ކ. މާލެ
|
17 މާރޗް 2021 | ބުދަ 09:12
މޯލްޑިވްސް އިންލޭންޑް ރެވެނިއު އޮތޯރިޓީ
މޯލްޑިވްސް އިންލޭންޑް ރެވެނިއު އޮތޯރިޓީ
ޔޫސުފް ސޮފްވާން ރަޝީދު
އެޑްވާންސް ޕްރައިސިންގ އެރޭންޖްމަންޓް ގަވައިދު
އެޑްވާންސް ޕްރައިސިންގ އެރޭންޖްމަންޓް ގަވައިދު އާންމުކޮށްފި
 
މަރޗް 16 ވަނަ ދުވަހު ގަވައިދު ގެޒެޓްކޮށް، ގަވައިދަށް އަމަލުކުރަން ވަނީ ފަށާފައި
 
ޕްރައިސިންގ އެއްބަސްވުމަކަށް އެދި ހުށަހަޅައިފައިވާ ހުށަހެޅުމުގައި ކަމެއް އުނިވާނަމަ އެކަމެއް ފުރިހަމަކުރުމަށް 45 ދުވަހުގެ ތެރޭގައި މީރާއިން އަންގަންޖެހޭ
 
މީރާއާއެކު އެޑްވާންސް ޕްރައިސިންގ އެއްބަސްވުމެއް ގާއިމުކުރުމަށް އެދި، "އެޑްވާންސް ޕްރައިސިންގ އެއްބަސްވުމަށް އެދުން" ފޯމު ފުރިހަމަކުރަން ޖެހޭ

ޓެެކްސް ދައްކާ ފަރާތަކުން ގުޅުންހުރި ފަރާތަކާއެކު ކުރުމަށް ގަސްތުކުރާ މުޢާމަލާތަކާ ގުޅިގެން އެޑްވާންސް ޕްރައިސިންގ އެއްބަސްވުމެއް ގާއިމުކުރުމުގައި އަމަލުކުރާނެ އުސޫލުތައް ބަޔާންކޮށް އެޑްވާންސް ޕްރައިސިންގ އެރޭންޖްމަންޓް ގަވައިދު މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ގެޒެޓްކޮށްފިއެވެ.

ޓެކްސް ނެގުމާބެހޭ އިދާރީ ގާނޫނުގެ 1-53 ވަނަ މާއްދާގެ (ރ)ގެ ދަށުން މީރާގެ ބޯޑަށް ލިބިދޭ އިޚްތިޔާރުގެ ދަށުން ހަދާފައިވާ މިގަވައިދުގެ ދަށުން އާމްދަނީން ޓެކްސް ނެގުމުގެ ޤާނޫނުގެ 68 ވަނަ މާއްދާގެ (ރ) ރައްދުވާ ބައިނަލްއަގްވާމީ މުއާމަލާތެއް ކޮށްފައިވާ ނުވަތަ ކުރަން ގަސްތުކުރާ ފަރާތްތަކުގެ ތެރެއިން ރާއްޖޭގައި ވަޒަންވެރިވެފައިވާ ފަރާތްތަކާއި އެ މާއްދާ ރައްދުވާ ބައިނަލްއަގްވާމީ މުއާމަލާތެއް ކޮށްފައިވާ ނުވަތަ ކުރަން ގަސްދުކުރާ ފަރާތްތަކުގެ ތެރެއިން، ރާއްޖޭގައި ހުރި އެ ފަރާތުގެ ދާއިމީ މަރުކަޒެއް މެދުވެރިކޮށް ވިޔަފާރިކުރާ، އަދި ރާއްޖޭގައި ވަޒަންވެރިވެފައިނުވާ ފަރާތްތަކަށް އެޑްވާންސް ޕްރައިސިންގ އެއްބަސްވުމެއް ޤާއިމުކުރުމަށް އެދި ހުށަހެޅޭނެ ކަމަށް ގަވައިދުގައި ބުނެފައިވެއެވެ.

މި ގަވާއިދުގެ ދަށުން އެޑްވާންސް ޕްރައިސިންގ އެއްބަސްވުމެއް ގާއިމުކުރުމަށް އެދޭ ފަރާތްތަކުން ޕްރީ-ފައިލިންގ ކޮންސަލްޓޭޝަނަކަށް އެދި، "ޕްރީ-ފައިލިންގ ކޮންސަލްޓޭޝަނަކަށް އެދުން" ފޯމު ފުރިހަމަކުރުމަށްފަހު، އެ ފޯމުގައި ކަނޑައަޅައިފައިވާ މައުލޫމާތާއި ލިޔެކިޔުންތަކާއެކު މީރާއަށް ހުށަހަޅަންޖެހެއެވެ. އަދި ބައިލެޓަރަލް ނުވަތަ މަލްޓިލެޓަރަލް އެޑްވާންސް ޕްރައިސިންގ އެއްބަސްވުމަކާ ގުޅޭ ޕްރީ-ފައިލިންގ ކޮންސަލްޓޭޝަނެއްނަމަ، އެ ކޮންސަލްޓޭޝަނުގައި ރާއްޖޭގެ ކޮމްޕިޓަންޓް އޮތޯރިޓީ، ނުވަތަ އެ ކޮމްޕިޓަންޓް އޮތޯރިޓީ ތަމްސީލުކުރާ ފަރާތް ބައިވެރިވާންޖެހެއެވެ.

