ޅ. އަތޮޅު ކްލަސްޓަރއާ ގުޅިގެން ކުޅުދުއްފުށި މޮނީޓަރިންއަށް
25 މާރިޗު 2021 | ބުރާސްފަތި 02:06ކުޅުދުއްފުށިން ޕޮޒިޓިވްވީ އެރަށު ހޮސްޕިޓަލްއަށް ދިޔަ ބަލި މީހެއް
ހދ. ކުޅުދުއްފުށި
ޅ. އަތޮޅުން ފެނުނު ކޮވިޑް-19ގެ ކްލަސްޓަރއާ ގުޅިގެން ހދ. ކުޅުދުއްފުށި މޮނީޓަރިންގެ ހާލަތަށް ގެނެސްފިއެވެ.
ހެލްތު ޕްރޮޓެކްޝަން އެޖެންސީ އެޗްޕީއޭއިން ބުނީ ޅ. އަތޮޅުން ހދ. ކުޅުދުއްފުށި ރީޖަނަލް ހޮސްޕިޓަލްއަށް ރިފަރ ކޮށްގެން ގެންދިޔަ ބަލި މީހަކު ކޮވިޑް-19ށް ޕޮޒިޓިވްވެފައިވާ ކަމަށެވެ. އަދި އެ ކޭސްއާ ގުޅިގެން އެރަށް މޮނިޓަރިންއަށް ލައި ކޮންޓެކްޓް ޓްރޭސިން ހަދަމުން އަންނަ ކަމަށް ބުނެފައިވެއެވެ.
ޅ. އަތޮޅުން އެންމެ ފުރަތަމަ ކޭސް ފެނުނީ ޅ. ނައިފަރުން އަންގާރަ ދުވަހުއެވެ. އެއީ ރ. އުނގޫފާރުން އެރަށަށް ދިޔަ ނަރުހެކެވެ. އެ ރަށުން މިހާރު ޖުމްލަ ތިން މީހުން ޕޮޒިޓިވްވެފައިވާއިރު އެ ކްލަސްޓަރއާ ގުޅޭ ކޭސްއެއް ވަނީ ޅ. އަތޮޅު ހިންނަވަރުން ވެސް ފެނިފައެވެ. އޭގެ ތެރޭގައި ފެލިވަރުގައި މަސައްކަތްކުރާ މުވައްޒަފުން ވެސް ހިމެނޭތީ އެރަށުގެ ހާލަތު ވެސް މިހާރު އަންނަނީ ބަލަމުންނެވެ.
ނައިފަރުން ޕޮޒިޓިވްވި ކޭސްތަކުގެ ތެރެއިން އެކަކީ މާލެއިން ނައިފަރަށް އައިސް ކަރަންޓީނު ނިންމާފައި ނެނގި ސުންކުން ފައްސިވި މީހެކެވެ. އަނެއް މީހަކީ މިދިޔަ ހުކުރު ދުވަހު އުނގޫފާރަށް ދިޔަ ޅ. އަތޮޅު އަތޮޅު ހޮސްޕިޓަލުގެ ނަރުހެކެވެ.
ރ. އުނގޫފާރުން ވެސް މި މަހުގެ 20 ވަނަ ދުވަހު ކޮވިޑް-19 ކޭސްތައް ފެނުމާގުޅިގެން، 2 މާރިޗް 2021 ގެ ފަހުން ރ. އުނގޫފާރުގައި އުޅެފައި އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އަންގަން އެޗްޕީއޭއިން ވަނީ އަންގާފައެވެ. މީގެ އިތުރަށް އުނގޫފާރުން އަނބުރާ ރަށަށް ދިޔަ ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށްވެސް އެޗްޕީއޭއިން ވަނީ އަންގާފާއެވެ.
ކޮވިޑް-19ގެ ކޭސްތައް ފެނިގެން ކުޅުދުއްފުށީގެ އިތުރުން ނ. ޅޮހި، އއ. ތޮއްޑޫ، ދ. ކުޑަހުވަދޫ، ރ. އުނގޫފާރު، ފ. ނިލަންދޫ، ދ. މީދޫ، ކ. ހުރާ، ކ. ދިއްފުށި، ޅ. ނައިފަރު، ރ. މަޑުއްވަރީ، ރ. ހުޅުދުއްފާރު، ޅ. ފެލިވަރެވެ.
