މޯލްޑިވްސް ރިފޯމް މޫވްމަންޓް(އެމްއާރުއެމް)ގެ ސްލޮޓެއްގައި ފިޝަރީޒް މިނިސްޓަރ ކަމުގައި ހުންނެވި ޒަހާ ވަހީދުގެ އިތުބާރު ނެތްކަމުގެ މައްސަލަ އިދިކޮޅުން ރައްޔިތުންގެ މަޖިލީހަށް ހުށަހަޅާފައިވާ މައްސަލައަކީ އެއްވެސް އަސާސެއްނެތް ސަރުކާރު ކޯލިޝަން ތެރޭގައި ފިތުނަވެރިކަން އުފެއްދުމަށް ސިޔާސީ ބޭނުމަކަށް ހުށަހަޅާފައިވާ މައްސަލައެއްކަމުގައި ދެކޭކަމަށް އެޕާޓީން ބުނެފިއެވެ.

ޒަހާގެ އިތުބާރުނެތްކަމަށް ބުނެ ރައްޔިތުންގެ މަޖިލީހުގައި ހިމެނިވަޑައިގަންނަވާ ޕީޕިއެމް/ޕީއެންސީ ކޯލިޝަންގެ 9 މެމްބަރުންނާއި އަމިއްލަ ގޮތުން މަޖިލީހަށް ހޮވިވަޑައިގެންނެވި ކާށިދޫ ދާއިރާގެ މެމްބަރ އަބްދުﷲ ޖާބިރު ހިމެނޭގޮތަށް 10 މެމްބަރުންގެ ސޮޔާއެކު މަޖިލީހަށް ހުށަހަޅާފައިވަނީ މަރޗް މަހުގެ 10 ވަނަ ދުވަހުއެވެ. މިނިސްޓަރ ޒަހާގެ އިތުބާރުނެތްކަމަށް ބުނެ ހުށަހަޅާފައިވާ މައްސަލައިގައި ވަނީ މިމައްސަލަ ހުށަހަޅަނީ މަސްވެރިކަމާގުޅޭ ސަރުކާރުގެ ވައުދުތައް ނުފުއްދައި، މަސްވެރިކަން ކުރިއެރުވުމުގެ ޒިންމާ ފިޝަރީޒް މިނިސްޓަރަށް އަދާނުކުރެވޭތީއާއި ޒަހާ އެމަގާމުގައި ހުންނެވުމަކީ ދިވެހި މަސްވެރިންނާއި މަސްވެރި އާއިލާތައް އިތުރަށް ނިކަމެތި ވެގެންދާނެ ކަމެއްކަމަށްވާތީ ކަމަށެވެ.

މިކަމާ ގުޅިގެން އެމްއާރުއެމުން ނެރުނު ބަޔާނުގައި ބުނެފައިވަނީ މިނިސްޓަރ ޒަހާ އަކީ މެރިން ބައޮލޮޖީން އަދި އޯޝަންގްރޮފީ ދާއިރާއިން ޖޮއިންޓް އޮނާރސް ޑިގްރީ ފުރިހަމަކުރައްވާ، މެރިން ސައިންސް (ފިޝަރީޒް ރިސޯސް މެނޭޖްމަންޓް) ދާއިރާއިން މާސްޓަރސް ޑިގްރީ ހައްދަވައި، މަސްވެރިކަމުގެ ދާއިރާގައި މަސައްކަތްކުރައްވާ ދާއިރާގެ ތަޖުރިބާ ލިބިވަޑައިގެން ހުންނެވި ބޭފުޅެއްކަމަށެވެ.

މިނިސްޓަރުކަމާ ހަވާލުވެވަޑައިގެން 20 އަހަރަށްވުރެ ގިނަ ދުވަސްވެފައި އޮތް މަސްވެރިކަމުގެ ޤާނޫނު ޒަމާނީ ޤާނޫނަކަށް ބަދަލުކޮށް މަސްވެރިކަމުގެ މެނޭޖްމަންޓް ޕްލޭންތައް އެކުލަވާލެއްވިކަމަށް ބަޔާނުގައި ބުނެފައިވެއެވެ. މީގެއިތުރުން ކޮވިޑްގެ ހާލަތުގައި ވެސް އިގްތިޞާދީ މުހިންމު ސިނާޢަތްތައް ކަމަށްވާ މަސްވެރިކަމާއި ދަނޑުވެރިކަމުގެ މަސައްކަތްތައް ނުހުއްޓި ކުރިޔަށް ގެންދެވޭނެ މަގު ފަހިކޮށްދެއްވިކަމަށެވެ.

