ހުކުރު ދުވަހު ވެކްސިން ޖެހީ 1506 މީހުން
12 މާރިޗު 2021 | ހުކުރު 18:19ވެކްސިންގެ ދެވަނަ ޑޯޒު ޖަހަން ފަށާނީ އޭޕްރީލް މަހުގައި
ކޮވިޑް-19 ވެކްސިން ޖެހުން
ހުކުރު ދުވަހު ރާއްޖެއިން 1،506 މީހުން ވެކްސިން ޖަހާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުން، ރާއްޖެއިން 1،506 މީހުން ވެކްސިން ޖަހާފައިވާއިރު، އެއީ އަތޮޅު ތެރެއިން ވެކްސިން ޖެހީ މީހުންނެވެ. މާލެ ސަރަހައްދުން ހުކުރު ދުވަހު ވެކްސިން ޖަހައިދިނުން ވަނީ ހުއްޓާލައިފައެވެ.
އިތުރު 1،506 މީހުން ވެކްސިން ޖެހުމާއިއެކު ރާއްޖެއިން ވެކްސިން ޖެހި މީހުންގެ އަދަދު ވަނީ 188،436 ށް އަރައިފައެވެ. އެއީ މާލޭ ސަރަހައްދުން ވެކްސިން ޖެހި 105،836 މީހުންނާއި އަތޮޅު ތެރެއިން ވެކްސިން ޖެހި 82،600 މީހުންނެވެ.
އެޗްޕީއޭއިން އާންމުކޮށްފައިވާ އުސޫލުގައިވާގޮތުން ދެވަނަ ޑޯޒު ޖަހަން ފަށަން ޖެހޭނީ މޭ މަހުގެ ތެރޭގައެވެ. އެޗްޕީއޭއިން ބުނީ ވެކްސިންގެ ދެވަނަ ޑޯޒު ޖެހުން އެންމެ އަވަސްކޮށްވެސް ފެށޭނީ އޭޕްރިލް މަހު ކަމަށެވެ.
ކޮވިޝީލްޑް ވެކްސިންގެ އެއް ލައްކަ ޑޯޒު މިދިޔަ ޖެނުއަރީމަހު އިންޑިއާއިން ރާއްޖެއަށް ގެނެސްފައިވާއިރު އެ ހުސްވަންދެން ވެކްސިން ޖަހާފައިވެއެވެ. އަދި އޭގެ ފަހުންވެސް އިންޑިއާއިން ވަނީ ކޮވިޝީލްޑްގެ އިތުރު އެއް ލައްކަ ޑޯޒު ރާއްޖެއަށް ގެނެސްފައެވެ.
ޗައިނާގެ ސިނޮފާމް ވެކްސިންވެސް ހެޔޮއެދޭ ފަރާތްތަކުން ރާއްޖެއަށް ހަދިޔާކޮށްފައިވީ ނަމަވެސް އެ ވެކްސިން ރާއްޖޭގައި ބޭނުންކުރުމުގެ ހުއްދަ އަދި މޯލްޑިވްސް ފުޑް އެންޑް ޑްރަގް އޮތޯރިޓީން ދީފައެއް ނުވެއެވެ
