ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ މައްސަލަ ހައްލުކުރުމަށް ދުނިޔޭގެ ވޮލީބޯޅައިގެ މައި ޖަމުޢިއްޔާ (އެފްއައިވީބީ) އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ، އުފައްދާފައިވާ "އެޑްހޮކް ކޮމިޝަން" އިން ވީއޭއެމުގެ މައްސަލަ ނިންމައި، އައު އިންތިޚާބަކަށް ދިޔުމަށް ގައިޑްލައިނެއް އެކުލަވާލައިފިއެވެ.

ވީއޭއެމުގެ އެންމެފަހުގެ އިންތިޚާބީ ރައީސް މުޙައްމަދު ލަތީފަށްވެސް އެޑްރެސްކޮށް އަންގާފައިވާ އެންގުމުގައި ވަނީ މައްސަލަ ބޮޑުވެފައިވާ ވީއޭއެމުގެ އިންތިޚާބުގައި ވޯޓުލެވޭނީ 2015 ވަނަ އަހަރުން ފެށިގެން 2018 ވަނަ އަހަރާ ދެމެދުގެ ތެރެއިން، މަދުވެގެން ތިން އަހަރު ކޮންމެވެސް އެއް މުބާރާތެއްގައި ވާދަކޮށްފައިވާ ކުލަބުތަކަށް ކަމަށެވެ. އެ ގޮތުން ތިން އަހަރުގައި ގަވާއިދުން އެއް މުބާރާތެއް ކުޅެފައިވަނީ ޖުމްލަ ނުވަ ކުލަބެއް ކަމަށާއި، އެހެންކަމުން އައު އިންތިޚާބުގައި ވޯޓުލުމުގެ ހައްގު ލިބިގެންދާނީ އެ ނުވަ ކުލަބަށް ކަމަށްވެސް ވަނީ އަންގާފައެވެ.

އެ ކުލަބުތަކުގެ ތެރޭގައި ހިމެނެނީ ދިވެހި ސިފައިންގެ ކުލަބު، ޕޮލިސް ކުލަބު، އައްޑޫ ސްޕޯޓްސް ކުލަބު، ސްޕޯޓްސް ކުލަބު ހޯކްސް، ގުޑީސް ސްޕޯޓްސް ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން، ޔޫތު ނިއު ޖަނަރޭޝަން އަދި ކުލަބު ހާފް ލައިން ލިންކޭޖެވެ.

އެފްއައިވީބީގެ ނިންމުމާއެކު ވީއޭއެމުގެ އިންތިޚާބު ބޭއްވުމަށް ދެ ކޮންގްރެސް އެއް ބޭއްވިގެންދާނެއެވެ. އޭގެ ތެރޭއިން އިންތިޚާބީ ކޮންގްރެސްއަށް ތައްޔާރުވުމުގެ ގޮތުން ބާއްވާ ކޮންގްރެސް މި ހިނގާ މާޗު މަހުގެ 24 ވަނަ ދުވަހު ބޭއްވުމަށް އެފްއައިވީބީން ވަނީ އަންގާފައެވެ. އެ ކޮންގްރެސްގައި ވީއޭއެމުގެ އިންތިޚާބުގައި ވޯޓުލެވޭނެ ކުލަބުތައް ފައިނަލް ކުރުމާއި، އިންތިޚާބާ ގުޅޭ އެެންމެހާ ކަންކަން ނިންމަން ޖެހޭނެއެވެ. އަދި ދެވަނަ ކޮންގްރެސްގައި ވީއޭއެމުގެ އިންތިޚާބު ބާއްވަން ޖެހޭއިރު، އަންނަ އޭޕްރީލް މަހުގެ އެއްވަނަ ދުވަހު އެ ކޮންގްރެސް ބޭއްވުމަށް އެފްއައިވީބީން ވަނީ އެދިފައެވެ. އެއާއެކު އަންނަ ހަފުތާގެ ބުދަ ދުވަހު ފުރަތަމަ ކޮންގްރެސް ބޭއްވުމަށް ވީއޭއެމުން މިހާރު ވަނީ ތާވަލުކޮށްފައެވެ. އަދި އެ ކޮންގްރެސްގައި އިންތިޚާބު ބާއްވާ ދުވަސް ފައިނަލް ކުރާނެއެވެ.

ވީއޭއެމުގެ އިންތިޚާބު ބާއްވަން އެފްއައިވީބިން އެންގިއިރު، މައްސަލަތައް ބޮޑުވެ ވީއޭއެމުގެ އިންތިޚާބީ ހިންގާ ކޮމިޓީ އުވާލައި، ނޯމަލައިޒިންގ ކޮމިޓީއާ އެ އެސޯސިއޭޝަން ހިންގުން ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ) ހަވާލުކޮށްފައިވަނީ 2019 ވަނަ އަހަރުގެ ޖޫން މަހުގެ 10 ވަނަ ދުވަހުއެވެ. ފުރަތަމަ ފަސް މެންބަރުންގެ ކޮމިޓީއަކުން ވީއޭއެމް ހިންގާފައިވާއިރު، އެފްއައިވީބީގެ އިންޒާރާއެކު ފަހުން އެ ކޮމިޓީ އުވާލިއެވެ.

އެކަމަކު އެއަށްފަހު 2019 ވަނަ އަހަރުގެ އޮކްޓޯބަރު މަހުގެ 31 ވަނަ ދުވަހު ވީއޭއެމްގެ މެންބަރު ކުލަބުތަކުން އިސްވެ ބޭއްވި އެކްސްޓްރާ އޯޑިނަރީ ކޮންގްރެސްގައި ވަނީ ލަތީފުގެ އިތުބާރު ނެތްކަމުގެ ވޯޓެއްނަގާފައެވެ. އެއާއެކު އެ އަހަރުގެ ނޮވެމްބަރު މަހުގެ 19 ވަނަ ދުވަހު ކޮމިޝަނާ އޮފް ސްޕޯޓްސް ވަނީ ވީއޭއެމުގެ އިންތިޚާބު ބޭއްވެންދެން ކުރަންޖެހޭ ކަންކަން ކުރުމަށާއި، ވީއޭއެމުގެ ދުވަހުން ދުވަހަށް ކުރަންޖެހޭ ކަންކަން ކުރުމަށް ތިން މެންބަރުންގެ މައްޗަށް އެކުލެވިގެންވާ ނޯމަލައިޒިންގ ކޮމިޓީއެއް އެކުލަވާލާފައެވެ.

ކުރިއަށް އޮތް ވީއޭއެމުގެ އިންތިޚާބުގައި ވާދަނުކުރައްވަން ލަތީފް ނިންމާފައިވާއިރު، މި އަހަރުގެ ފެބްރުއަރީ މަހުގެ 22 ވަނަ ދުވަހު ލަތީފުގެ ދައުރު ވަނީ ހަމަވެފައެވެ.