ޖޮއިންޓް ވެންޗަރ ކުންފުންޏެއްގައި ހިމެނޭ ސަރުކާރުގެ ހިއްސާ އެ ކުންފުންޏެއްގައި ހިމެނޭ އަމިއްލަ ހިއްސާދާރަކަށް ނުވަތަ ހިއްސާދާރުންނަށް ވިއްކަން ނިންމޭނީ ރައީސުލްޖުމްހޫރިއްޔާގެ ލަފައާއި އެކު މިނިސްޓަރ އޮފް ފިނޭންސަށް ކަމަށް ބަޔާންކޮށް ޓޫރިސްޓް ރިޒޯޓުގެ ގޮތުގައި، ރަށްރަށާއި ބިންބިމާއި ފަޅު ތަރައްގީކުރުމަށް ކުއްޔަށް ދޫކުރުމަށްޓަކައި، ސަރުކާރުގެ ހިއްސާ ހިމެނޭގޮތަށް ހަދާފައިވާ ޖޮއިންޓް ވެންޗަރ ކުންފުނިތަކުގައި ހިމެނޭ ދިވެހިސަރުކާރުގެ ހިއްސާ ވިއްކާލުމާބެހޭ ގަވާއިދު އާންމުކޮށްފިއެވެ.

ސަރުކާރުގެ ފަރާތުން މި ގަވާއިދަށް ޢަމަލުކުރުން ލާޒިމުވާނީ ހަމައެކަނި ކުންފުނީގައި އެކުލެވިގެންވާ ސަރުކާރުގެ ހިއްސާ، ކުންފުނީގެ ހިއްސާދާރުންގެ ގޮތުގައި ދެން ތިބި އަމިއްލަ ހިއްސާދާރުންނަށް ވިއްކާލެވޭ ހާލަތުގައި އެކަނިކަމަށް އާންމުކޮށްފައިވާ ގަވައިދުގައި ވާއިރު، ސަރުކާރުގެ ހިއްސާ އެކުލެވޭ ޖޮއިންޓް ވެންޗަރ ކުންފުނިތަކުގައި ހިމެނޭ ސަރުކާރުގެ ހިއްސާ، އެ ކުންފުނީގެ ހިއްސާދާރުންގެ ގޮތުގައި ހިމެނޭ އަމިއްލަ ހިއްސާދާރުން ފިޔަވައި އެނޫން އެއްވެސް ތިންވަނަ ފަރާތަކަށް ސަރުކާރުގެ ހިއްސާ ވިއްކާލެވޭ ހާލަތުގައި އެ ގަވާއިދަށް ޢަމަލުކުރަން ސަރުކާރުގެ މައްޗަށް ލާޒިމުނުވާ ކަމަށްވެސް ބަޔާނުގައިވެއެވެ.

ޖޮއިންޓް ވެންޗަރ ކުންފުންޏެއްގައި ހިމެނޭ ސަރުކާރުގެ ހިއްސާ އެ ކުންފުންޏެއްގައި ހިމެނޭ އަމިއްލަ ހިއްސާދާރަކަށް ނުވަތަ ހިއްސާދާރުންނަށް ވިއްކާލުމަށް ރައީސުލްޖުމްހޫރިއްޔާގެ ލަފާގެ މަތިން މިނިސްޓަރ އޮފް ފިނޭންސުން ނިންމައިފި ނަމަ އެ ނިންމުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑާ ހިއްސާކުރަން ޖެހެއެވެ. އަދި ސަރުކާރުގެ ފަރާތުން ހިއްސާ ވިއްކާލުމުގެ އެއްބަސްވުމުގައި ސޮއިކުރާނީ ފިނޭންސް މިނިސްޓަރު ކަމަށް ގަވައިދުގައި ބަޔާންކޮށްފައިވެއެވެ.

ކުންފުނީގައި ހިމެނޭ އަމިއްލަ ހިއްސާދާރަކަށް ނުވަތަ ހިއްސާދާރުންނަށް ހިއްސާ ވިއްކާލުމަށް ނިންމާ ނިންމުމަށްފަހު، އެ މުއާމަލާތާ ގުޅޭ ހުރިހާ ކަމެއް ކުރިއަށް ގެންދާނީ، ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓް ކުރުމުގެ ގާނޫނުގައި ބަޔާންކޮށްފައިވާ އުސޫލުތަކާ އެއްގޮތްވާ ގޮތުގެ މަތިން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ކަމަށް ގަވައިދުގައިވެއެވެ.