މިއާއެކު ޔޫރަޕްގެ މާކެޓްގައި ދިވެހި މަހަށް ރަނގަޅު އަގެއް ހޯދުމަށްޓަކައި ހުއްޓުމެއްނެތި މަސައްކަތްކުރައްވާއިރު، ދެމެހެއްޓެނެވި ގޮތެއްގައި ދަނޑުވެރިކަން ކުރުމަށްޓަކައި ޕެސްޓިސައިޑް ޤާނޫނެއް ވުޖޫދަށް ގެންނަވާފައިވާއިރު، މެރިކަލްޗަރ ސިނާޢަތެއް ރާއްޖޭގައި ތަރައްޤީކުރުމަށް ކުރައްވާ މަސައްކަތްތައް ފާހަގަކޮށްލެވޭކަމަށް އެމްއާރުއެމުން ބުނެއެވެ. އަދި މިފްކޯގައި ހުރި ޒަމާންވީ ގިނަ މައްސަލަތަކަށް ހައްލު ހޯއްދަވައިދެއްވުމަށް މިނިސްޓަރ ޒަހާ އިސްވެހުންނަވާ ޕްލޭންތައް ހައްދަވައި އެކަމުގެ އަމަލީ މަސައްކަތް ފެއްޓެވި ފެއްޓުވުމުން ވެސް މިނިސްޓަރ ޒަހާގެ ހިންގުންތެރިކަމާއި ގާބިލްކަން އެނގިގެންދާކަމަށް އެމްއާރުއެމުން ބުނެއެވެ.

ކޯލިޝަން ސަރުކާރުން ގައުމުގެ އިސް މަގާމުތަކުގައި އަންހެނުންނަށް ފުރުސަތު ދެއްވާފައިވާއިރު އެކަމާއި ހަސަދަވެރިވެ އަންހެނުން ބާކީކޮށް ނިކަމެތިކުރުމުގެ ވިސްނުން ގެންގުޅުއްވާ މަދު މެމްބަރުން ރައްޔިތުންގެ މަޖިލީހުގައި ރައްޔިތުން ތަމްސީލުކުރުމަށް ތިބުމަކީ އެމްއާރުއެމުން ނުހަނު ކަންބޮޑުވާކަމެއް ކަމަށްވެސް މިބަޔާނުގައި ބުނެފައިވެއެވެ. އަދި މިނިސްޓަރ ޒަހާގެ އިތުބާރުނެތްކަމަށް ބުނެ ހުށަހަޅާފައިވާ މައްސަލައަކީ އަންހެނުން ބާރުވެރިކުރުވުމާ ދެކޮޅަށް ކުރާ މަސައްކަތެއްކަމަށް ވެސް ވަނީ ބުނެފައެވެ.

އަދި ބުދަ ދުވަހު އޮތް ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވިފަދައިން ކޯލިޝަން ފަސް އަހަރަށް ދެމެހެއްޓުމަށްޓަކައި ސަރުކާރާއެކު އެމްއާރުއެމްގެ މެމްބަރުންނާއި ކެބިނެޓްގައި ހިމެނިވަޑައިގަންނަވާ މިނިސްޓަރުން ސާބިތުކަމާއި އިޚުލާސްތެރިކަމާއެކު ދެމި ތިބޭނެކަމުގެ ޔަގީންކަން އެމްއާރުއެމުން އަރުވާކަމަށް ވެސް ބަޔާނުގައި ބުނެފައިވެއެވެ.

ވަޒީރެއްގެ އިތުބާރު ނެތްކަމުގެ މައްސަލައެއް މަޖިލީހަށް ވައްދަން ބޭނުންވަނީ 10 މެމްބަރުންގެ ސޮއެވެ. އަދި ސަރުކާރުގެ ވަޒީރެއްގެ އިތުބާރު ނެތްކަމަށް ފާސްކުރަން ބޭނުންވަނީ މަޖިލީހުގައި ތިއްބަވާ މެމްބަރުންގެ ތެރެއިން ދެބައިކުޅައެއްބައި މެމްބަރުންގެ (43 މެމްބަރުންގެ) ވޯޓެވެ.