އިންތިޚާބުގައި އަތޮޅުތެރޭގައި ހަރަކާތްތެރިވާ އޮފިޝަލުންގެ ތަމްރީނުތައް އާދީއްތަ ދުވަހު ފަށާނެ- އިސީ
ކުރިއަށް އޮތް އިންތިޚާބުގައި އޮފިޝަލުންގެ ގޮތުގައި 7000 އާއި 8000 އާ ދެމެދުގެ އަދަދަކަށް އޮފިޝަލުން ބޭނުންވާނެ
އިލެކްޝަންސް ކޮމިޝަނުގެ ރައީސް އަހުމަދު ޝަރީފް
އަންނަ އެޕްރީލް 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގައި އަތޮޅުތެރޭގައި ހަރަކާތްތެރިވާ އޮފިޝަލުންގެ ތަމްރީނުތައް އާދީއްތަ ދުވަހު ފެށުމަށް ނިންމާފައިވާ ކަމަށް އިލެކްޝަން ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ޝަރީފް ވިދާޅުވީ އާދީއްތަ ދުވަހު ތަމްރީނުތައް ފަށަން ނިންމާފައިވަނީ މާލެއިން އަތޮޅުތެރެއަށް ޓްރެއިނަރުން ފޮނުވައިގެން ކަމަށެވެ. އަތޮޅުތެރެއިން އަދިވެސް 160 އޮފިޝަލުން މަދުވާ ކަމަށާއި އެކަމަކު އިންތިޚާބަށް އަސަރެއް ނުކުރާނެ ކަމަށް ޝަރީފް ވިދާޅުވިއެވެ.
މި އިންތިޚާބުގައި ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދުމަށް އީސީން ކޮށްފައިވާ އިއުލާނެއްގައި ބުނެފައިވަނީ ކުރިން އޮފިޝަލުންގެ ގޮތުގައި ޙަރަކާތްތެރިވުމަށް ކުރިމަތިލާ އަދި ކޮމިޝަނުން އޮފިޝަލުންގެ ގޮތުގައި ހޮވުނުކަން އަންގާފައިވާ ފަރާތްތަކުން އަލުން ފޯމު ހުށަހަޅަން ނުޖެހޭނެ ކަމަށެވެ. ޝަރުތު ހަމަވާ މީހުން މިކަމަށް ޚާއްސަ ކުރެވިފައިވާ ފޯމު ފުރިހަމަކުރުމަށްފަހު އެ ފޯމާއެކު ހުށަހަޅަންޖެހޭ ލިޔެކިޔުންތަކާއެކު info@elections.gov.mvއަށް ފޮނުވުމަށް އީސީން ވަނީ އެދިފައެވެ. އޮފިޝަލަކަށް ވުމަށް އެދި ހުށަހަޅާ ފޯމު، ރަށު/އަތޮޅު/ސިޓީ ކައުންސިލް އިދާރާއިންނާއި އިލެކްޝަންސް ކޮމިޝަނުގެ ވެބްސައިޓް www.elections.gov.mv އިން ލިބެން ހުންނާނެ ކަމަށް ވެސް އީސީން ބުނެއެވެ. ބޭނުންވާ ޢަދަދަށް, މީހުން ނުލިބޭނަމަ، އޮފިޝަލުން ހަމަވަންދެން ފޯމް ބަލައިގަންނާނެ ކަމަށްވެސް ބުނެއެވެ.
އީސީން އިތުރަށް ބުނެފައިވަނީ ކުރިއަށް އޮތް އިންތިޚާބުގައި އޮފިޝަލުންގެ ގޮތުގައި 7000 އާއި 8000 އާ ދެމެދުގެ އަދަދަކަށް އޮފިޝަލުން ބޭނުންވާނެކަމަށް އަންދާޒާކުރެވޭކަމަށެވެ. އިންތިޚާބުގެ ބަޖެޓާ ގުޅޭގޮތުން ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަދައްކަވަމުން އީސީގެ ރައީސް އަހުމަދު ޝަރީފް ވިދާޅުވީ އިންތިޚާބަށް ބޭނުންވާ އޮފިޝަލުންގެ ތެރެއިން މިހާތަނަށް ލިބިފައިވަނީ 50 އިންސައްތައަށް ވާވަރުގެ އޮފިޝަލުން ކަމަށެވެ.
އޮފިޝަލުން ލިބުމުގައި ދިމާވެފައިވާ ދަތިތައް ހައްލުކުރުމަށް ސިޔާސީ ޕާޓީތަކާއި އެކި ޖަމްއިއްޔާ ޖަމާއަތްތައް މެދުވެރިވެގެން އޮފިޝަލުން ހޯދުމަށް މަސައްކަތް ކުރައްވަމުން ގެންދަވާކަމަށް ޝަރީފް ވިދާޅުވިއެވެ.