މި ގަވާއިދުގެ ދެ ވަނަ މާއްދާގައި ބަޔާންކޮށްފައިވާ ފަދަ ޖޮއިންޓް ވެންޗަރ ކުންފުންޏެއްގައި ހިމެނޭ ސަރުކާރުގެ ހިއްސާ ވިއްކާލެވޭ އަގު ކަނޑައަޅާނީ، ރިޒޯޓު ތަރައްގީކުރުމުގެ ގޮތުން އެ ކުންފުންޏަކަށް ކުއްޔަށް ދޫކުރެވިފައިވާ ރަށް ނުވަތަ ފަޅު ނުވަތަ ބިމުގެ ބޮޑުމިނުގެ ކޮންމެ އަކަމީޓަރަކަށް، އެ ކުންފުނީގައި ހިމެނޭ ސަރުކާރުގެ ހިއްސާގެ، ކޮންމެ އިންސައްތައަކަށް ފަސް އެމެރިކާ ޑޮލަރުގެ މަގުން އަގު ކުރުމަށްފަހު ޖެހޭ އަދަދަށްވާ މިންވަރަށް ކަމަށް ގަވައިދުގައިވެއެވެ. އަދި މި ގަވައިދުގެ ދަށުން ސަރުކާރުގެ ހިއްސާ ވިއްކާލުމުގެ މުއާމަލާތް ކުރިއަށް ގެންދަންވާނީ، ސަރުކާރާއި، ހިއްސާ ގަންނަ ހިއްސާދާރު ނުވަތަ ހިއްސާދާރުންގެ ދެމެދުގައި ލިޔުމުން ވެވޭ ހިއްސާ ވިއްކާލުމުގެ އެއްބަސްވުމެއްގެ ދަށުންނެވެ. އެގޮތުން ހިއްސާ ވިއްކާލުމުގެ އެއްބަސްވުމުގައި ވިއްކާލެވޭ ހިއްސާގެ މިންވަރާއި ވިއްކާލެވޭ ހިއްސާގެ އަގު އަދާކުރާނޭ ގޮތުގެ ތަފުސީލުގެ އިތުރުން ވިއްކާލެވޭ ހިއްސާގެ އަގު އަދާކޮށް ނިންމުމަށް ކަނޑައެޅޭ މުއްދަތު ހިމެނެންޖެހެއެވެ.

ސަރުކާރުގެ ފަރާތުން ވިއްކާލާ ހިއްސާއަށް ކަނޑައެޅޭ އަގު، ހިއްސާ ގަންނަ ފަރާތުން އެއްފަހަރާ ދައްކައި އަގު އަދާކުރާ ގޮތަށް ނުވަތަ ހިއްސާ ވިއްކާލުމުގެ އެއްބަސްވުމުގައި ކަނޑައެޅޭ ވަކި މުއްދަތެއްގެ ތެރޭގައި ބައިބަޔަށް ބަހާލައިގެން ދައްކައި ޚަލާޞްކުރާގޮތަށް ކަނޑައެޅުމުގެ އިޚްތިޔާރު ސަރުކާރަށް ލިބިގެންވާއިރު، އަގު އަދާކުރުމަށް ދެވޭނޭ އެންމެ ދިގު މުއްދަތަކީ 18 މަސް ދުވަސްކަމަށް ގަވައިދުގައި ވަނީ ކަނޑައަޅާފައެވެ. އަދި ސަރުކާރުގެ ފަރާތުން ވިއްކާލާ ހިއްސާއަށް ކަނޑައެޅޭ އަގު، ހިއްސާ ގަންނަ ފަރާތުން އަދާކޮށް ޚަލާޞްކުރާ ތާރީޚުން ފެށިގެން ގިނަވެގެން ސަރުކާރު ބަންދު ނޫން 15 ދުވަހުގެ ތެރޭގައި، ރާއްޖޭގެ ކުންފުންޏާބެހޭ ގާނޫނުގައި، ހިއްސާ ބަދަލުކުރުމާ ގުޅޭގޮތުން ކުންފުނީގެ ފަރާތުން ފުރިހަމަކުރަންޖެހޭ އިޖުރާއަތުތައް ފުރިހަމަކޮށް ނިންމަން ޖެހޭނެ ކަމަށް ގަވައިދުގައިވެއެވެ.

ޓޫރިިޒަމާއި ބެހޭ ގާނޫނުގެ 5 ވަނަ މާއްދާގެ (ކ) ގެ ދަށުން ބާރު ލިބިގެން ހަދާފައިވާ މިގަވައިދުގެ ދަށުން ސަރުކާރު ބައިވެރިވެގެން އިންވެސްޓްކުރުމަށްޓަކައި ކުއްޔަށް ދޫކޮށްފައިވާ ރަށްރަށާއި ބިންބިމާއި ފަޅުތައް، ޓޫރިސްޓް ރިޒޯޓެއްގެ ގޮތުގައި ތަރައްޤީކުރުމަށްޓަކައި، ސަރުކާރުގެ ހިއްސާ ހިމެނޭގޮތަށް ހެދިފައިވާ ޖޮއިންޓް ވެންޗަރ ކުންފުނިތައް ކަމަށް ބަލަނީ ޓޫރިޒަމާބެހޭ ގާނޫނަށް 10 ވަނަ އިސްލާހު ގެނައުމުގެ ގާނޫނަށް އަމަލުކުރަންފެށުމުގެ ކުރިން އުފައްދާފައިވާ ކުންފުންޏާއި އެކުންފުނީގެ ހުއްދަ ކުރެވިފައިވާ ރައުސްމާލުގެ ތެރެއިން އަގު އަދާކޮށްފައިވާ ހިއްސާގެ އެއްވެސް މިންވަރެއް ދިވެހިސަރުކާރުގެ އިތުރުން، ތިންވަނަ އަމިއްލަ ހިއްސާދާރެއް ނުވާ ކުންފުނިތަކާއި ކުންފުނީގެ އަސާސީ ގަވާއިދާއި އަދި ޖޮއިންޓް ވެންޗަރ އެއްބަސްވުމުގައި އެ ކުންފުނި އުފެއްދުމުގެ މަގްސަދުގެ ގޮތުގައި ހަމައެކަނި ޓޫރިސްޓް ރިޒޯޓު ތަރައްގީކޮށް ހިންގުން ކަމަށް ބަޔާންކޮށްފައިވާ ކުންފުނިތަކެވެ.