މި ގަވާއިދުގެ 4 ވަނަ މާއްދާގެ ދަށުން ޕްރީ-ފައިލިންގ ކޮންސަލްޓޭޝަން ފުރިހަމަކޮށްފައިވާ ފަރާތްތަކުގެ ތެރެއިން، މީރާއާއެކު އެޑްވާންސް ޕްރައިސިންގ އެއްބަސްވުމެއް ގާއިމުކުރުމަށް އެދި، "އެޑްވާންސް ޕްރައިސިންގ އެއްބަސްވުމަށް އެދުން" ފޯމު ފުރިހަމަކުރުމަށްފަހު، އެ ފޯމުގައި ކަނޑަޅާފައިވާ މައުލޫމާތާއި ލިޔެކިޔުންތަކާއެކު މީރާއަށް ހުށަހަޅަންޖެހެއެވެ. މިފޯމުގައި ހިމަނަންޖެހޭ ކަންކަމާއި މައުލޫމާތުގެ ތެރޭގައި ޓެކްސް ދައްކާ ފަރާތުން ހިންގާ ވިޔަފާރި ހަރަކާތްތަކުގެ އަދި އެޑްވާންސް ޕްރައިސިންގ އެގްރީމަންޓުގައި ހިމެނުމަށް އެ ފަރާތުން ހުށަހަޅާ މުއާމަލާތްތައް ނުވަތަ އިންތިޒާމުތަކުގެ ތައާރަފަކާއި، އެޑްވާންސް ޕްރައިސިންގ އެއްބަސްވުމުގެ ހުދޫދާއި މުއްދަތުގެ ގޮތުގައި ހުށަހަޅާ ހުށަހެޅުމާއި، އާމްދަނީން ޓެކްސް ނެގުމުގެ ގާނޫނުގެ ގެ 68 ވަނަ މާއްދާގެ (ށ)އެ މުއާމަލާތަށް ނުވަތަ އިންތިޒާމަށް ރައްދުވާ ގޮތުގެ ތަފްސީލާއި އާމްދަނީން ޓެކްސް ނެގުމުގެ ގާނޫނުގެ 67 ވަނަ މާއްދާގައި ބަޔާންކޮށްފައިވާ އާމްސް ލެންތުގެ އުސޫލުތަކާ އެއްގޮތަށް، އެޑްވާންސް ޕްރައިސިންގ އެއްބަސްވުން މެދުވެރިކޮށް، ޓްރާންސްފަރ ޕްރައިސް ކަނޑައަޅަން ހުށަހަޅާ ގޮތުގެ ތަފްސީލް ހިމެނެއެވެ.

މީގެ އިތުރުން ހުށަހަޅާ މުއާމަލާތުގައި ނުވަތަ އިންތިޒާމުގައި ބައިވެރިވާ ގުޅުންހުރި ފަރާތަކަކީކޮން ފަރާތެއްކަމާއި، ޓެކުހުގެ ބޭނުމަށް އެ ފަރާތް ވަޒަންވެރިވެފައިވަނީ ކޮން ތަނެއްގައިކަމުގެ އިތުރުން ޓެކްސް ދައްކާ ފަރާތުން އެ އެޑްވާންސް ޕްރައިސިންގ އެއްބަސްވުމުގައި ބައިވެރިކުރާން އެދޭ އެހެން ޖުރިސްޑިކްޝަން ނުވަތަ ޖުރިސްޑިކްޝަންތަކަކީ ކޮބައިކަން އަދި މިހާރު ބޭނުންކުރަމުންދާ ނުވަތަ ބޭނުންކުރަން ގަސްދުކުރާ ޓްރާންސްފަރ ޕްރައިސިންގ މެތަޑަށާއި، އެއްބަސްވުމުގެ ބައިވެރިއަކަށް ނިސްބަތްވާ އެއްވެސް މައުލޫމާތަކަށް އަސަރުކޮށްފާނެ މައުލޫމާތުތައް "އެޑްވާންސް ޕްރައިސިންގ އެއްބަސްވުމަށް އެދުން" ފޯމުގައި ހިމަނަންޖެހެއެވެ.

