ގދ. ތިނަދޫ ވެސް މޮނިޓަރިންގއަށް ލައިފި
އެޗްޕީއޭން ބުނީ ކޮވިޑް-19އާއި ގުޅިގެން ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް ތިނަދޫ މޮނިޓަރ ކުރަމުން ދާ ކަމަށް
ގދ. ތިނަދޫ
ގދ. ތިނަދޫން ކޮވިޑް-19ގެ އަލާމާތްތައް ހުރި ފަސް މީހަކު ބައްޔަށް ޓެސްޓު ކުރެވި ނަތީޖާ ޕޮޒިޓިވްވުމާއި ގުޅިގެން އެ ރަށް މޮނިޓަރިންގއަށް ލައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ބުނީ ކޮވިޑް-19އާއި ގުޅިގެން ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް ތިނަދޫ މޮނިޓަރ ކުރަމުން ދާ ކަމަށެވެ. އަދި ރަށުގައި މިވަގުތު ތިބި މީހުން އެ އޭޖެންސީން ވަކިގޮތެއް އަންގަންދެން ރަށުން ފޭބުމާއި، އެ އެޖެންސީގެ ހުއްދަނެތި އެއްވެސް މީހަކު ރަށަށް އެރުން މަނާ ކުރާ ކަމަށެވެ.
ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަންގާ އެންގުންތަކާއި އަދި ހިންގާ ހަރަކާތްތަކަށް އެއްބާރުލުން ދިނުމަށް އެދި އަދި އެ ރަށުގެ ކައުންސިލްގެ އިދާރާގެ ފަރާތުން ކުރަންޖެހޭ ކަންކަން ވިލަރެސް ކުރާނެ ފަރާތެއް ކަނޑައަޅައި އެންގުމަށް އެޗްޕީއޭއިން ވަނީ އެދިފައެވެ.
އަތޮޅުތެރޭގައި ކޮވިޑް-19ގެ ކޭސްތައް އިތުރުވަމުން ދާއިރު ރ. އަތޮޅު އުނގޫފާރު ކްލަސްޓަރއާއި ގުޅިގެން އެ އަތޮޅުން އަލިފުށި، ހުޅުދުއްފާރު އަދި މަޑުއްވަރި ވެސް ވަނީ މޮނީޓަރިންއަށް ލާފައެވެ. މީގެ އިތުރުން ޅ. އަތޮޅުން ވެސް ކޮވިޑަށް ޕޮޒިޓިވް ކޭސްތަކެއް ފެނިފައިވާއިރު ޅ. އަތޮޅުން އެންމެ ފުރަތަމަ ކޭހެއް ފެނުނީ އެ އަތޮޅު ނައިފަރު ސިއްހީ މަރުކަޒުންނެވެ. އެތަނުގެ މުވައްޒަފަކު ޕޮޒިޓިވްވި އިރު އެ މުވައްޒަފަކީ ރ. އުނގޫފާރަށް ގޮސްފައި އައި މުވައްޒަފެކެވެ. ޅ އަތޮޅުން ވެސް ނައިފަރާއި ހިންނަވަރު ވަނީ މޮނިޓަރިން އަށް ލާފައެވެ. އަދި މި ކްލަސްޓަރގެ ކޭހެއް ހދ. ކުޅުދުއްފުށިން ފެނި އެ ރަށް ވެސް އޮތީ މޮނިޓަރިންގެ ހާލަތުގައެވެ.
