ބްރެޒިލްގައި ކޮވިޑު ވެކްސިން ޖެހުން ލާޒިމު ނުކުރެވޭ ގޮތް ހެދުމަށް ބިލު ހުށައެޅުއްވި އޮފިޝަލަކު ކޮވިޑު ޖެހިގެން މަރުވެއްޖެ

ބްރެޒިލްގައި ވެކްސިން ޖެހުން ލާޒިމު ކުރުމާ ދެކޮޅަށް ބިލެއް ހުށައެޅުއްވި އޮފިޝަލަކު ކޮވިޑު ޖެހިގެން މަރުވެއްޖެއެވެ.

ބޭރުގެ މީޑިއާތަކުން ރިޕޯޓު ކޮށްފައިވާ ގޮތުން ކޮވިޑު ޖެހިގެން މަރުވެފައިވަނީ އުމުރުން 54 އަހަރުގެ ސިލްވިއޯ އެންޓޯނިއޯ ފަވޭރޯއެވެ. ސިލްވިއޯގެ އާއިލާއާ ޙަވާލާދީ ބޭރުގެ މީޑިއާތަކުން ރިޕޯޓު ކުރާ ގޮތުން އޭނާ މަރުވެފައިވަނީ ކޮވިޑު ޖެހިގެން ފަރުވާ ހޯއްދަވަމުން ގެންދަވަނިކޮށެވެ. ފެބްރުއަރީ މަސް ތެރޭގައި އޭނާ ވަނީ ކޮވިޑު ވެކްސިން ޖެހުން ލާޒިމު ނުކުރެވޭ ގޮތް ހެދުމަށް ސްޓޭޓް ލެޖިސްލޭޗަރއަށް ބިލެއް ހުށައަޅުއްވާފައެވެ.

ރިޕޯޓުތައް ބުނާގޮތުން ސިލްވިއޯއަކީވެސް ބްރެޒިލްގެ ރައީސް ޖައިރް ބޮލްސޮނާރޯ ފަދައިން ކޮވިޑް ވެކްސިން ޖެހުމަކީ ބޭނުންތެރި ކަމެއް ނޫންކަމަށް ދޭހަވާ ބީދައިން ވާހަކަ ދައްކަވަމުން ގެންދަވާ ފަރާތެކެވެ. އެހެންނަމަވެސް، 2020 ވަނަ އަހަރުގެ ޑިސެމްބަރު މަސްތެރޭގައި ބްރެޒިލްގެ ސުޕްރީމް ކޯޓުންވަނީ ކޮވިޑު ވެކްސިން ނުޖަހާ ފަރާތްތަކާމެދު ބައެއް ކަހަލަ ހަރުކަށި ފިޔަވަޅުތައް އެޅުމުގެ ހުއްދަ ސަރުކާރުގެ ކަމާބެހޭ އިދާރާތަކަށް ދީފައެވެ. އެކަމުގެ ސަބަބުން ބައެއް ކަހަލަ އާންމު ޚިދުމަތްތައް ލިބިގަތުމުގައިވެސް ވެކްސިން ނުޖަހާ ފަރާތްތަކަށް ވަނީ ގޮންޖެހުންތައް ކުރިމަތިވެފައެވެ. ޚުދު ބްރެޒިލްގެ ރައީސް ބޮލްސޮނާރޯވެސް ވަނީ ސުޕްރީމް ކޯޓުގެ މި ނިންމުމާ ދެކޮޅަށް ސިލްވިއޯ ހުށައެޅުއްވި ބިލަށް ތާއީދު ކުރައްވާފައެވެ.

ބްރެޒިލްއިން މިހާތަނަށް 11 މިލިއަނަށްވުރެ ގިނަ މީހުން ކޮވިޑަށް ޕޮޒިޓިވްވެފައިވާއިރު، 278،000ށް ވުރެ ގިނަ މީހުން ވަނީ މި ވައިރަސް ޖެހިގެން މަރުވެފައެވެ. އެ ޤައުމުގައި ދުވާލެއްގެ މައްޗަށް އެތައް ބަޔަކު ކޮވިޑް ޖެހިގެން މަރުވަމުން ދިޔައިރުވެސް ބޮލްސޮނާރޯ ގެންދެވީ މާސްކް އެޅުއްވުމެއް، އަދި އިޖުތިމާއީ ގައިދުރުކަމެއް ނެތި އެއްވުންތައް ބާއްވައި، ރެލީތަކުގައި ބައިވެރިވެ ވަޑައިގަންނަވަމުންނެވެ. ދާދި ފަހުންވެސް އެ ޤައުމުން ރެކޯޑު އަދަދުތަކަށް މީހުން މަރުވަމުން ދިއުމާ ގުޅިގެންވެސް ނޫސްވެރިންނާ ބައްދަލު ކުރައްވައި ވިދާޅުވީ، "މާބޮޑަށް ޝަކުވާ ނުކޮށް ހަމަޖެހިލުމަށެވެ".