މައްސަލަ ބޮޑުވެފައިވާ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންތިޚާބު ބޭއްވުމަށް ފުރިހަމައަށް ވީއޭއެމުގެ އިންތިޚާބީ ރައީސް މުޙައްމަދު ލަތީފަށް އެއްބާރުލުން ދޭނެ ކަމަށް ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ) ވިދާޅުވެއްޖެއެވެ.

އަންގާރަ ދުވަހު ދުނިޔޭގެ ވޮލީބޯޅައިގެ މައި ޖަމުޢިއްޔާ އެފްއައިވީބީ އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ، އުފައްދާފައިވާ "އެޑްހޮކް ކޮމިޝަން" އިން ވަނީ ވީއޭއެމުގެ މައްސަލަ ނިންމައި، އަންނަ އޭޕްރީލް މަހު އައު އިންތިޚާބު ބޭއްވުމަށް އަންގާފައެވެ. އެގޮތުން އެފްއައިވީބީގެ އެންގުމުގައި ވަނީ މައްސަލަ ބޮޑުވެފައިވާ ވީއޭއެމުގެ އިންތިޚާބުގައި ވޯޓުލެވޭނީ 2015 ވަނަ އަހަރުން ފެށިގެން 2018 ވަނަ އަހަރާ ދެމެދުގެ ތެރެއިން، މަދުވެގެން ތިން އަހަރު ކޮންމެވެސް އެއް މުބާރާތެއްގައި ވާދަކޮށްފައިވާ ކުލަބުތަކަށް ކަމަށެވެ. އެ ގޮތުން ތިން އަހަރުގައި ގަވާއިދުން އެއް މުބާރާތެއް ކުޅެފައިވަނީ ޖުމްލަ ނުވަ ކުލަބެއް ކަމަށާއި، އެހެންކަމުން އައު އިންތިޚާބުގައި ވޯޓުލުމުގެ ހައްގު ލިބިގެންދާނީ އެ ނުވަ ކުލަބަށް ކަމަށްވެސް ވަނީ އަންގާފައެވެ.

މީގެ ކުރިން ވީއޭއެމުގެ އިންތިޚާބީ ހިންގާ ކޮމިޓީ އުވާލީ ހީނާއެވެ. އެގޮތުން ވީއޭއެމް ހިންގުން ނޯމަލައިޒިން ކޮމިޓީއާ ހަވާލުކޮށްފައިވަނީ 2019 ވަނަ އަހަރުގެ ޖޫން މަހުގެ 10 ވަނަ ދުވަހުއެވެ. ފުރަތަމަ ފަސް މެންބަރުންގެ ކޮމިޓީއަކުން ވީއޭއެމް ހިންގާފައިވާއިރު، އެފްއައިވީބީގެ އިންޒާރާއެކު ފަހުން އެ ކޮމިޓީ އުވާލިއެވެ.

އެކަމަކު އެއަށްފަހު 2019 ވަނަ އަހަރުގެ އޮކްޓޯބަރު މަހުގެ 31 ވަނަ ދުވަހު ވީއޭއެމްގެ މެންބަރު ކުލަބުތަކުން އިސްވެ ބޭއްވި އެކްސްޓްރާ އޯޑިނަރީ ކޮންގްރެސްގައި ވަނީ ލަތީފުގެ އިތުބާރު ނެތްކަމުގެ ވޯޓެއްނަގާފައެވެ. އެއާއެކު އެ އަހަރުގެ ނޮވެމްބަރު މަހުގެ 19 ވަނަ ދުވަހު ކޮމިޝަނާ އޮފް ސްޕޯޓްސް ވަނީ ވީއޭއެމުގެ އިންތިޚާބު ބޭއްވެންދެން ކުރަންޖެހޭ ކަންކަން ކުރުމަށާއި، ވީއޭއެމުގެ ދުވަހުން ދުވަހަށް ކުރަންޖެހޭ ކަންކަން ކުރުމަށް ތިން މެންބަރުންގެ މައްޗަށް އެކުލެވިގެންވާ ނޯމަލައިޒިންގ ކޮމިޓީއެއް އެކުލަވާލާފައެވެ.

ވީއޭއެމުގެ މައްޗަށް ބަސްބުނެ ވާހަކަދެއްކުމުގެ އެއްވެސް ޙައްޤެއް ލަތީފަށް ލިބިގެންނުވާ ކަމަށާއި ވޮލީބޯޅައިގެ ކުލަބުތާއި، ސިވިލް ކޯޓުންވެސް އެގޮތަށް ނިންމާފައިވާ ކަމަށް މީގެ ކުރިން ހީނާ ވިދާޅުވެފައިވާތީ، އިންތިޚާބު ބޭއްވުމަށް ލަތީފަށް ފުރުސަތު ދޭނެތޯ ކުރެވުނު ސުވާލަކަށް ޖަވާބުދެއްވަމުން ހިނާ ވިދާޅުވީ އެފްއައިވީބީން އެންގި އެންގުމަށް ކޮމިޝަނާ އޮފް ސްޕޯޓްސްގެ ހައިސިއްޔަތުން ފުރިހަމައަށް އެއްބާރުލުން ދޭނެ ކަމަށެވެ.

