15ގައި ވެކްސިންގެ ފުރަތަމަ ޑޯޒް ދިނުން ހުއްޓާލިނަމަވެސް ވަކި އުމުރުފުރައިގެ މީހުންނަށް ވެކްސިން ދޭނެ
ބަލި ހަލުވިކަމާއެކު ފެތުރެމުންދާއިރު ބަލިން ފުރިހަމަ ރައްކާތެރިކަން ލިބޭނީ ވެކްސިންގެ ދެ ޑޯޒުވެސް ފުރިހަމަކޮށްގެން
ކޮވިޑް-19 ވެކްސިން ޖެހުން
މާލެ ސަރަޙައްދުގައި ކޯވިޑް-19 ވެކްސިންގެ ފުރަތަމަ ޑޯޒު ދިނުން އަންނަ ހަފްތާގެ ހޯމަ ދުވަހާ ހަމައަށް (15 މާރޗް 2021) ކުރިއަށް ގެންދާގޮތަށް ނިންމާފައިވީ ނަމަވެސް މިތާރީހުގެ ފަހުން ވެސް ވަކި އުމުރުފުރައިގެ މީހުންނަށް ވެކްސިންގެ ފުރަތަމަ ޑޯޒު ޖެހުން ކުރިއަށްދާނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ އެމީހުންގެ ތެރޭގައި ހިމެނެނީ ބަލިން ރައްކާތެރިކުރުމަށް ޚާއްޞަ އިސްކަމެއް ދޭ ފަރާތްތަކާއި (އުމުރުން ދުވަސްވީ މީހުންނާއި ބަލިތަކުގައި އުޅޭ މީހުން)، ޕޮސިޓިވްވެ މިހާރު އެކަހެރިވެފައިވާ މީހުންނާއި (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)، ކޮންޓެކްޓްވެ ކަރަންޓީންގައި ތިބި މީހުންނަށެވެ. އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި، ރާއްޖެއިން ބޭރުން ދަތުރުކުރުމަށްފަހު ކަރަންޓީންގައި ތިބި މީހުންނާއި މާލެއިން ދަތުރުކުރުމަށްފަހު ކަރަންޓީނުގައި ތިބި މީހުންގެ އިތުރުން ބައްޔެއްގެ ސަބަބުން، ޞިއްޙީ ޙާލަތެއްގެ ސަބަބުން ވެކްސިން ޖެހުން ލަސްކުރަންޖެހުނު މީހުންނަށް ކަމަށެވެ.
މިކަމާ ގުޅިގެން ހެލްތު މިނިސްޓަރ އަހުމަދު ނަސީމް ވިދާޅުވީ މިދިޔަ މަހު އެކެއްގައި ރާއްޖޭގައި ކޮވިޑް-19އާ ދެކޮޅަށް ވެކްސިން ޖެހުމުގެ ގައުމީ ކެމްޕޭން ފަށައިގެން ކުރިއަށްދާއިރު ވެކްސިންގެ ފުރަތަމަ ޑޯޒު ޖަހާތާ މިހާރު ދުވަސްތަކެއް ވެފައިވާ ކަމަށެވެ. ކޮންމެވެސް އެއް ހިސާބަކުން ދެވަނަ ޑޯޒު ޖަހަން ފަށަން ޖެހޭނެކަން ފަހަގަކުރައްވައި ވިދާޅުވީ ބަލި ހަލުވިކަމާއެކު ފެތުރެމުންދާއިރު ބަލިން ފުރިހަމަ ރައްކާތެރިކަން ލިބޭނީ ވެކްސިންގެ ދެ ޑޯޒުވެސް ފުރިހަމަކޮށްގެން ކަމަށެވެ.
މިނިސްޓަރ ނަސީމް ވިދާޅުވީ ދުވާލެއްގެ މައްޗަށް 10،000 ޑޯޒު ވެކްސިން ޖެހުމުގެ ގާބިލްކަން ރާއްޖޭގައި އެބަހުރި ކަމަށާއި މި މުއްދަތުގެ ތެރޭގައި މާލޭގައި 18 އަހަރުން މަތީގެ އެންމެންނަށް ވެކްސިންގެ ފުރަތަމަ ޑޯޒް ޖަހައި ނިންމާލެވޭނެ ކަމަށެވެ.
ރާއްޖޭގައި ވެކްސިންގެ ދެވަނަ ޑޯޒު ޖަހަން ނިންމާފައި ވަނީ ފުރަތަމަ ޑޯޒު ޖަހާތާ އަށް ހަފްތާ ފަހުންނެވެ. މިދިޔަ މަހު އެކެއްގައި ވެކްސިންގެ ފުރަތަމަ ޑޯޒު ޖަހަން ފެށިއިރު އެ އުސޫލުން ބަލާ ނަމަ ދެވަނަ ޑޯޒު ޖަހަން ފަށަން ޖެހޭނީ މޭ މަހުގެ ތެރޭގައެވެ. ކޮވިޝީލްޑް ވެކްސިންގެ އެއް ލައްކަ ޑޯޒު މިދިޔަ ޖެނުއަރީ މަހު ރާއްޖެ އަށް އިންޑިއާއިން ގެނެސްފައިވާއިރު އެ ޑޯޒުތައް ހުސްވަންދެން ވެކްސިން ޖަހާނެ ކަމަށް އެޗްޕީއޭއިން މީގެ ކުރިން ބުނެފައިވެއެވެ. އަދި އޭގެ ފަހުންވެސް އިންޑިއާއިން ވަނީ ކޮވިޝީލްޑްގެ އިތުރު އެއް ލައްކަ ޑޯޒު ރާއްޖެއަށް ގެނެސްފައެވެ.
ޗައިނާގެ ސިނޮފާމް ވެކްސިން ވެސް ހެޔޮ އެދޭ ފަރާތްތަކުން ރާއްޖެއަށް ހަދިޔާކޮށްފައިވީ ނަމަވެސް އެ ވެކްސިން ރާއްޖޭގައި ބޭނުންކުރުމުގެ ހުއްދަ އަދި މޯލްޑިވްސް ފުޑް އެންޑް ޑްރަގް އޮތޯރިޓީން ދީފައެއް ނުވެއެވެ.
ރާއްޖޭގައި މިހާތަނަށް 175,000ށް ވުރެ ގިނަ މީހުން ވެކްސިން ޖަހާފައިވާއިރު އޭގެ ތެރެއިން 99،821 މީހުން ވެކްސިން ޖެހީ މާލެ ސަރަހައްދުންނެވެ. އަދި އަތޮޅުތެރެއިން ވެކްސިން ޖެހީ 75,635 މީހުންނެވެ. މާލެ ސަރަހައްދުގައި ހުކުރު ނޫން އެހެން ހުރިހާ ދުވަހެއްގައި ވެސް ވެކްސިން ޖެހުމުގެ ހިދުމަތް ލިބޭނެއެވެ.
