުތަކުގައި ދުއްވޭނެ :ނަހުލާ

 ވިއެނާ ކޮންވެންޝަންސް އޮން ރޯޑް ޓްރެފިކް 1968 އާއި ވިއެނާ ކޮންވެންޝަންސް އޮން ރޯޑް ސައިންސް އެންޑް ސިގްނަލްސް 1968 ގައި ބައިވެރިވުމުން، ރާއްޖޭގެ ލައިސަންސް ބޭނުން ކޮށްގެން ކޮންވެންޝަންގައި ބައިވެރިވެފައިވާ އެހެން ގައުމުތަކުގައި އެއްގަމު އުޅަނދު ދުއްވޭނެ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.

ނަހުލާ މިހެން ވިދާޅުވީ، ވިއެނާ ކޮންވެންޝަންސް އޮން ރޯޑް ޓްރެފިކް 1968 އާއި ވިއެނާ ކޮންވެންޝަންސް އޮން ރޯޑް ސައިންސް އެންޑް ސިގްނަލްސް 1968 ގައި ރާއްޖެއިން ބައިވެރިވުމުގެ މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީން ބޭއްވި ބައްދަލުވުމުގައެވެ.

މިނިސްޓަރު ވިދާޅުވީ، މި މުއާހަދާގައި ބައިވެރިވުމަށް ނިންމީ، އަވައްޓެރި ގައުމުތަކުގައި އުޅޭ ދިވެހީންނާއި، ޚާއްސަކޮށް ކިޔަވާ ކުދިންނަށް، ވެހިކަލް ދުއްވާއިރު ދިމާވާ ދަތިތަކަށް ހައްލެއް ހޯދައިދިނުމަށް ކުރެވުނު މަސައްކަތްތަކުގެ ތެރެއިން ކަމަށެވެ. އެގޮތުން އާންމުކޮށް ދިވެހި ކިޔަވާ ކުދިން ދިރިއުޅޭ އެއްގައުމު ކަމުގައިވާ މެލޭޝިއާއަކީ ވެސް މި މުއާހަދާގެ މެންބަރެއްކަން މިނިސްޓަރު ފާހަގަކުރެއްވިއެވެ.

މި މުއާހަދާގައި ރާއްޖެއިން ސޮއި ކުރާއިރު، މުއާހަދާގެ މާއްދާއަކަށް އަމަލު ނުކުރުމަށް ނިންމާފައިވާ ކަން ފާހަގަ ކުރައްވާ، މިނިސްޓަރ ވިދާޅުވީ، އެހެން ގައުމުތަކުގެ ވެހިކަލް ގެނެސް ރާއްޖޭގައި ދުއްވޭ ގޮތަށް އޮންނަ މާއްދާއަށް ރާއްޖެއިން  އަމަލުކުރުމަށް ނިންމައިފިނަމަ، މިހާރަށްވުރެ ބޮޑަށް މާލޭގައި ތޮއްޖެހުން އިތުރުވެގެން ދާނެ ކަމަށެވެ. އެހެންކަމުން، ވަޒީރުންގެ މަޖިލީހުގައި މަޝްވަރާ ކުރިއިރު ވަޒީރުންނާއި ރައީސުލްޖުމްހޫރިއްޔާގެ ތާއީދާއެކު، އެ މާއްދާ ރިޒަވޭޝަނަށް ލުމަށް ނިންމާފައިވާކަމަށް ވެސް މިނިސްޓަރު ވިދާޅުވިއެވެ.

މިނިސްޓަރު އިތުރަށް ވިދާޅުވީ، މި މުއާހަދާގެ މަގުސަދަކީ، ރޯޑް ޓްރެފިކްގެ ރައްކާތެރިކަން ކަށަވަރުކޮށް ކުރިއެރުވުމަށްޓަކައި، އަދި ހަމަހަމަ އިޖުރާއަތްތަކެއް އެކުލަވާލުމަށްޓަކައި، އެއްގައުމުން އަނެއް ގައުމަށް ދަތުރުކުރާ އުޅަނދުތަކާ ގުޅިގެން އެފަދަ ގައުމުތަކުގެ މަގުތަކާ ޓްރެފިކް ނިޝާންތަކާ ގުޅޭ އެހެން އުސޫލުތައް އެއްގޮތް ކުރުން ކަމަށެވެ.