މި ހިނގާ މާޗު މަހުގެ 24 ވަނަ ދުވަހު ފުރަތަމަ ކޮންގްރެސް ބޭއްވުމަށްފަހު އަންނަ އެޕްރީލް މަހުގެ އެއްވަނަ ދުވަހު ވީއޭއެމުގެ އިންތިޚާބު ބޭއްވުމަށް އެފްއައިވީބީން އަންގާފައިވާއިރު، ހީނާ ވިދާޅުވީ އެ ތާރީޚުތަކަށް އެކަންކޮށް ނިންމަން ޖެހޭ ކަމަށާއި، އިންތިޚާބުގައި ކުރިމަތިލާ ކެންޑިޑޭޓުންނަށް އިންތިޚާބަށް ތައްޔާރުވުމަށް ފުރިހަމަ ވަގުތު ލިބުނު ކަމަށް ގަބޫލުކުރައްވާ ކަމަށެވެ.

ހީނާ ވިދާޅުވީ އެފްއައިވީބިން ވީއޭއެމުގެ އިންތިޚާބުގައި ވޯޓުލެވޭނެ ކަމަށް ބުނެފައިވާ ނުވަ ކުލަބުގެ އެއްވެސް މައްސަލައެއް ނެތް ކަމަށާއި، އެ ކުލަބުތަކަކީ ކޮމިޝަނާ އޮފް ސްޕޯޓްސްއިން ލިޔުންދީފައިވާ ކުލަބުތައް ކަމަށެވެ. އަދި އެ ކުލަބުތަކުގެ ސައްޙަކަން އެފްއައިވީބީއަށްވެސް މީގެ ކުރިން ފޮނުވާފައިވާ ކަމަށް ހީނާ ވިދާޅުވިއެވެ.

ވީއޭއެމުގެ އިންތިޚާބުގައި ނުވަ ކުލަބަށް ވޯޓުލެވޭއިރު، އެ ކުލަބުތަކުގެ ތެރޭގައި ހިމެނެނީ ދިވެހި ސިފައިންގެ ކުލަބު، ޕޮލިސް ކުލަބު، އައްޑޫ ސްޕޯޓްސް ކުލަބު، ސްޕޯޓްސް ކުލަބު ހޯކްސް، ގުޑީސް ސްޕޯޓްސް ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން، ޔޫތު ނިއު ޖަނަރޭޝަން އަދި ކުލަބު ހާފް ލައިން ލިންކޭޖެވެ.

އެފްއައިވީބީގެ ނިންމުމާއެކު ވީއޭއެމުގެ އިންތިޚާބު ބޭއްވުމަށް ދެ ކޮންގްރެސް އެއް ބޭއްވިގެންދާނެއެވެ. އޭގެ ތެރޭއިން އިންތިޚާބީ ކޮންގްރެސްއަށް ތައްޔާރުވުމުގެ ގޮތުން ބާއްވާ ކޮންގްރެސް މި މަހުގެ 24 ވަނަ ދުވަހު ބޭއްވުމަށް އެފްއައިވީބީން ވަނީ އަންގާފައެވެ. އެ ކޮންގްރެސްގައި ވީއޭއެމުގެ އިންތިޚާބުގައި ވޯޓުލެވޭނެ ކުލަބުތައް ފައިނަލް ކުރުމާއި، އިންތިޚާބާ ގުޅޭ އެންމެހާ ކަންކަން ނިންމަން ޖެހޭނެއެވެ. އަދި ދެވަނަ ކޮންގްރެސްގައި ވީއޭއެމުގެ އިންތިޚާބު ބާއްވަން ޖެހޭއިރު، އަންނަ އޭޕްރީލް މަހުގެ އެއްވަނަ ދުވަހު އެ ކޮންގްރެސް ބޭއްވުމަށް އެފްއައިވީބީން ވަނީ އެދިފައެވެ. އެއާއެކު އަންނަ ހަފުތާގެ ބުދަ ދުވަހު ފުރަތަމަ ކޮންގްރެސް ބޭއްވުމަށް ވީއޭއެމުން މިހާރު ނިންމާފައިވާއިރު އެކަމުގެ ލިޔުންތައް ކުލަބުތަކަށާއި ކޮމިޝަނާއަށް މިހާރު ވަނީ ފޮނުވާފައެވެ.