ރާއްޖެ ކުރިއަށްދާނީ ގައުމީ އަދި އިސްލާމީ ވިސްނުމުގައި: މައުމޫން

ވޭތުވެދިޔަ ދިގު މުއްދަތުގައި ރާއްޖެ ކުރިއަށް ދިޔައީ ގައުމީ އަދި އިސްލާމީ ވިސްނުމުގައި ކަމަށާއި، ދެން ވެސް ކުރިއަށްދާނީ އެގޮތަށް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.

ރައީސް މައުމޫން ކުރެއްވި ޓުވީޓެއްގައި ވިދާޅުވީ ވޭރުވެދިޔަ ދިގު މުއްދަތުގައި ރާއްޖެ ކުރިއަށް ދިޔައީ ގައުމީ އަދި އިސްލާމީ ވިސްނުމުގައި ކަމަށާއި، އަދި އިރާދަކުރެއްވިޔާ ދެން ވެސް ރާއްޖެ ކުރިއަށްދާނީ ހަމަ ގައުމީ އަދި އިސްލާމީ ވިސްނުމުގައި ކަމަށެވެ. ރައީސް މައުމޫން މިހެން ވިދާޅުވި ނަމަވެސް އެއީ އެމަނިކުފާނު ކޮންކަމަކާ ގުޅުވައިގެން ވިދާޅުވި އެއްޗެއް ކަމެއް ސާފުކޮށްދެއްވާފައެއް ނުވެއެވެ.

ރައީސް މައުމޫން މިހެން ވިދާޅުވި އިރު، އެމަނިކުފާނުގެ ވެސް ހިމެނިވަޑައިގަންނަވާ ކޯލިޝަން ސަރުކާރަށް އަންނަނީ ގިނަ ފާޑުކިޔުންތަކެއް އަމާޒުވަމުންނެވެ. އެގޮތުން މި ސަރުކާރަކީ ދީނާ ހިލާފަށް ކަންކަން ކުރާ ސަރުކާރެއް ކަމަށް އިދިކޮޅުން ބުނާއިރު، އިސްލާމް ދީނަށާއި ކީރިތި ރަސޫލާއަށް ފުރައްސަރަ ކުރި ޖަމިއްޔާތަކަކާއި އެ ނޫން ވެސް ބައެއްގެ މައްސަލަތަކެއް ފާއިތުވި ދެތިން އަހަރެއްގެ ތެރޭގައި ފެންމަތިވެފައިވެއެވެ.

އެ ފަރާތްތަކުގެ މައްޗަށް އެދެވޭ ފިޔަވަޅެއް އަޅާފައި ނުވާ ކަމަށާއި، އެމީހުންގެ ތެރޭގައި ސަރުކާރަށް ނިސްބަތްވާ އިސްވެރިން ހިމެނޭ ކަމަށް އިދިކޮޅުން ތުހުމަތުކުރާއިރު، އިދިކޮޅުން އެކި ފަހަރު އެކި ނަމުގައި ބާއްވަމުން އަންނަ ސިލްސިލާ އެއްވުންތައް ވެސް ބާއްވަނީ ގައުމު ސަލާމަތްކުރަން ކުރާ ގައުމީ މަސައްކަތެއްގެ ނަމުގައެވެ.

ދާދި ފަހުން ރައީސް މައުމޫން އިދިކޮޅު ކޯލިޝަނާ ގުޅެން އުޅޭ ކަމުގެ ވާހަކަތައް ފެތުރި އެމަނިކުފާނުގެ އެމްއާރްއެމް އަށް ނިސްބަތްވާ މެމްބަރުން އިދިކޮޅު އެއްވުންތަކުގައި ބައިވެރިވާ ކަމުގެ ވާހަކަތައް ވެސް ފެތުރިފައިވެއެވެ. އެކަމަކު އެފަދަ އެއްވެސް ކަމެއް ނުހިނގާ ކަމަށާއި، އެކަހަލަ މަޝްވަރާއެއް ވެސް ނެތް ކަމަށް ބުނެ އެމްއާރްއެމްއިން ވަނީ އެކަން ދޮގުކޮށްފައެވެ.