ލުއިތައް ދިންއިރު، ޕޮޒިޓިވް ކޭސްތަކުގެ އަދަދު މައްޗަށް

ކޮވިޑް-19 އާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަޅާފައިވާ ފިޔަވަޅުތަކަށް ލުއިތައް ދިންއިރު، ޕޮޒިޓިވް ކޭސްތަކުގެ އަދަދު ވަނީ އިތުރުވެފައެވެ.

އެޗްޕީއޭއިން އާންމުކޮށްފައިވާ މައުލޫމާތުތައް ދައްކާގޮތުން ބުރާސްފަތި ދުވަހު 162 މީހުން ވަނީ ކޮވިޑަށް ޕޮޒިޓިވްވެފައެވެ. މިއީ ބުދަ ދުވަހު ޕޮޒިޓިވްވި 139 މީހުންނާއި އަޅާބަލާއިރު، 23 މީހުން އިތުރު އަދަދެކެވެ. މިއާއިއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 23،091ށް އަރާފައެވެ.

ބުރާސްފަތި ދުވަހު ޕޮޒިޓިވްވި 162 މީހުންގެ ތެރެއިން 99 މީހުން ޕޮޒިޓިވްވީ މާލެ ސަރަހައްދުންނެވެ. އަތޮޅުތެރޭގެ އެކި ރަށްރަށުން 45 މީހުން ޕޮޒިޓިވްވެފައިވާއިރު، ރިސޯޓްތަކުން 15 މީހުން ވަނީ ޕޮޒިޓިވްވެފައެވެ. އަދި ސަފާރީތަކުން ދެ މީހުންނާއި ހަދަމުންދާ ރަށްތަކުން އެކަކު ވަނީ ޕޮޒިޓިވްވެފައެވެ.

ބުރާސްފަތި ދުވަހު ބަލިން ރަނގަޅުވިކަމަށް ރިޕޯޓްކުރި 80 މީހުންނާއިއެކު ބަލިން ރަނގަޅުވި މީހުންގެ ޖުމްލަ އަދަދު ވަނީ 20،439ށް އަރާފައެވެ.

މިވަގުތު ރާއްޖޭގައި 2،579 މީހުން ކޮވިޑަށް ފަރުވާ ހޯދަމުންދާއިރު، ހޮސްޕިޓަލްގައި އެޑްމިޓްކޮށްގެން ފަރުވާ ހޯދަމުންދަނީ 103 މީހުންކަމަށް އެޗްޕީއޭއިން ބުނެއެވެ. ރާއްޖެއިން ބަލިޖެހުނު 66 މީހުން ވަނީ ނިޔާވެފައެވެ.

ކޮވިޑް-19ގެ ކޭސްތައް މާލެ ސަރަހައްދުގައި އިތުރުވަމުންދާތީ އެއްގަމު އުޅަނދު ދުއްވޭނެ ވަކި ވަގުތުތަކަކާއި ޕާކުތަކާއި މައިޒާންތައް ބަންދުކުރުމަށް އެޗްޕީއޭއިން ނިންމިއެވެ. ނަމަވެސް އަޅާފައިވާ ފިޔަވަޅުތަކަށް ލުއި ދިންއިރު، ކޭސްތަކުގެ އަދަދު މަދުވަމުން އަންނަތަން ފެނިފައެއް ނުވެއެވެ. މާލެ ސަރަހައްދުން ކޭސްތަކުގެ އަދަދު މަދުނުވާއިރު، އަތޮޅުތެރެއިން ފެންނަ ކްލަސްޓަރތައް ދަނީ އިތުރުވަމުންނެވެ.