މި މާއްދާގެ ދަށުން އެޑްވާންސް ޕްރައިސިންގ އެއްބަސްވުމަކަށް އެދި ހުށަހަޅައިފައިވާ ހުށަހެޅުމުގައި ކަމެއް އުނިވާނަމަ، ނުވަތަ ހުށަހަޅާންޖެހޭ ލިޔެކިޔުމެއް މަދުވާނަމަ، އެ ކަމެއް ފުރިހަމަކުރުމަށް 45 ދުވަހުގެ ތެރޭގައި ޓެކްސް ދައްކާ ފަރާތަށް މީރާއިން އަންގަންޖެހެއެވެ. މާއްދާގެ (ނ)ގެ ދަށުން ހުށަހެޅުން ފުރިހަމަކުރުމަށް، ޓެކްސް ދައްކާ ފަރާތަށް، 30 ދުވަހަށްވުރެ ކުރުނޫން މުއްދަތެއް ދޭންޖެހޭއިރު، މި މާއްދާގެ (ރ)ގެ ދަށުން، ހުށަހެޅުން ފުރިހަމަކުރުމަށް ދެވޭ މުއްދަތުގައި އެ ހުށަހެޅުން ފުރިހަމަކޮށްފައި ނުވާނަމަ، އެ ގޮތަށް ޢަމަލުނުކުރެވުނު ސަބަބު ބަޔާންކުރުމަށް 15 ދުވަހުގެ މުއްދަތެއް ދިނުމަށްފަހު، އެ ހުށަހެޅުން އިތުރަށް ކުރިޔަށް ނުގެންދިއުމަށް ނިންމުމުގެ އިޚްތިޔާރު، ޔުނިލެޓަރަލް އެޑްވާންސް ޕްރައިސިންގ އެއްބަސްވުމެއް ނަމަ، ހަވާލުވެހުރި މީރާގެ އޮފިސަރަށް، އަދި ބައިލެޓަރަލް ނުވަތަ މަލްޓިލެޓަރަލް އެޑްވާންސް ޕްރައިސިންގ އެއްބަސްވުމެއް ނަމަ، ރާއްޖޭގެ ކޮމްޕިޓަންޓް އޮތޯރިޓީއަށް ލިބިގެންވެއެވެ.

އެޑްވާންސް ޕްރައިސިންގ އެއްބަސްވުމަކަށް އެދި ހުށަހަޅައިފައިވާ ހުށަހެޅުން، އެ އެއްބަސްވުމުގައި ސޮއިކުރުމުގެ ކުރިން، ހުށަހެޅި ފަރާތަށް އަނބުރައި ގެންދެވޭއިރު، އެގޮތުން ހުށަހެޅުން އަނބުރައި ގެންދާނަމަ، ލިޔުމުން މީރާއަށް އެކަން އަންގަންޖެހެއެވެ. އަދި އެޑްވާންސް ޕްރައިސިންގ އެއްބަސްވުމުގެ މުއްދަތުގެ ތެރޭގައި ހިމެނޭ ކޮންމެ ޓެކްސް އަހަރަކަށް، އަހަރީ ކޮމްޕްލައަންސް ރިޕޯޓެއް، އެ ޓެކްސް އަހަރަށް ހުށަހަޅާ އިންކަމް ޓެކްސް ބަޔާނާއެކު، ވިދިގެން އަންނަ ޓެކްސް އަހަރުގެ ޖޫން މަހުގެ 30 ވަނަ ދުވަހުގެ ނިޔަލަށް ހުށަހަޅަންޖެހެއެވެ.

މީގެ އިތުރުން މިގަވައިދުގައި އެއްބަސްވެފައިވާ ގޮތަށް އަމަލުނުކުރުން ނުވަތަ ހާލަތު ބަދަލުވުމުން އަމަލުކުރާނެ ގޮތާއި އެޑްވާންސް ޕްރައިސިންގ އެއްބަސްވުން ބާތިލުކުރާނެ ގޮތުގެ އިތުރުން އެޑްވާންސް ޕްރައިސިންގ އެއްބަސްވުން ނިމުމަކަށް ގެންނާނެ ގޮތް އަދި އެޑްވާންސް ޕްރައިސިންގ އެއްބަސްވުން އިސްލާހުކުރާނެ ގޮތް ވަނީ އަންގާފައެވެ. އަދި ބައިލެޓަރަލް ނުވަތަ މަލްޓިލެޓަރަލް އެޑްވާންސް ޕްރައިސިންގ އެއްބަސްވުންތަކުގެ މައުލޫމާތު މިގަވައިދުގައި ހިމެނެއެވެ.

މަރޗް 16 ވަނަ ދުވަހު ގަވައިދު ގެޒެޓްކޮށް، ގަވައިދަށް އަމަލުކުރަން ވަނީ ފަށާފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ނަހްދާ އާދަމް
0%
0%
0%
0%
0%
0%
ކޮމެންޓް