ކުންޏާއި ވަސީލަތްތައް މެނޭޖުކުރުމާ ގުޅޭ ޤައުމީ ސިޔާސަތުގެ ސްޓްރެޓެޖީއެއް އެކުލަވާލަނީ
ރާއްޖެއަށް ދިމާވެފައިވާ ކުނީގެ މައްސަލައަށް ދެމެހެއްޓެނިވި ހައްލެއް ހޯދައިދިނުމަކީ މި ސްޓްރެޓެޖީގެ އެއް ބޭނުން
ވެމްކޯގެ މުވައްޒަފުން ކުނި ނަގަނީ
ކުންޏާއި ވަސީލަތްތައް މެނޭޖުކުރުމާ ގުޅޭ ޤައުމީ ސިޔާސަތު މުރާޖާކޮށް، އަޕްޑޭޓްކުރުމާ ގުޅޭ ޤައުމީ ސްޓްރެޓެޖީ އެކުލަވާލަން ނިންމައިފިއެވެ.
އެންވަޔަރަމަންޓް މިނިސްޓްރީން ބުނީ މިކަމަށްޓަކައި ކޮންސަލްޓެންސީގެ ޚިދުމަތް ފޯރުކޮށްދޭނެ ފަރާތެއް ހޯދަމުންދާ ކަމަށެވެ. އަދި ދިވެހިރާއްޖެއަށް ދިމާވެފައިވާ ކުނީގެ މައްސަލައަށް ދެމެހެއްޓެނިވި ހައްލެއް ހޯދައިދިނުމުގެ މަގުސަދުގައި ވޯރލްޑް ބޭންކުގެ އިންޓަނޭޝަނަލް ޑިވެލޮޕްމަންޓް އެސޯސިއޭޝަނުގެ ހިލޭ އެހީގައި އެ މިނިސްޓްރީން ހިންގާ މޯލްޑިވްސް ކްލީން އެންވަޔަރަންމަންޓް ޕްރޮޖެކްޓުގެ ދަށުން، ނޭޝަނަލް ވޭސްޓް އެންޑް ރިސޯރސް މެނޭޖުމެންޓް ޕޮލިސީ އަދި ސްޓްރެޓެޖީ އެކުލަވާލުމަށް ކޮންސަލްޓެންސީީ ޚިދުމަތް ފޯރުކޮށްދޭނެ ފަރާތެއް ބޭނުންވާ ކަމަށެވެ.
އަދި މި މަސައްކަތުގެ މައިގަނޑު މަގުސަދަކީ ކުންޏާއި ވަސީލަތްތައް މެނޭޖުކުރުމާ ގުޅޭ ޤައުމީ ސިޔާސަތުތައް މުރާޖާކޮށް، ސަރުކާރުގެ ސްޓްރެޓެޖިކް އެކްޝަން ޕްލޭނާއި އެއްގޮތްވާ ގޮތުގެ މަތިން ރައްޔިތުންގެ ޚިޔާލާއި މަޝްވަރާއާއެކު، އެ ދާއިރާ އިތުރަށް ތަރައްޤީކޮށް ހަރުދަނާކުރުމަށް ބޭނުންވާ ސްޓްރެޓެޖީ އާއި އިމްޕްލިމެންޓެންޝަން ޕްލޭނެއް (ކުރު ރާސްތާ، މެދު ރާސްތާ އަދި ދުރު ރާސްތާއަށް އަމާޒުކޮށް) އެކުލަވާލުން ކަމަށެވެ. އަދި މިހާރު އެކުލަވާލެވިފައިވާ ކުނި މެނޭޖުކުރުމާ ބެހޭ ޤާނޫނުގެ ބިލުގެ ދެލިކޮޕީއަށް ގެންނަންޖެހޭ އިޞްލާޙުތައް ގެނެސް، އެ ބިލު އަޕްޑޭޓްކުރުމަކީވެސް މަގުސަދެއް ކަމަށް މިނިސްޓްރީން ބުނެއެވެ.
މިނިސްޓްރީން ވަނީ މި މަސައްކަތަށް ޝައުގުވެރިވާ ފަރާތެއް ހޯދުމަށް އިއުލާންވެސް ކޮށްފައެވެ. އަދި މި މަސައްކަތް ކުރުމަށް ޝައުގުވެރިވާ، އެ ދާއިރާގެ ތަޖުރިބާހުރި، ކޮންސަލްޓެންސީ ފާރމްތަކުން ޝައުޤުވެރިކަން ފާޅުކޮށް "އެކްސްޕްރެޝަން އޮފް އިންޓަރެސްޓް" ހުށަހެޅުމުގެ ދަޢުވަތު ހުޅުވާލާފައިވާ ކަމަށް އެންވަޔަރަމަންޓް މިނިސްޓްރީން ބުނެއެވެ. މީގެ އިތުރުން ޝައުގުވެރިވާ ފާރމްތަކުން، މި މަސައްކަތް ފުރިހަމަކުުރުމަށް އެ ފަރާތްތަކުގެ ޤާބިލިއްޔަތާއި، ކަމާ ގުޅޭ ތަޖުރިބާ ހުރިކަން އަންގައިދޭކަން ސާބިތުކޮށްދިނުމާއެކު ޝައުޤުވެރިކަން ފާޅުކޮށް ހުށަހަޅާ ލިޔުން (އެކްސްޕްރެޝަން އޮފް އިންޓަރެސްޓް)، މި މަސައްކަތަށް ޝައުގުވެރިވާ ފަރާތުގެ / ފާރމްގެ ޕްރޮފައިލް، ކުރީގައި މިފަދަ ޚިދުމަތްތައް ފޯރުކޮށްދީފައިވާ ތަންތަނުން ދީފައިވާ ތަޖުރިބާގެ ލިއުންތަކާއި، އޭގެ ތަފުޞީލު އަދި ހުށަހަޅާ ޓީމުގައި ހިމެނޭ މެންބަރުން (ކީ އެކްސްޕާޓުން) ގެ ވަނަވަރާއި، ތަޢުލީމީ ސެޓްފިކެޓްތަކުގެ ކޮޕީ ހުށަހެޅުމަށް ވަނީ އަންގާފައެވެ.
މިނިސްޓްރީން ބުނީ މި މަސައްކަތަށް ޝައުގުވެރިވާ އަދި ޝަރުތުހަމަވާ ފަރާތްތަކުން އަންނަ އޭޕްރީލް މަހުގެ 15 ވާ ބުރާސްފަތި ދުވަހުގެ މެންދުރު 1:00 ގެ ކުރިން އީމެއިލް މެދުވެރިކޮށް "އެކްސްޕްރެޝަން އޮފް އިންޓަރެސްޓް" ހުށަހެޅުމަށް އެދޭ ކަމަށެވެ.
