ޕޮޒިޓިވް ކޭސްތަކެއް ފެނުމާއި ގުޅިގެން ޅޮހި މޮނިޓަރިންގ އަށް

ނ ޅޮހީގައި ހޯމް ކަރަންޓީނުގައިވާ ބަޔަކު ކޮވިޑް-19 އަށް ޕޮޒިޓިވްވުމާއި ގުޅިގެން އެރަށް މޮނިޓަރިންގ ގެ ހާލަތަށް ގެނެސްފިއެވެ.

ޅޮހި މޮނިޓަރިންގ އަށް ލީކަން ހާމަކޮށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފައިވަނީ މަރޗް މަހުގެ 12 ވަނަ ދުވަހުގެ މެންދުރު 14:32ން ފެށިގެން ރަށުގައި ތިބި އެއްވެސް މީހަކު އެޗްޕީއޭއިން ވަކިގޮތެއް އަންގަންދެން ރަށުން ފޭބުމާއި އެޗްޕީއޭގެ ހުއްދަނެތި އެއްވެސް މީހަކު ރަށަށް އެރުން މަނާކޮށް ރަށް މޮނިޓަރ ކުރާކަމަށެވެ.

މިކަމާއި ގުޅިގެން ޅޮހީގެ އިމަރޖެންސީ އޮޕަރޭޝަން ސެންޓަރުން ބުނީ ހޮނިިހިރު ދުވަހު ރޭންޑަމް ސާމްޕަލް ނެގުމުގެ މަސައްކަތްކުރާނެ ކަމަށެވެ. ޅޮހީން އެންމެ ފުރަތަމަ ކޮވިޑަށް ޕޮޒިޓިވްވީ ކަރަންޓީނުގެ މުއްދަތު ހަމަކުރުމަށްފަހު ނެގި ސާމްޕަލްތަކެކެވެ. އެއަށްފަހު ޕޮޒިޓިވްވެފައިވަނީ ކަރަންޓީނުގައި ތިބިއިރު ކޮންޓެކްޓްވި އާއިލާ ބައެއްކަމަށް މައުލޫމާތު ލިބެއެވެ.

ކޮންޓެކްޓް ޓްރޭސިންގ ހެދުމަށް ޅޮހި މޮނިޓަރިންގ އަށް ލާފައިވާއިރު ޅޮހީ އިމަރޖެންސީ އޮޕަރޭޝަން ސެންޓަރުން ބުނެފައިވަނީ ރައްކާތެރިކަމުގެ ފިޔަވަޅެއްގެ ގޮތުން ސައި ހޮޓާ ރެސްޓޯރެންޓްތަކުން ޑެލިވަރީ އަދި ޓޭކްއަވޭގެ ޚިދުމަތް ދިނުމާއި ފިހާރަތައް ރޭގަނޑު 10:00 އިރު ބަންދުކުރުމަށް ނިންމާފައިވާކަމަށެވެ. އަދި ކަސްރަތު ކުލާސްތަކާއި ހުރިހާ ކުޅިވަރު ކުޅޭތަންތަން ބަންދުކުރަން ނިންމާފައިވާއިރު ސްކޫލްތަކާއި ކޮލެޖް ޔުނިވަރސިޓީ އަދި ޓިއުޝަން ކުލާސްތަކާއި ޤުރުއާން ކުލާސްތައް އޮންލައިންކޮށް ކުރިޔަށް ގެންދިޔުމަށް ވަނީ ނިންމާފައެވެ. މީގެއިތުރުން މަގުމަތީގައި ޖޯލިފަދަ ތަކެތި ބަހައްޓައިގެން ނުތިބުމަށްވެސް ޅޮހީގެ އެމަރޖެންސީ އޮޕަރޭޝަން ސެންޓަރުން ވަނީ އަންގާފައެވެ.

ޅޮހި މޮނިޓަރިންގ އަށް ގެނެސްފައިވާއިރު އދ. ފެންފުށިން މީހަކު ކޮވިޑް-19އަށް ޕޮޒިޓިވްވެ އެ ރަށް ވެސް ވަނީ މޮނިޓަރިންގ އަށް ލާފައެވެ.