ކޮވިޑް-19ގެ ބަލިމަޑުކަމުގެ މިހާލަތުގައި ގައިދުރުކޮށް ސަފުހަދައިގެން ޖަމާއަތުގައި ނަމާދުކުރުމަކީ ހުއްދަ ކަަމެއް ކަަމަށް އިސްލާމީ ފަތުވާދޭ އެންމެ މަތީ މަޖިލީހުން ކަނޑައަޅައިފިއެވެ.

ފަތުވާދޭ މަޖިލީހުން މިގޮތަށް ކަނޑައަޅާފައި މިވަނީ، މި މައުޟޫޢުގައި ދުނިޔޭގެ ގިނަ ގައުމުތަކުގެ ފަތުވާ މަޖިލީސްތަކުން ނެރެފައިވާ ފަތުވާތަކަށް ބިނާކޮށެވެ. އެގޮތުން މީސްތަކުންގެ މެދުގައި ހަލުވިކަމާއެކު ކޮވިޑް ވައިރަސް ފެތުރިދާނެ ކަމުގެ ބިރަށްޓަކައި މީސްތަކުން އެއްވެގެން ހެދޭ ޖަމާޢަތްތައް ހެދުން ހުއްޓާލުން ޞައްޙަ ކަމަށެވެ. ސަބަބަކީ އިސްލާމީ ޝަރީޢަތުގެ މަޞްދަރުތައް ބިނާވެފައި ވަނީ މީސްތަކުންނަށް ލުއިފަސޭހަކޮށްދީ ބުރަކަން ނައްތާލާ ޟަރޫރީ ޙާލަތުން ދިފާޢުވެ، މަޤްސަދާ ނައްތާލުމަށް ކަމަށްވާތީއެވެ.

މިކަމުގައި އޮތް މަޤްސަދާގެ އަޞްލަކީ މީސްތަކުން އެއްތަނަކަށް ޖަމާވުންކަމަށް ކަމާބެހޭ ޞިއްޙީ މާހިރުން ހާމަކުރާކަމަށާއި، އެހެންކަމުން މިކަމުގައި މުސްލިމުންގެ މައްޗަށް ލާޒިމުވެގެންވަނީ އިތުބާރުހުރި ޞިއްޙީ މާހިރުން ދޭ މަޢުލޫމާތުގެ މައްޗަށް ބުރަވެތިބެ އެއާ އެއްގޮތަށް ޢަމަލު ކުރުންކަމަށެވެ. އަދި މިއަމުރުތަކަށް ތަބާވުމަކީ ޝަރުޢީ ގޮތުން އޮތް ވާޖިބުކަމެއްކަމަށް ބުނެފައިވެއެވެ. އެއީ އެއަމުރުތަކާ ޚިލާފުވުމުން ނަފުސުތަކަށް ލިބޭ ގެއްލުމުގެ ސަބަބުން ފަހަރެއްގައި އެމީހަކު މަރާކުރިމަތިލައި ހަލާކުވެގެން ދިއުން ވެސް ހިމެނޭތީކަމަށެވެ.

ޞިއްޙީ ގޮތުން ލާޒިމުކުރާ އިޖްރާއަތްތަކަށް ތަބާވުން ވާޖިބުކަމަކަށް ވީހިނދު އެކަމަކީ ޢުމުރުގެ ގޮތުން ވިޔަސް، ފަރުދުންގެ ސަލާމަތާއި ރައްކާތެރި ކަމާ ގުޅިފައިވާ ކަމަކަށް ވިޔަސް، އަދި ނަމާދުކުރާ މީހުންގެ ޞިއްޙީ ޙާލަތާ ގުޅިފައިވާ ކަމަކަށްވިޔަސް، އަދި މިސްކިތަށް ވަނުމުގެ ކުރިން އަދާކުރަން ޖެހޭ ކަމަކަށް ވިޔަސް، އިތުބާރު ހުރި ޞިއްޙީ މާހިރުން މިކަމަށް ދެއްވާ އިރުޝާދަށް ބޯލެނބުމަކީ ދީނީގޮތުން ވާޖިބުކަމެއްކަމަށް ފަތުވާދޭ މަޖިލީހުން ބުނެފައިވެއެވެ.

ފަތުވާ މަޖިލީހުން މިގޮތަށް ކަނޑައަޅާފައިވާއިރު، ކޯވިޑު-19 ގެ ހާލަތާ ގުޅިގެން މާލެ ސަރަހައްދުގެ މިސްކިތްތަކުގައި ގައިދުރުކަން ބަހައްޓައިގެން ނަމާދުކުރަން އިސްލާމިކް މިނިސްޓްރީން ވެސް ވަނީ އަންގާފައެވެ.