އެމްޕީއެލްގެ މުވައްޒަފަކު ނުލާ އެއްވެސް އާލާތެއް ދެން ދުލެއް ނުކުރާނެ: އެމްޕީއެލް
28 މާރިޗު 2021 | އާދީއްތަ 14:07ސަލާމަތީ ކަންކަން ވަރުގަދަކުރުމަށް ގިނަ މަސައްކަތްތަކެއް އެމްޕީއެލުން ކޮށްފައިވާކަމަށް ޝާހިދު ވިދާޅުވި
ވިޔަފާރި ބަނދަރު
މޯލްޑިވްސް ޕޯޓްސް ލިމިޓެޑް(އެމްޕީއެލް)ގެ އެއްވެސް އާލާތެއް އެ ކުންފުނީގެ އޮޕަރޭޓަރަކާއި، ސުޕަވައިޒަރަކާއި ސިގްނަލްމަނަކާއި ނުލައި ދޫނުކުރެވޭނެކަމަށް، އެ ކުންފުނީގެ އެމްޑީ، ޝާހިދު އަލީ ވިދާޅުވެއްޖެއެވެ.
މި އަހަރު ވިޔަފާރި ބަނދަރު ސަރަހައްދުގައި ހިނގި ނުރައްކާތެރި ދެ އެކްސިޑެންޓާއި ގުޅިގެން، އެ ކުންފުނީގެ ސަލާމަތީ ފިޔަވަޅުތަކާއި ބެހޭގޮތުން، ބައެއް ފަރާތްތަކުން ސުވާލު އުފައްދާފައިވާކަން ފާހަގަ ކުރައްވާ ޝާހިދު ވިދާޅުވީ، ހުރިހާ ބަނދަރުތަކަކީ ވެސް އޭގެ ޒާތުގައި ނުރައްކާތެރި މަސައްކަތް ކުރެވޭ ތަންތަންކަމުން އެކްސިޑެންޓެއް ހިނގުން ވަރަށް ގާތް ކަމަށެވެ. އެހެންކަމުން މީހުންގެ ސަލާމަތަށްޓަކައި ވަރަށް ގިނަ ކަންތައްތައް ކުރަންޖެހޭކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، ބަނދަރު ސަރަހައްދުގެ ސަލާމަތަށްޓަކައި 2019 ވަނަ އަހަރުން ފެށިގެން ވެސް ވަރަށް ގިނަ މަސައްކަތްތަކެއް އެމްޕީއެލުން ކޮށްފައިވާކަމަށެވެ. އޭގެ ތެރޭގައި ޕޯޓުގެ ރިސްކް އެސެސްމެންޓް ހެދުމާއި، ޕޯޓުގެ ތެރޭގައި މަސައްކަތް ކުރާ އެންމެންނަކީ ތަމްރީން ލިބިގެން ޕޯޓު ތެރެއަށް ވަދެވޭ ބަޔަކަށް ހެދުމަށް ނިންމި ނިންމުން ފާހަގަކުރެއްވިއެވެ. އެހެންނަމަވެސް ކޮވިޑް 19ގެ ބަލިމަޑުކަމާއި ގުޅިގެން، ތަމްރީން ކުރުން ލަސްވެގެން ދިޔަކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، އެމްޕީއެލްގެ އަމާޒަކީ، މިހާރު ފާސް ދޫކުރެވިފައިވާ އެންމެން ކުރިއަށް އޮތް 6 މަސް ދުވަހުގެ ތެރޭގައި ތަމްރީނު ކުރުން ކަމަށާއި، މި ޕްރޮގްރާމް ފުރިހަމަ ކުރުމަށް ފަހު ނޫނީ، އަލަށް އެއްވެސް މީހަކަށް ޕޯޓަށް ނުވަދެވޭނެ ކަމަށެވެ.
